1 तीमुथियुस 6:14 - Garhwali

¹⁴ हमरा प्रभु यीशु मसीह का वापस औण तक, ईं आज्ञा तैं ज्वा त्वेतै दिये जाणि च, तू बिन गळती कर्यां वेको अच्छा से पालन कनु रौ।

गढवली नयो नियम

¹⁴ कि तू हमारा प्रभु यीशु मसीह का दुबारा वापिस आंण तक ईं आज्ञा तैं निष्कलंक अर निर्दोष रख, कि कुई त्वे पर भंगार नि लगौ कि तु गलत कनि छै।

1 तीमुथियुस 6:14 Referans Kwoze

2 पतरस 3:14

इलै हे मेरा प्यारा भै-बैंणो, जब तुम यों सब बातों को इंतजार करणा छाँ, त इन कोसिस भि कैरा कि तुम शान्त सभौ रखी के प्रभु का समणि निरदोष अर बेदाग निकळा।

1 पतरस 1:7

अर जन सोना तैं परखणु खुणि आग की जरुरत होन्दी ताकि उ खरु बणौ, ठिक उन्‍नि तुमरा जीवनों मा अजमैस इलै औन्दी, ताकि तुम बिस्वास मा परखै जा अर खरा निकळि सैका। पर हे मेरा दगड़्यों, मि तुमतै बतै देन्दु, कि तुमरो बिस्वास त खतम ह्‍वे जाण वळा सोना से भि भौत जादा कीमती च। इलै जब तुम अजमैसों मा बटि निकळि के मजबूत होनद्‍यां, त यीशु मसीह का औण का बगत मा तुमतै पूरि तारीफ, बडै अर पूरु आदर जरुर मिललु।

1 थिस्सलुनीकी 5:23

हम तुम खुणि प्रार्थना करद्‍यां, कि तुमरि आत्मा, पराण, अर तुमरो सरील हमरा प्रभु यीशु मसीह का औण का दिन तक पूरु निरदोष अर हरेक बुरी बात से बचि के रौ। अर शान्ति देण वळु परमेस्वर तुमतै पूरि तरौं से पवित्र कैरो।

यहूदा 1:24

अर पिता परमेस्वर ही च, जु कि उतेडु़ लगण पर तुमरि हिफाजत कैरी सकदु, अर अपणा आदर-सम्मान मा तुमतै अपणा समणि बेदाग अर बड़ा आनन्द से खड़ु भि कैरी सकदु।

इब्रानी 9:28

ठिक उन्‍नि यीशु मसीह भि भौत सा लोगु का पापों तैं उठौणु खुणि एक ही बार बलिदान ह्‍वे। पर जब उ फिर से वापस आलु त उ मनखि का पापों तैं माफ करणु खुणि ना, बल्किन मा ऊंतैं छुटकारा देणु खुणि आलु जु कि वेको इंतजार कना छिन।

तीतुस 2:13

अर जब हम वीं धन्य आस का दगड़ा मा, परमेस्वर अर हमतै बचौण वळा यीशु मसीह को बड़ा सम्मान से ईं धरती पर दुबरा वापस औण को इंतजार करद्‍यां, तब ये इंतजार करण का बगत मा भि हमतै यू ही धरमी जीवन जीण चयेणु।

दिब्य दरस 1:7

देखा, यीशु बादळों का दगड़ा-दगड़ि औण वळु च, अर हरेक आंख वेतैं दिखली, अर ऊ भि वेतैं दिखला जौन वेतैं मारी छौ। अर धरती मा जथगा भि गोत्र का लोग छिन, ऊ सभ्या का सभि अपणी-अपणी छति भटकाला। हाँ, यू ही सच्‍च च। आमीन।

इब्रानी 9:14

किलैकि यीशु मसीह मा पाप ही नि छौ, अर वेन खुद तैं एक बलिदान का रुप मा पिता परमेस्वर का समणि दे दिनी, अर यू बलिदान आत्मिक अर सदनि तक रौण वळु च। इलै वेको ल्वे भौत जादा महान च, जु कि हमरा जमीर तैं शुद्ध करदु, ताकि हम ज्यून्दा परमेस्वर की पवित्र सेवा कैरी सैका। अर हम इन्द्रयो कुई भि काम नि कैरा, जु की हमतै सदनि की मौत की तरफा लेके जौ।

2 तीमुथियुस 4:1

प्रिय तीमुथियुस, हमरु यीशु मसीह जल्द लोगु पर राज करणु खुणि अर ज्यून्दा अर मुरयां लोगु को न्याय करणु कू औण वळु च। इलै मि पिता परमेस्वर तैं, अर हमरा यीशु मसीह तैं गवा माणी के त्वेतै हुकम देन्दु कि, तू परमेस्वर का वचन को परचार कैर, लोग तेरी सुणा या नि सुणा पर तू हर दसा मा तयार रौ। अर हरेक बात तैं सै के अर लोगु तैं उपदेस देके, जब वु गळत कैरा त ऊंका दोष तैं बतौ अर ऊंतैं झिड़की के सिखौ अर समझौ, कि ऊंतैं क्या करण चयेणु।

2 थिस्सलुनीकी 2:8

अर जब पाप को पुत्र परगट होलु, त उ शैतान का द्‍वारा दिईं ताकत से आलु। अर हरेक किसम का झूठ्‍ठा चमत्कारिक चिन्‍न, अर अदभुत काम कैरिके दिखालु। अर पाप का पुत्र को विणास होण से पैलि उ यू सब कुछ करलु। मगर जब प्रभु यीशु दुबरा आलु, त अपणा औण की ताकत से वेतैं अपणी फूकळ ही नास कैरी द्‍यालु।

कुलुसी 4:17

अर भै अरखिप्पुस कू बुलयां, कि सेवा को जु काम प्रभु न त्वेमा सौप्युं च वेतैं तू ध्यान से कैरी।

कुलुसी 1:22

मगर यीशु मसीह न अपणा सरील मा जिं मौत तैं सै, वेका द्‍वारा पिता परमेस्वर न तुमरो मेल-जोल अफ दगड़ा मा कैरियाली। अर अब वु तुमतै अपणा समणि पवित्र अर बेदाग, अर बिना गळती को खड़ु होयुं दिखण चाणु च।

फिलिप्पी 1:10

ताकि तुम भलै अर बुरै की बातों मा बटि भलै की बातों तैं जादा से जादा स्वीकार कैरी सैका, अर यीशु मसीह का वापस औण का दिन तक एक खरु अर निरदोष मनखि बणि के रै सैका।

1 कुरिन्थि 1:8

अर पिता परमेस्वर तुमतै आखिरी का दिन तक बिस्वास मा और भि जादा मजबूत करलु, ताकि हमरा प्रभु यीशु मसीह का दिन पर जब उ न्याय करलु, त तुम निरदोष ठैरा।

1 यूहन्ना 3:2

हे मेरा प्यारा लोगु, अब हम परमेस्वर की औलाद छां, अर औण वळा बगत मा क्या जि होला वेका बारा मा परगट नि किये गै। मगर हम त बस इथगा ही जणद्‍यां, कि जब यीशु मसीह परगट होलु त हम भि वेका जन बणि जौला, किलैकि हम वेतैं ठिक उन्‍नि दिखुला जन उ छैई च।

1 पतरस 1:19

बल्किन मा यू त तुमतै भौत कीमती ल्वे की वजै से मिली, जु कि यीशु मसीह को च अर वेमा कुई दाग अर दोष नि च, किलैकि उ बेदाग मेम्‍ना च जैन कुई भि पाप नि कैरी।

1 तीमुथियुस 6:20

तीमुथियुस, जु सच्‍चै का वचन त्वेतै दिये गैनी, वु वचन लोगु तैं सिखौणु रौ। अर जु लोग ईं सच्‍चि शिक्षा का खिलाप मा सिखौन्दिन, ऊं लोगु बटि अर ऊंकी बातों से दूर रौ। अर कुछ लोग गळती से वीं गळत शिक्षा तैं “ज्ञान” समझदिन अर वेका बारा मा सिखौन्दिन।

2 थिस्सलुनीकी 2:1

हे मेरा भै-बैंणो, अब हम तुमतै अपणा प्रभु यीशु का दुबरा औण का बारा मा, अर वेका पास इकट्‍ठा होण का बारा मा बतै देन्द्‍यां। किलैकि तुमरा बीच मा कुछ इन्द्रया लोग ऐ गैनी, जु कि तुमतै गळत सिखौन्दिन। अर वु बुल्दिन, कि प्रभु को दुबरा औण की बात पूरि ह्‍वे गै अर वु इन भि बुलला, कि हमतै त परमेस्वर का आत्मा न बतै अर भविष्यबाणियाँ भि ह्‍वेनि। अर वु लोग हमरु नौ लेके इन भि बुलला, कि हमतै त चिठ्‍ठी का द्‍वारा बतये गै। मगर हम तुमतै बतै देन्द्‍यां, कि यों बातों तैं सुणी के तुम अचानक से बिस्वास मा डगमगै नि जयां अर ना ही घबरयां।

1 थिस्सलुनीकी 3:13

अर हम तुम खुणि इन्‍नि भि प्रार्थना करद्‍यां, कि प्रभु यीशु तुमरा मनों तैं मजबूत कैरो, ताकि जब उ अपणा पवित्र लोगु का दगड़ा मा अऽ, त तुम हमरा पिता परमेस्वर का समणि वेकी नजर मा पवित्र अर निरदोष ठैरा।

फिलिप्पी 2:15

ताकि तुम हर बात मा निरदोष अर पवित्र बणि सैका, अर परमेस्वर की एक सच्‍चि औलाद का जन ह्‍वे जा, किलैकि तुम भ्रष्‍ट अर पापि लोगु का बीच मा रौन्द्‍यां, इलै तुमरो जीवन ऊंका बीच मा चमकणु रौ जन कि आसमान मा गैंणा चमकदिन।

फिलिप्पी 1:6

अर मितैं ईं बात पर पूरु यकीन च कि जै परमेस्वर न तुमरा भितर अच्छा काम की शुरुवात कैरी, उई तब तक तुमरा भितर काम कनु रालु जब तक यीशु मसीह को वापस औण को दिन ऐ नि जौ।

इफिसुस 5:27

अर ऊंतैं पूरि सान-सौकत से अपणा समणि खड़ु कैरो, जैमा कुई दाग नि हो, अर ना कुई झुरी अर ना ही कुई बुरै हो, अर उ पवित्र अर बेदाग हो।

2 पतरस 2:21

अर ऊं खुणि भली बात त या ही होन्दी, कि वु धरम का बाटा का बारा मा सच्‍चु ज्ञान ही नि पौन्दा, अर ज्वा पवित्र आज्ञा ऊंतैं दिये गै वींतैं ऊ लोग अच्छी तरौं से नि जनण चनदिन, बल्किन मा वांको पालन करण ही छोड़ि देन्दिन।

2 पतरस 3:2

ताकि तुम परमेस्वर का पवित्र रैबर्यों का द्‍वारा पैलि बटि बुलयां वचन तैं याद कैरा। अर हमरा परमेस्वर अर बचौण वळा प्रभु की आज्ञाओं तैं जु कि तुमतै खास चेलों का द्‍वारा दिये गैनी, ऊं सब बातों तैं अपणा ध्यान मा रखा।