Nahumu 1:6 - Kifuliiru

⁶ Ikyanya Nahano ali mu shavura, nyandagi úwangaki labuka imbere lyage? Uburaakari bwage, ikyanya buli mu ba bukoli yasiri, nyandi úwangaki sigala? Uburaakari bwage, buli mu siriiza ngana-ngana. Kiri naꞌmaala, gagweti gagabereka imbere lyage.

Nahumu 1:6 Referans Kwoze

Yeremiya 10:10

Kundu kwokwo, Nahano naaho, ye Rurema woꞌkuli. Yehe, ye Rurema úli mugumaana, anali ye mwami weꞌmyaka neꞌmyakuula. Ikyanya ali mu raakara, ikihugo kiri mu yami jugumbana. Yubwo buraakari bwage, ibinyamahanga bitangabuyigenderera.

Malaki 3:2

Aahago! Ikyanya Nahano agatuyijira, nyandi ugaki gooyera? Mango ahulukaana, nyandi úgaki shobola ukuyimanga? Si agaaba akola ngoꞌmuliro úgugweti gugashuka ikyuma! Agaanaba nga saabuni ngayu yoꞌkufula mwoꞌmulondo.

Nahumu 1:2

Nahano Rurema alyagagi munaluugi, anagweti agayihoola. Ikyanya abagoma bagweti bagahagana naye, ali mu bahaniiriza ku buraakari bwage. E ma! Balya bagoma, ayamiri abarakariiri, anagweti agabayihoola.

Zaburi 76:7

E Rurema wa Yakobo, ikyanya ukazikanukira, ifwarasi zaabo zanayami fwa kuguma na ábâli zishoniri kwo.

Hezekyeri 30:16

Ee! Ngajigiivya ikihugo kyoshi kyeꞌMiisiri. Abandu beꞌSiini bagateerwa neꞌkyoba kingi bweneene. Inzitiro zeꞌMefiisi zigahongolwa. Naꞌbandu baayo, bagakizi shenguka.

Kimombo 4:11

Ikyanya Nahano âli koli shavwiri, anayami mwagula uburaakari bwage mu bandu baage. Anayasa umuliro mu kaaya keꞌSayuni, kanajigimba, halinde ku ndaliro zaako.

Kimombo 2:4

Nahano akateera abandu baage, mu kubafworera kwoꞌmuheto, nga kwo angateera umugoma. Na kundu imisore yabo yâli nonosiri, akakoleesa ubushobozi bwage, mu kugiminika. Ku buraakari bwage, akayami mwagula umuliro, mu kuyokya akaaya kaage keꞌSayuni.

Hisaaya 27:4

Iyo ndalo, ndakiri mu girakarira. Kundu kwokwo, iri nangagigwana mweꞌmigenge neꞌmihanda-njovu, yoki, ngayiji gilwisa, halinde na ngisingoole.

Hisaaya 10:16

Aahago! Nahano woꞌbushobozi bwoshi agatumira abasirikaani beꞌHasuriya ikiija kyoꞌkubajaavya. Kwokwo, ubukalage bwabo, bugamalira mu muliro.

Zaburi 90:11

Aaho! Nyandagi úwangasobanukirwa ngiisi kwoꞌburaakari bwawe bubambiri bweneene? Yubwo buraakari bwawe, ngiisi kwo buli buhamu, kwo na kwokwo abandu bakwiriiri bakizi kuyoboha bweneene.

Zaburi 2:12

Ulya muluzi wage, mukizi múfukamira, gira atayagalwe. Mukuba, hali ikyanya uburaakari bwage, bwangayami yaka, munayiji kengeera mwashereezibwa, munakiri mu njira. Bahiriirwi, ngiisi ábagatibitira Nahano, gira akizi balanga.

1 Baami 19:11

Nahano anamúbwira: «Hulukaga mu lwala. Uyimange kwiꞌrango imbere lyani. Mukuba, ngola ngalenga ho.» Lyeryo, Nahano mbu alenge, imbuusi yoꞌmubangami yanahuusa. Iyo mbuusi yanamoola imigazi, yanakunyula neꞌmikungubwe. Kundu kwokwo, yugwo mubangami, Nahano atâli guliiri mwo. Ikyanya iyo mbuusi ikahooha, mu kihugo mwanalenga sizigirye woꞌmusisi, gigi-gigi! Si yugwo musisi, Nahano átâli guli mwo.

Bwigule 16:8

Umuganda wa kana, naye anamwaguliraga íbiri mu mutanga gwage kwiꞌzuuba. Izuuba lyanahanguulwa kwo likizi yokya abandu.

Bwigule 16:1

Mu nyumba ya Rurema, mwanayiberekaania izu, lyanabwira yabo baganda balinda kwokuno: «Uburaakari bwa Rurema, úbuli mwiꞌyo mitanga irinda, mugendi bumwagulira mu kihugo!»

Bwigule 6:17

Mukuba, ulusiku lwo bagayerekana kwoꞌburaakari bwabo, keera lwahikaga. Ndaanaye úwangaluyitega!»

Hayubu 40:11

Uyerekane uburaakari bwawe imbere lyaꞌbandu. Ulole umunabwikangaate, unamúgwise.

Zaburi 130:3

E Nahano, iri wangakulikiriza ibyaha biitu, nyandagi úwangaki yimanga imbere lyawe?

Hisaaya 13:13

«Nie Nahano woꞌbushobozi bwoshi, bwo ngoli rakiiri, ngashagania igulu. Kiri neꞌkihugo, ngakijuguuvya, kishaagage ku ndaliro zaakyo.

Hisaaya 66:15

Lolagi! Nahano akola mu yija alyagagi noꞌmuliro, gira ayiji yerekana uburaakari bwage. Amagaare gaage giꞌzibo, gali mu yija mulindi nga kihuhuuta. Ku yikyo kyanya, imbigi zoꞌmuliro zigaminika abandu.

Hezekyeri 7:8

Buno, ngola ngamùhaniiriza ku buraakari bwani. Ee! Ngamùhana ngana-ngana, bwo mwâli kizi gira ibitalaalwe, halinde mwananyaagaza bweneene.

Hezekyeri 21:31

«Nie Rurema Nahamwinyu nadetaga kwokuno: Umulondo gwawe gwoꞌkusoosa kwiꞌtwe, noꞌlushembe lwawe lweꞌkyami, bagakuhogola byo. Mukuba byoshi bigahinduka. Ngiisi ábashuba bakulu, bakola bagabiikwa haashi. Na ábashuba bagunda, bo bakola bagakuzibwa!

Hezekyeri 39:6

Ikihugo kyeꞌMagoogi, ngakiduulika mwoꞌmuliro, gunajigiivye kiri naꞌbatuulaga booshi ba mu tulira, kundu bajeberiiri. Kwokwo, lyo booshi bagaamenya ku kasiisa kwo nie Nahano.

Sefaniya 2:2

Buzira kwokwo, mugayehuulirwa hala nga byula. Mugire mukuumane, ku kyanya uburaakari bwa Nahano butazi mùhikira. Mukuba, ukumùhana, agamùhana ku buraakari bwage!

Hayubu 9:5

«Ikyanya Rurema ali mu bungiisa amalambo, ndaaye úli mu tee kengulwa. Yago malambo, ali mu gabalandula-balandula ku buraakari bwage.

Hayubu 26:11

Ikyanya Rurema ali mu kanukirana, lyeꞌnguliro ziꞌgulu ziri mu soomerwa, zinakizi juguma.

Zaburi 76:8

E Rurema, ikyanya uli mu ba urakiiri, nyandi úwangagira mbu ayimange imbere lyawe? Ndaaye gundi ye tukwaniini ukuyoboha.

Hisaaya 33:14

Abanabyaha ba mu Sayuni, batatwaziizi Rurema. Kyo kitumiri bakoli yobohiri, banakola mu juguma. Bali mu deta, ti: «Yugu muliro, si guli mu jigiivya ngana-ngana! Aahago! Nyandagi úwangaki tuula ho? Si guyamiri guli mu yaka bweneene. Aaho! Nyandagi úwangaki guyigooyera?»

Kimombo 2:3

Ikyanya Nahano akashavuraga, anayami vuna-vuna imisi yaꞌBahisiraheeri. Kyo kitumiri abagoma bakabateera, atanatami bashwira mbu abatabaale. Yabo bandu baage, anayami basingoola mu muliro, halinde ikihugo kyabo kyoshi, anakijigiivya.