1 कुरिन्थि 10:11 - Garhwali

¹¹ अर यू सब बात ऊंका दगड़ा ह्‍वेनि, ताकि वु सभ्यों खुणि एक उदारण बणि जा। अर येका बारा मा पवित्रशास्‍त्र मा भि लिख्यूं च, ताकि हम इन नि कैरा जन ऊंन कैरी, किलैकि हम दुनियां का वे बगत मा जीण छां, जु कि आखिरी को बगत च।

गढवली नयो नियम

¹¹ पर यु सब बात, जु ऊंल दगड़ी हवे, ऊं तैं चितांण की रीति पर हवे छै; अर उ हम तैं चितांण कु जु ईं दुनिया का अंत का बगत मा रौंणा छिनी लिखै गैनी।

1 कुरिन्थि 10:11 Referans Kwoze

रोमियों 15:4

अर जु कुछ भि पुरणा जमना मा पवित्रशास्‍त्र मा लिखे गै, उ सब हमतै सिखौणु खुणि ही लिखे गै। अर पवित्रशास्‍त्र हमतै सबर रखण अर अपणु हौसला बणै के रखण का बारा मा ही बतौन्दु, ताकि हमरि आस बणि रौ।

रोमियों 13:11

अर इन इलै कैरा किलैकि हम एक इन्द्रया बगत मा जीणा छां जु कि भौत अनमोल च। हे मेरा दगड़्यों, अब सिण को बगत नि रै गै, उठा, किलैकि बगत नजदीक ऐ गै। अर जब हमुन बिस्वास कैरी छौ, तब से लेके अभि तक हमरु बचयै जाण को बगत भि और नजदीक ऐ गै।

1 यूहन्ना 2:18

हे मेरा बच्‍चों, यू त आखिरी को बगत च अर जन कि तुमुन सुण्यालि कि यीशु मसीह को विरोध करण वळु औण वळु च, अर अगर ईं बात का मुताबिक दिखै जौ त भौत सा लोग इन ऐ गैनी, जु कि यीशु मसीह को विरोध करदिन। अर यां से हमतै इन पता चलदु कि यू आखिरी को बगत च।

1 कुरिन्थि 9:10

अरे इख मा त उ खास कैरिके हम खुणि ही बोन्‍नु च। अर यू हमरा ही खातिर लिखे गै, किलैकि जु मनखि हौळ लगौन्दु अर जु दैं करदु, वु इन उम्मीद करदिन कि हमतै अनाज मिलण।

फिलिप्पी 4:5

अर तुमरा सभौ से लोगु तैं इन पता चलण चयेणु कि तुम कथगा शान्त सभौ का छाँ। प्रभु को औण नजदीक ही च।

रोमियों 4:23

“उ धरमी गिणै गै” अर पवित्रशास्‍त्र को यू वचन केवल पितर अब्राहम खुणि ही नि च,

इब्रानी 10:25

अर एक-दुसरा का दगड़ा बिस्वासी समुदाय मा औण-जाण की संगती तैं नि छोड़ा, किलैकि तुम मा बटि कुछ लोग इन कना छिन, पर तुमतै एक-दुसरे की हिम्मत बढौण चयेणी। अर या बात मि इलै बोन्‍नु छौं किलैकि तुम जणदा छाँ कि प्रभु को वापस औण को दिन नजदीक ऐ गै, इलै इन करण मा लग्यां रा।

इब्रानी 10:37

किलैकि पवित्रशास्‍त्र मा इन लिख्यूं च कि, “जु औण वळु च उ भौत जल्द ही आलु, अर अब वु देर नि करलु।

1 कुरिन्थि 7:29

हे मेरा भै-बैंणो, मि तुमतै इन बतौण चाणु छौं कि अब बगत भौत कम च, इलै जौं को ब्यौ होयुं च ऊंतैं अपणु पूरु ध्यान अपणी जनानि और बाल-बच्‍चों पर ना, बल्किन मा परमेस्वर की सेवा मा लगौण चयेणु।

मत्ती 13:39

अर जै दुसमन न वु बीज बूति उ शैतान च। अर लवै का बगत को मतलब दुनियां को अन्त होण से च, अर ईं लवै तैं करण वळा स्वर्गदूत छिन।

मत्ती 13:40

अर जन जंगळि ग्यूँ का पौधा तैं इकट्‍ठा कैरिके आग मा ढोळि देन्दिन, ठिक उन्‍नि दुनियां का अन्त मा होलु।

रोमियों 13:12

अर जन रात खतम ह्‍वे जाण का बाद एक नयू दिन औन्दु, ठिक उन्‍नि मसीह को औण भि भौत नजदीक च। इलै अन्धेरा मा होण वळा बुरै का कामों तैं छोड़ि द्‍या, अर पिता परमेस्वर का उज्याळा मा चला, अर वेसे मिलण वळी हिम्मत तैं एक हथियार की तरौं इस्तेमाल कैरिके बुरै पर जीत हासिल कैरा।

1 कुरिन्थि 10:6

अर वु सभ्या का सभि हम खुणि एक उदारण बणि गैनी, कि हमतै इन्द्रयो मनखि नि बणण चयेणु जु कि बुरी बातों की इच्छा रखदु हो।

गलातियों 4:24

अर गुलाम अर आजाद करण वळी बातों को मतलब यों दुई जनानियों से सीखा, किलैकि यू दुई जनानियां दुई करार को चिन्‍न छिन। पैलु चिन्‍न हाजिरा च ज्वा कि नौकराणि छै अर वींका द्‍वारा पैदा होयुं बच्‍चा गुलाम ही च, ठिक उन्‍नि पैलु करार भि च जु कि सीनै नौ का पाड़ पर दिये गै, अर वेको पालन करण वळा लोग गुलामी मा ही पैदा होनदिन।