2 तीमुथियुस 1:9 - Garhwali

⁹ अर परमेस्वर न हमतै इलै नि बचै, कि हमुन भौत अच्छा काम करिनी। पर वेन त हम पर अपणी दया कैरिके अपणी मनसा तैं पूरि करणु खुणि हमतै बुलै। किलैकि परमेस्वर न दुनियां की शुरुवात से ही पैलि अपणी दया यीशु मसीह का द्‍वारा हम पर दिखै, अर हमतै बचौण की योजना बणै। अर वेन हमतै इलै बचै, ताकि हम एक पवित्र जीवन जी सैका।

गढवली नयो नियम

⁹ पिता परमेश्वर ल ही हम तैं बचै के उद्धार प्रदान कैरी, अर हम तैं एक पवित्र जीवन ज्यूंणु कु बुलै, वेल हम तैं इलै नि चुणि किलैकि हम ल अच्छा काम करिनी पर य वेकी दया का अनुसार च, जु शुरुवात बट्टी मसीह यीशु मा हमेशा से हम पर हवे।

2 तीमुथियुस 1:9 Referans Kwoze

रोमियों 16:25

हे मेरा प्यारा भै-बैंणो, अब हम यीशु मसीह का द्‍वारा पिता परमेस्वर की बडै हमेसा खुणि कैरा, जु कि सभ्यों मा एकमात्र समझदार च। पिता परमेस्वर तुमतै वे शुभ समाचार का मुताबिक जैको मि परचार करदु, यीशु मसीह का रैबार का द्‍वारा तुमतै बिस्वास मा और मजबूत करण की ताकत देन्दु। अर शुभ समाचार को यू राज सभ्यों खुणि खुल्यूं च, जैतैं एक लम्बा बगत तक छिपै के रखै गै छौ, अब उ उज्याळा मा ऐ गै। अर सदनि तक ज्यून्द रौण वळा पिता परमेस्वर की आज्ञा का द्‍वारा यू सब जाति का लोगु पर परगट ह्‍वे गै, ताकि वु लोग बिस्वास कैरा अर आज्ञा को पालन कैरा, अर यू सब कुछ उई च जु कि रैबर्यों न पवित्रशास्‍त्र मा बोलि छौ। अर हमरा पिता परमेस्वर की बडै सदनि तक होणी रौ। आमीन।

तीतुस 1:2

अर यू सब मि इलै कनु छौ, ताकि परमेस्वर का लोग ईं आस मा रा, कि ऊंतैं सदनि को जीवन मिली सैको। अर परमेस्वर कभि झूठ्‍ठ नि बुल्दु, दुनियां की शुरुवात से पैलि वेन ही हम खुणि सदनि को जीवन देणो को करार कर्युं च।

रोमियों 9:11

मगर दुई जौंळ्या बच्‍चों तैं जनम देण से पैलि, पिता परमेस्वर न रिबका कू बोलि छौ कि, “बड़ु नौनु अपणा छुटा भै की सेवा करलु।” अर ना ही ऊं नौनो न कुई अच्छु या बुरु काम कैरी छौ। मगर पिता परमेस्वर न इन इलै बोलि, ताकि वेन जैतैं चुण्यूं च, वेका द्‍वारा पिता परमेस्वर की योजना बणि रौ। अर यू सब त इलै ह्‍वे, ताकि इन साबित ह्‍वे जौ कि कै मनखि को चुणै जाण परमेस्वर की मनसा का मुताबिक ही होन्दु। अर पिता परमेस्वर की योजना कै मनखि का काम का मुताबिक नि बणदी, बल्किन मा वेन वेतैं किलै बुलै वेका मुताबिक होन्दी।

यूहन्ना 17:24

“हे मेरा पिता, मि चान्दु छौं, कि जु लोग तुमुन मि मा सौंप्यां छिन, ऊ भि मेरा दगड़ा मा उख रा, जख मि रौलु। ताकि दुनियां की शुरुवात से पैलि तुमुन मि बटि प्यार कैरिके जु आदर-सम्मान मितैं देई, वेतैं वु देखि सैका।

इफिसुस 1:11

अर पिता परमेस्वर न यीशु मसीह का द्‍वारा हमतै अपणु वारिस बणै। अर परमेस्वर न यू अपणी योजना का मुताबिक कैरी, अर वु सब कुछ अपणी मरजी का हिसाब से करदु।

दिब्य दरस 13:8

अर धरती पर रौण वळा सब लोग वे दैंत पूजा करला, मगर जौं लोगु का नौ दुनियां की शुरुवात से पैलि जीवन की किताब मा लिख्यां छिन वु लोग वे दैंत की पूजा नि करला। अर या किताब बलिदान होयां मेम्‍ने की च जु कि यीशु मसीह च।

1 पतरस 1:20

अर दुनियां का बणण से पैलि ही पिता परमेस्वर न यीशु मसीह तैं चुण्यालि छौ, ताकि उ दुनियां का लोगु तैं ऊंका पापों से माफी द्‍यो। अर पिता परमेस्वर न यीशु मसीह तैं ये जमना का आखिरी का दिनों मा ईं धरती पर परगट कैरी।

यूहन्ना 17:9

“अर अभि मि दुनियां का लोगु कू ना, पर ऊं चेलों खुणि ही जु तुमुन मि मा सौंप्यां छिन, ऊं खुणि ही प्रार्थना कनु छौं। किलैकि वु तुमरा ही छिन।

1 पतरस 2:9

पर तुम लोग परमेस्वर का द्‍वारा चुण्यां वंशज छाँ, अर राजा खुणि खास पवित्र पुरोहितों को समाज, जौं पर पिता परमेस्वर को अधिकार च। अर पिता परमेस्वर न ही तुमतै अन्धेरा मा बटि निकळि के अपणा महान उज्याळा मा बुलै, इलै अब तुम वेका कामों का बारा मा वेकी तारीफ कैरा।

इब्रानी 3:1

इलै हे मेरा पवित्र भै-बैंणो, पिता परमेस्वर न तुमतै बुलै के अफ खुणि अलग कैरियाली। इलै मि तुमतै बतै देन्दु, कि तुमतै अपणु ध्यान यीशु पर लगौण चयेणु जैतैं पिता परमेस्वर न अपणी तरफा बटि मनखियों खुणि ठैरै के भेजि। अर उ एक इन्द्रयो महा पुरोहित च, जैका बारा मा हम इन बुल्द्‍यां कि हम वे पर बिस्वास करद्‍यां।

1 थिस्सलुनीकी 4:7

किलैकि परमेस्वर न हमतै अशुद्ध कामों खुणि ना, बल्किन मा पवित्र होणु खुणि बुलयूं च।

1 कुरिन्थि 1:18

अर या सच्‍चि बात च कि जु लोग नास होण वळा बाटा पर चलणा छिन, ऊ इन सोचदिन कि यीशु मसीह को क्रूस पर मुरण की घटना बेकार च। मगर बचयै जाण वळा लोगु खुणि या परमेस्वर की ताकत च।

यूहन्ना 6:37

अर पिता न जु लोग मि मा सौंप्यां छिन, उ सभि मि मा आला। अर जु कुई भि मि मा आला, ऊंतैं मि कभि नि निकळळु।

दिब्य दरस 17:8

अर जु दैंत तिन देखि, पैलि उ ज्यून्द छौ पर अब वु मोरि गै, मगर उ फिर से ज्यून्द ह्‍वेके अधलोक बटि निकळि के आलु, अर वेको नास फिर से ह्‍वे जालु। अर धरती पर रौण वळा जौं लोगु का नौ दुनियां की शुरुवात बटि जीवन की किताब मा नि लिख्यां छिन, वु सब लोग वे दैंत का दगड़ा मा जु कुछ भि ह्‍वे देखि के बड़ु ताजुब करला।

इफिसुस 3:11

अर या योजना पिता परमेस्वर न दुनियां की शुरुवात से पैलि बणैयालि छै, जींतैं वेन हमरा यीशु मसीह का द्‍वारा पूरु कैरी।

रोमियों 3:20

किलैकि मूसा का नियम-कानूनों का आधार पर कुई भि मनखि परमेस्वर का समणि धरमी नि ठैरैये जालु, इलै परमेस्वर का नियम-कानूनों की वजै से हमतै इन ज्ञान मिलदु कि हम सब लोग पापि छां।

1 तीमुथियुस 1:1

हे मेरा प्यार भै तीमुथियुस, मि पौलुस या चिठ्‍ठी त्वे खुणि लिखणु छौं। अर हमतै बचौण वळा परमेस्वर अर यीशु मसीह न जै पर हमरि अपणी आस रखी च, वेन ही मितैं खास चेला ठैरै के भेजि। तीमुथियुस, तू मेरा सच्‍चा नौना का जन छैई, मि प्रार्थना करदु कि: पिता परमेस्वर अर हमरा प्रभु यीशु मसीह का द्‍वारा त्वे पर वेकी किरपा, शान्ति अर दया होणी रौ।

इफिसुस 1:9

अर पिता परमेस्वर न हमतै अपणी छिपी मनसा का बारा मा बतै, अर ईं बात से खुश ह्‍वे कि उ यीशु मसीह का द्‍वारा अपणी इच्छा तैं पूरि करलु।

रोमियों 9:24

अब चै वु यहूदी छिन या वु लोग जु यहूदी जाति का नि छिन, पिता परमेस्वर न हम सब लोगु मा बटि अफ खुणि लोगु तैं चुणी के रखियालि।

लूका 10:21

अर उबरि यीशु पवित्र आत्मा बटि खुश ह्‍वेके बोन्‍न लगि गै, “हे मेरा पिता, स्वर्ग अर धरती का प्रभु, मि तुमरो धन्यवाद करदु, हाँ पिता किलैकि तुमतै यू ही अच्छु लगि, कि यू सब बात समझदारों अर अकलमन्दो बटि छिपै जौ, अर ऊं लोगु पर परगट किये जौ जु बच्‍चों का जन छिन।

मत्ती 1:21

‘वा एक नौना तैं जनम द्‍याली। अर तू वेको नौ यीशु रखी किलैकि उ अपणा लोगु तैं ऊंका पापों बटि छुटकारा द्‍यालु।’”

खास चेलों 2:47

अर ऊ परमेस्वर की बडै करदा छा अर सब लोग ऊं बटि खुश छा। अर जु लोग बचण चान्दा छा, प्रभु ऊंतैं हरेक दिन बिस्वासी लोगु का दगड़ा मा मिलै देन्दु छौ।

खास चेलों 15:18

अर जु परमेस्वर भौत सालों पैलि बटि यों बातों तैं बतौन्दी औणु च, उई परमेस्वर यू सब बात बुल्दु।’

रोमियों 11:14

अर ईं सेवा का काम का द्‍वारा मि इन कोसिस करदु, कि जु मेरा इस्राएली भै-बन्द छिन ऊंमा इन आग पैदा ह्‍वे जौ, कि भौत लोग यीशु मसीह पर बिस्वास कैरिके बचयै जा।

रोमियों 11:29

अर पिता परमेस्वर ऊं लोगु खुणि अपणा विचार नि बदल्दु, जौं लोगु तैं वु दान-बरदान देके अपणा पास बुलान्दु।

फिलिप्पी 3:14

अर मि अपणा मकसद की तरफा अटगंणु छौं, ताकि मि स्वर्ग मा वे इनाम तैं पै सैकु, ज्यां खुणि परमेस्वर न मितैं यीशु मसीह का द्‍वारा बुलयूं च।

2 तीमुथियुस 1:1

हे मेरा भै-बैंणो मि पौलुस छौं, अर मितैं परमेस्वर न अपणी इच्छा का मुताबिक यीशु मसीह खुणि खास चेला ठैरै के चुण्यालि। अर मि या चिठ्‍ठी तीमुथियुस खुणि लिखणु छौं, जु कि मेरा प्रिय नौना का जन च। अर जु लोग यीशु मसीह पर बिस्वास करदिन, ऊंतैं जीवन देण को करार परमेस्वर को कर्युं च। अर येका बारा मा बतौणु खुणि ही परमेस्वर न मितैं चुणी के भेज्यूं च। तीमुथियुस मि प्रार्थना करदु कि, पिता परमेस्वर अर हमरु प्रभु यीशु मसीह अपणी किरपा, दया अर शान्ति त्वेतै देणु रौ।