Yeremiya 16:18 - Kifuliiru

¹⁸ Yibyo byaha byabo, ngabiyihoola ubugira kabiri. Mukuba, keera bayulubaza ikihugo kyani, mu kukiyijuza mweꞌmigisi. Iyo migisi, si iryagagi nga birunda, bwo itali mwoꞌbugumaana! Inali mu yagazania bweneene!»

Yeremiya 16:18 Referans Kwoze

Hisaaya 40:2

Yabo bandu beꞌYerusaleemu, mubamenyeese bwija-bwija, kwoꞌbuja bwabo keera bwamala, keera banakogwa ibyaha byabo. Ee! Ibyaha byabo byoshi-byoshi, keera Nahano akabahaniiriza hiꞌgulu lyabyo ubugira kabiri.»

Bwigule 18:6

Ngiisi kwo kakagirira abandi, kube kwo niinyu mugakagirira, kiri noꞌbugira kabiri kaakwo.

Hezekyeri 11:21

Halikago, ngiisi ábaloziizi ukukolera imigisi yoꞌkuyagazania, boohe ngabahaniiriza, ukukulikirana neꞌmikolezi yabo mibi.» Kwokwo, kwo Rurema Nahamwitu adesiri.

Yeremiya 17:18

Balya bandu, bagweti baganvindagaza. Aaho! Ubateezagye ishoni. Si ndabe nie ugaziteeza. Boohe, babe bo ugaleeza mweꞌkinyukura. Si ndabe nie gakilenga mwo! Balya bandu, ukizi bahaniiriza, unabazimiize lwoshi.

Yeremiya 2:7

Nꞌgabaleeta mu kihugo íkiyeziri, gira bakizi lya mweꞌbitumbwe, kiri neꞌbije-bije byamwo. Halikago, yikyo kihugo kyani, iri bakakihikaga mwo, banakiyulubaza, halinde kyanakizi neenwa.

Hezekyeri 11:18

Na mango mwaba keera mwakigalukira mwo, imigisi yoshi yo mugagwana mwo, mukayami gilyosa.

Yeremiya 3:9

Ikyanya Abahisiraheeri bâli kizi yiyulubaza mu bushule, batâli kizi yiyubaara. Si bâli genderiiri ukukizi yikumba imigisi, kundu ikabaajwa mu mabuye naaho, na mu biti.

Hisaaya 61:7

Nahano adeta kwokuno: «Abandu baani, kundu abagoma bâli kizi bateeza ishoni, halikago, bagaki longa ibindu bingi ubugira kabiri, banashambaalire ubuhyane bwabo. Ee! Bagahaabwa amahyane gabiri, halinde banashambaale imyaka neꞌmyakuula!

Mika 2:10

Aaho! Yimuki, mulyokage hano! Kino kihugo kitakiri kyeꞌmwinyu, mutaganaki kiluhuuka mwo. Si keera mukakiyulubaza, kinakoli lindiriiri naaho ukushereezibwa!»

Hisaaya 24:5

Abandu ábatuuziri mu kihugo, keera bakiyulubaza. Bataki simbahiri imaaja za Rurema, batanaki mútwaziizi. Kundu bakanywana ikihango na Rurema, kyanâli kyeꞌmyakuula, haliko bakakihongola.

Zaburi 106:38

Yabo baana, ndaabwo buhube bwo bakagira. Kundu kwokwo, ababusi baabo banakizi yona umuko gwabo. Neꞌkyanya bâli gweti bagatanga ituulo imweꞌmizimu yeꞌKaanani, lyo bakayulubaza ikihugo, kyanaba mwoꞌbwitani.

Balaawi 26:30

Bwo ngaaba ngoli mùjinikiiri, ngamùsheregeza ho mugweti mugayikumbira imizimu. Kiri noꞌtutanda two muli mu giyokera kwoꞌmubadu, ngatuhongola. Ibirunda biinyu, ngabilasha ku migisi yinyu ífwiri namunyogo.

Hisaaya 65:6

Lolagi! Keera nayandika hano kwokuno: “Ndagahulika! Si ngayihoola ngana!

Yeremiya 7:30

Nahano ashubi detaga kwokuno: «Abayuda bagweti bagaagira íbitali nga byo imbere lyani. Na kundu nꞌgatoola inyumba yani, kwo ngizi yikumbirwa mwo, haliko keera bakagiyulubaza mu kugibiika mweꞌmigisi yoꞌkuyagazania.

Yeremiya 44:4

Nâli kizi mùtumira abakozi baani abaleevi, ti: “Ngiisi byo muli mu kola, binyagaziizi. Ku yukwo, mubitwikirage kwo!”

Hezekyeri 5:11

Nga kwo nyamiri ho, nie Rurema Nahamwinyu nakyula kwokuno: Bwo keera mukayulubaza inyumba yani, ku njira yoꞌkugibiika mweꞌmigisi, neꞌbindi íbiri mu yagazania, naani ndagaki mùkejeerera, ndaanaye ugatoloboka.

Hosheya 9:7

E Bahisiraheeri! Isiku zo mugaahanwa kwo, keera zahikaga. Kikola kyanya kyoꞌkuyihoola ibyaha biinyu. Yizo siku, mwe Bahisiraheeri mukwiriiri muzimenye bwija! Bweꞌbyaha biinyu bikoli luguusiri, munakoli shombiini bweneene, kyo kitumiri mugweti mugaadeta kwokuno: «Si abaleevi bakoli sirehiri! Abakozi ba Rurema, bakola mu deta íbitali nga byo!»

Hisaaya 65:7

Ee! Ngayihoola ibyaha byabo, halinde kiri neꞌbyaha bya bashokuluza baabo. Si bâli kizi yokera imizimu yabo umubadu ku migazi, na ku tugangazi, banâli kizi ndeegeza heꞌshoni. Kwokwo, ngabahana nga kwo bibakwaniini, ukukulikirana na kwo bâli kizi gira yaho keera.” Kwokwo, kwo nie Nahano ndesiri.»

Hezekyeri 36:18

Kwokwo, nꞌgabahana ku buraakari bwani. Mukuba, bâli kizi yitana, banakizi yulubaza neꞌkihugo kyabo mu kuyikumba imigisi.