Yuheeri 2:10 - Kifuliiru

¹⁰ Ikyanya biri mu yegeera, idaho liri mu yami jugumba, di-di-di! Kiri niꞌgulu, liri mu lenga mweꞌkinyukura. Izuuba noꞌmwezi, binazinge ikihulu, Kiri neꞌndonde, zinayami zima.

Yuheeri 2:10 Referans Kwoze

Mataayo 24:29

«Yizo siku za kahenabwera, mango zamala, izuuba ligayami yidika mweꞌkihulu, noꞌmwezi gutagaki tanguula. Kiri neꞌndonde zigakizi tibuka! Ee! Íbiri kwiꞌgulu byoshi bigajugumbana.

Hisaaya 13:10

Indonde íziri kwiꞌgulu, zigayidika mweꞌkihulu. Kiri niꞌzuuba, ikyanya ligaboneka, nalyo ligayami yidika mweꞌkihulu, kuguma noꞌmwezi.

Zaburi 18:7

Ikyanya nâli gweti ngalibuuka, nanatabaaza Nahano. Ee! Nꞌgatabaaza Rurema wani, kwo atuuziri mu nyumba yage. Haaho ngana, ikyanya ngi gweti ngaalira, ananyuvwa.

Mikolezi 2:20

Izuuba ligahinduka kihulu. Noꞌmwezi gugadukula nga muko. Yibyo byoshi, byo bigatee koleka, ikyanya ulusiku luhamu lwoꞌbulangashane bwa Nahano lutazi hika.

Bwigule 6:12

Ha nyuma, Ikyanabuzi kyananunguula inungu ya kalindatu. Lyeryo mu kihugo, mwanalenga sizigirye woꞌmusisi. Izuuba lyanayulubala, lyanashushaga nga busuuzu úbukalukwa mu bwoya bwoꞌmukara. Noꞌmwezi gwanadukula nga muko.

Yeremiya 4:23

Nie Yeremiya, ikyanya nꞌgalangiizagya mu kihugo, nanabona kwo kikola kimaata. Kiri niꞌgulu, ikyanya nꞌgalibona, ndaagwo mulengeerwe úguliri kwo.

Bwigule 8:12

Umuganda wa kana naye, anadihiriza ikyeꞌmwage. Lyeryo ikihande kiguma kya kashatu kiꞌzuuba kyanatutumbwa, halinde ikihande kiguma kya kashatu kyoꞌmulege-rege kyanaba kihulu. Ikihande kiguma kya kashatu kyoꞌmwezi na kyeꞌndonde nabyo byanatutumbwa! Halinde ikihande kiguma kya kashatu kyoꞌbushigi kyanabula umulengeerwe gwakyo.

Nahumu 1:5

Hiꞌgulu lya Rurema, imigazi iri mu shagala, noꞌtugangazi tunajongoloke, tunanyerere. Ikihugo kiri mu jugumbana imbere lyage, kuguma na booshi ábatuuziri mwo.

Hisaaya 34:4

Igulu ligabungwa-bungwa, nga kwo bali mu bunga ikitaabo kibungirize. Indonde íziryagagi kwiꞌgulu zooshi, zinajongoloke, zinayume nga bibabi byeꞌmilandira, kandi iri nga bishulu byumu byoꞌmutiini. Zooshi zinabugumukire mu kihugo.

Zaburi 114:7

E kihugo, ukizi juguma imbere lya Nahano. Ukizi juguma imbere lya Rurema wa Yakobo.

Mataayo 27:51

Mu nyumba ya Rurema, mwâli manisirwi umulondo, úgwâli giziri ikisiika. Lyeryo, gulya mulondo gwanayami lalaanuka mwo kubiri, ukulyokera hiꞌgulu halinde haashi. Na kwakundi, ikihugo kyanajugumba. Kiri naꞌmabuye, ganabereka.

Hamoosi 5:8

Nahano ye kalema ikiso kyeꞌndonde íkiri mu buuzibwa Kirimya, neꞌHoryoni. Anagweti agalyosa ikihulu, mu kutanguula izuuba. Izuuba nalyo, mu kabigingwe ali mu lihindula kihulu. Kiri naꞌmiiji ga mu nyaaja mbamu, ali mu gakuumania, anashubi gayonera mu kihugo nga nvula. Iziina lyage, ye Nahano!

Yuheeri 2:2

Yulwo lusiku, luli mweꞌkihulu kya namudidi, lunali lweꞌbibungu bizito. Aaho! Langiizi ngiisi kweꞌkiso kihamu kyeꞌbizimu kiri mu hika. Kigweti kigayija ngana, nga kwiꞌzuuba liri mu tunduuka shesheezi. Yibyo bizimu, biri kandaharuurwa, binali neꞌmisi bweneene. Yiryo igambo, litazindi boneka, litanâye shubi boneka!

Bwigule 20:11

Nanabonaga ikitumbi kihamu kyoꞌbwami, kyeru pepeepe! Nanabona na úwâli kibwatiiri kwo. Ikihugo niꞌgulu byanayami nyerera imbere lyage. Mukuba, hatakaki boneka ho bigabeera.

Bwigule 9:2

Iri ikakifuunulaga, mwanayami tutumuka ikyusi kingi bweneene, nga kya kiberekaana kyoꞌmuliro. Kirya kyusi, kyanazinga mu kyanyaanya, halinde izuuba neꞌkyanyaanya, byanayidika kweꞌkihulu.

Hisaaya 5:30

Yulwo lusiku, bagalundumira abagoma, nga midunda ígweti igayibirindula mu nyaaja. Hooshi mu kihugo, abandu bagaabona ikihulu naaho naꞌmalibu. Umulengeerwe gugayidika mweꞌkibungu.

Yuheeri 3:4

Izuuba ligahindukaga kihulu. Noꞌmwezi gugadukula nga muko. Yibyo byoshi, byo bigatee koleka, ikyanya ulusiku luhamu lwa Nahano lutazi hika, lunali lweꞌkihuumula.