1 कुरिन्थि 2:6 - Garhwali

⁶ हे मेरा दगड़्यों, जब मि कैतैं सिखौन्दु, त वे बगत मि मनखि का ज्ञान का मुताबिक बात नि करदु, मगर यीशु मसीह पर बिस्वास कैरिके जु ज्ञान मितैं मिलदु मि वेका मुताबिक ही बात करदु। अर यू सब त वेका पिछनै अटल ह्‍वेके चलण से मिलदु। अर ना ही मि ईं दुनियां का ज्ञानी अर अधिकारी लोगु का जन बात करदु। पर सुणा, ईं दुनियां का अधिकारीयों को अधिकार खतम होण वळु च।

गढवली नयो नियम

⁶ फिर भि मि ऊं लुखुं का बीच ज्ञान का संदेश कु प्रचार करदु जु आत्मिक रूप मा मजबूत च; पर यु सांसारिक ज्ञान अर राज्यपालों का ज्ञान जन नि; ज्यांको नाश हूंण वलो च।

1 कुरिन्थि 2:6 Referans Kwoze

इब्रानी 5:14

पर अन्‍न त बड़ा लोगु खुणि च, जु कि अपणा जीवन का तजुर्बो का द्‍वारा भलै अर बुरै का बीच मा फरक कैरी सकदिन।

याकूब 3:15

अर यू सब करण को ज्ञान परमेस्वर की तरफा बटि नि औन्दु, बल्किन मा दुनियां को च। अर उ आत्मिक नि च बल्किन मा शैतान को ज्ञान च।

2 कुरिन्थि 4:4

अर इन वु इलै बुल्दिन किलैकि ईं दुनियां मा शैतान न बिस्वास नि करण वळा लोगु का दिमाग तैं बन्द कैरियाली। अर वु ऊंतैं शुभ समाचार की महानता तैं स्वीकार करण से रुकदु, किलैकि उ नि चान्दु कि लोग इन जाणा कि यीशु मसीह कथगा महान च अर पिता परमेस्वर को ही रुप च।

1 पतरस 5:10

इलै अब जु दुख-तकलीफ तुम कुछ देर खुणि सौणा छाँ, वे कष्‍ट बटि पिता परमेस्वर तुमतै भैर निकळळु, अर तुमरा बिस्वास की बुनियाद तैं और भि जादा मजबूत अर पक्‍कु करलु, किलैकि पिता परमेस्वर ही च, जु कि अपणी पूरि किरपा करदु अर वेन ही तुमतै यीशु मसीह का द्‍वारा मिलण वळा आदर-सम्मान मा अपणा पास बुलयूं च, जु कि सदनि को च।

1 कुरिन्थि 2:8

अर ये जमना मा राज करण वळा लोगु न वे ज्ञान का बारा नि जाणि, किलैकि अगर वु जाणि जान्दा, त महान प्रभु यीशु तैं क्रूस पर नि चड़ौन्दा।

कुलुसी 4:12

अर तुमरा इखो इपफ्रास भै भि जु कि यीशु मसीह को सेवक च, उ भि तुमकु सलाम बोन्‍नु च। अर उ मन लगै के तुम खुणि हमेसा प्रार्थना कनु रौन्दु, ताकि तुम हरेक बात मा सिद्ध ह्‍वे सैका अर यीशु मसीह पर पूरु बिस्वास कैरिके परमेस्वर की मनसा तैं पूरि कैरी सैका।

इफिसुस 2:2

बल्किन मा वे बगत त तुम ईं दुनियां का मुताबिक अपणा जीवन तैं बुरै का मुताबिक चलौन्दा छा, अर आसमान पर सासन करण वळा शैतान की बातों तैं मणदा छा। अर आसमान पर सासन करणु वळु वु बुरु आत्मा आज भि ऊं लोगु का जीवनों मा काम करदु, जु आज्ञा को पालन नि करदिन।

मत्ती 5:48

इलै तुम खरु मनखि बणा, जन स्वर्ग मा रौण वळु तुमरो पिता परमेस्वर खरु च।”

2 कुरिन्थि 1:12

अर हमतै ईं बात पर गर्व च अर हमरु जमीर भि ईं बात की गवै देन्दु, कि ईं दुनियां मा खास कैरिके तुमरा बीच मा हमरु सभौ पिता परमेस्वर का लैख पवित्र अर सच्‍चु छौ। अर यू सब हमुन ईं दुनियां से मिलण वळा ज्ञान का मुताबिक नि कैरी, बल्किन मा पिता परमेस्वर की किरपा पर भरोसा रखी के कैरी।

याकूब 3:2

किलैकि हम सभि लोग भौत बार भूल-चूक कैरी देन्दयां। पर अगर कुई मनखि अपणा बोन्‍न मा भूल-चूक नि करदु, त उई खरु मनखि च। अर उ अपणा पूरा सरील तैं भि अपणा वश मा रखी सकदु च।

2 कुरिन्थि 13:11

हे मेरा भै-बैंणो, अब मि आखिरी मा तुमकु इन बोन्‍न चान्दु कि तुम खुश रा, अर अपणा-अपणा चाल-चलन मा हरेक दिन सुधार ला, अर जु-जु काम करणु कू मिन तुमकु बोलि ऊंतैं पूरु कैरा। अर एक-दुसरे की बात तैं स्वीकार कैरा अर एकजुट ह्‍वेके रा, अर एक-दुसरा का दगड़ा मा शान्ति से रा। अर पिता परमेस्वर तुमतै एक-दुसरा का दगड़ा प्यार करण मा, अर शान्ति से जीवन जीण मा पूरि मदद करलु।

1 कुरिन्थि 14:20

हे मेरा भै-बैंणो, तुम अपणी सोच तैं छुटा बच्‍चों की तरौं नि बणा, बल्किन मा समझदार बणा। अर अगर जु तुम बच्‍चों की तरौं ही बणण चन्द्‍यां, त बुरै खुणि बणा। अर या बात मि इलै बोन्‍नु छौं, किलैकि बच्‍चा कै की बुरै का बारा मा नि सोचदिन। अर जख तक पिता परमेस्वर की खासियत का बारा मा बात च, त तुम लोग स्यांणा लोगु की तरौं सोच रखा।

1 कुरिन्थि 2:13

इलै जब हम यों सब बातों तैं बतौन्द्‍यां त मनखि का ज्ञान का मुताबिक ना, बल्किन मा पवित्र आत्मा का द्‍वारा दियां ज्ञान का मुताबिक ही परमेस्वर का राज की बातों का बारा मा बिंगौन्द्‍यां।

1 कुरिन्थि 2:1

हे मेरा भै-बैंणो, जब मि पैलि बार तुमरा पास ऐ छौ, त पिता परमेस्वर की योजना का मुताबिक मिन वेका राज्य की बात तुमतै अपणा ज्ञान अर चालाकी से नि बतै।

लूका 16:8

तब सेठ मनखि न वे अधरमी कर्ता-धर्ता की पुलबै कैरी, किलैकि वेन बड़ी चकड़ैति से काम कर्युं छौ।” अर यीशु न बोलि, “ईं दुनियां का लोग अफ दगड़ा का लोगु से लेण-देण का मामला मा आत्मिक लोगु से जादा चकडै़त होनदिन।

मत्ती 19:21

यीशु न वेकू बोलि, “अगर जु तू हरेक बात मा सिद्ध होण चान्दी त जा, अपणी जैजाद बेचि दे अर वे बटि जु कुछ भि मिललु वु सब गरीबों मा बांटि दे, अर मेरु चेला बणि जा। अर सुण, त्वेतै स्वर्ग मा खजाना मिललु।”

मत्ती 13:22

अर झिबलांणो मा पोड़यां बीज का दगड़ा मा जु कुछ भि ह्‍वे, उ इन च कि कुछ लोग परमेस्वर का वचन तैं सुणदा त छिन, मगर ईं दुनियां मा जीवन की चिन्ता-फिकर, अर धन-दौलत को लालच वे वचन तैं दबै देन्दिन, इलै वे पर फल नि लगदिन।

1 कुरिन्थि 3:1

हे मेरा भै-बैंणो, जब मि तुमरा इख छौ, त मिन तुमतै यीशु मसीह की सच्‍चि शिक्षा का बारा मा वे तरीके से नि बतै जन मि ऊंतैं बतौन्दु, जु लोग बिस्वास मा मजबूत छिन अर जौं का पास पवित्र आत्मा को दान च। मगर मिन देखि कि तुम लोग अभि भि दुनियां की बातों पर ही चलद्‍यां, इलै मि तुमतै बच्‍चों का जन बिंगौन्दु।

1 कुरिन्थि 12:8

जन कि कुछ लोगु तैं पवित्र आत्मा का द्‍वारा ज्ञान कि बात करण को बरदान मिल्यूं च, त कुछ लोगु तैं पवित्र आत्मा बटि समझौणु खुणि अकल मिली च।

2 कुरिन्थि 4:3

अर जु लोग ये शुभ समाचार तैं स्वीकार नि करदिन वु विणास का बाटा पर चलणा छिन, किलैकि ऊ लोग इन नि मणदिन कि जै शुभ समाचार को परचार हम करद्‍यां वेमा ऊंकी ही भलै च।

कुलुसी 1:28

अर वे ही मसीह को परचार हम लोग करद्‍यां अर लोगु तैं चितै देन्द्‍यां, अर हरेक मनखि तैं अपणा पूरा ज्ञान से सिखौन्द्‍यां, ताकि हरेक मनखि तैं एकदम सिद्ध बणै के पिता परमेस्वर का समणि खड़ु कैरी सैका।

इब्रानी 6:1

इलै हे मेरा दगड़्यों, आ, अर जु कुछ भि हमतै यीशु मसीह का बारा मा पैलि सिखये गै हम वीं ही शिक्षा मा नि बणयां रा, बल्किन मा बड़ा होण का नाता और भि जादा अगनै बढा अर मजबूत होन्दी जा। अर अब तुमतै यू सब बात बतौण की जरुरत नि छिन कि आखिर हमतै वु सब काम किलै छुड़ण चयेणा जु कि मौत कि तरफा लेके जनदिन, अर हमतै पिता परमेस्वर पर किलै भरोसा रखण चयेणु।