Mika 7:11 - Kifuliiru

¹¹ E Bahisiraheeri! Mu siku ízâye yije, inzitiro za mu twaya twinyu zigashubi yubakululwa. Kiri neꞌmbibi zeꞌkihugo kiinyu zigayajabulwa.

Mika 7:11 Referans Kwoze

Nehemiya 2:8

«Nangalooza naꞌgandi maruba goꞌkutwalira Hasafu, umulaazi woꞌlubako lwa mwami, gira ambeereze ibiti. Yibyo biti, nangakizi bikoleesa mu kulingaania inyiivi zoꞌluzitiro, hoofi neꞌnyumba ya Rurema, kiri neꞌnyumba yo ngatuula mwo. Na nyubakulule neꞌnzitiro zaꞌkaaya.» Ikyanya nꞌgahuuna yago maruba, mwami anagambeereza. Mukuba, Rurema âli kizi ngashaanira.

Hisaaya 54:11

«E Yerusaleemu, uli muhanya ngana. Yoho wee! Ukola mu yehuulwa-yehuulwa neꞌkihuhuuta, ndaanaye mundu úkakuholeeza. Kundu kwokwo, ngola ngakuyubakulula naꞌmabuye geꞌkishingo bweneene. Indaliro zaawe zigayubakwa naꞌmabuye miija geꞌsafiiri.

Nehemiya 4:6

Abayahudi baguma ábâli tuuziri hoofi-hoofi na yabo bagoma, banatuhikira ubugira kali ikumi, mu kuyiji tukengula, ti: «Kundu twangatibita, yabo bagoma bagayiji tuteera naaho.»

Nehemiya 4:3

Iri tukayuvwa kwokwo, twanahuuna Rurema witu. Na kwakundi, twanabiika abalaliizi, gira bakizi tukingira abagoma biitu ubushigi niꞌzuuba.

Nehemiya 2:17

Ha nyuma, nanababwira: «E balya, ku kasiisa mubwini ngiisi kwo tukola mu libuuka. Kano kaaya keꞌYerusaleemu kakola biguuka. Neꞌnyiivi zaako, keera zikasiriizibwa. Aahago! Zino nzitiro zeꞌYerusaleemu, tushubi ziyubakulula, gira tutashubi gayirizibwa.»

Danyeri 9:25

«“Aaho! Umenyage, unasobanukirwe. Ukulyokera ku kyanya bagakyula kwaꞌkaaya keꞌYerusaleemu kashubi yubakululwa, halinde ku kyanya kyoꞌlya mutwali úkashiigwa amavuta agayijira kwo, hakwaniini habe imyaka makumi gana na mwenda. Hanakulikire neꞌgindi myaka magana gana na makumi gashatu niꞌna. Haaho ho yako kaaya keꞌYerusaleemu kagashubi yubakululwa, kanabe neꞌnjira mbamu, kanazitirwe. Kundu kwokwo, ku kyanya kagayubakwa, hagaaba hakola amakuba mingi.

Hisaaya 54:2

Ufinduulage iheema lyawe. Uyushuule imirondo yalyo, halinde iyajabuke. Utakolwe kwo wayihangirira. Si ulaahye imigozi yalyo. Neꞌmisumaari yalyo, ugisindagire.

Hisaaya 58:12

Birya biguuka biinyu, mugashubi biyubakulula. Muganayubakululira ku zeezirya ndaliro za kare. Munabe mumenyekiini kwo mwe mukayubakulula inzitiro zeꞌbiguuka, na kwo mwe mukalingaania injira za mu kaaya.»

Hisaaya 61:4

Utwaya útusigiiri biguuka, leero bagatuyubakulula. Na kundu twâli koli maziri imyaka mingi tusibiri, si bagatushakuulula.