Hezekyeri 7:19 - Kifuliiru

¹⁹ Ifwaranga zaabo, kiri neꞌnooro, bagazikabulira mu njira, nga kindu íkikoli yulubiiri. Ehee! Ku lusiku lwo Nahano agabarakarira kwo, ifwaranga zaabo neꞌnooro zitagabakiza. Batanganabikoleesa, mu kuyiliisa, bitaganabayigusa. Si yibyo byoshi, byo byâli kizi bahubiisa.

Hezekyeri 7:19 Referans Kwoze

Sefaniya 1:18

Yulwo lusiku, Nahano agaaba akoli barakariiri bweneene, batanaki kizibwe, mbu bwo batanga ifwaranga kandi iri inooro. Mukuba agaaba akoli yuvwiti uluugi ngana, halinde ikihugo kyoshi kinasingooke. Ee! Agaamala abandu booshi ba mu kihugo!

Migani 11:4

Kundu umundu angaba ali noꞌbugale, si ku lusiku lwoꞌkufwa, butamúhitiiri kamaro. Haliko, umundu úkwaniini, yehe, ali mu kizibwa mu lufu.

Hezekyeri 14:7

«“Abahisiraheeri kandi iri ibinyamahanga íbibatuuziri mwo, hali ikyanya baganyilyosa kwo, banakizi yikumba imigisi, halinde banayidulumbike lwoshi mu byaha. Aaho! Iri bangayijiraga umuleevi, mbu balonge igambo imwani, niehe nienyene ngabashuvya.

Hisaaya 2:20

Kundu abandu bâli mali tula imigisi mu harija, na mu nooro, haliko yulwo lusiku, iyo migisi igagendi kabulirwa áhali imbeba na banajoojo.

Mataayo 16:26

Umundu, iri angalonga íbiri mu kihugo byoshi, anayiteere yenyene, bikagi byo agaaba ayunguka? Na biki byo angatanga, lyo ayikiza? Si ndaabyo!

Hezekyeri 44:12

Haliko, nie Rurema Nahamwinyu nashiikiza kwo yibyo byaha byabo babihanirwe kwo. Mukuba bo bakakizi yimangira Abahisiraheeri mu kuyikumba imigisi, banakizi bashimya ukugira ibyaha.

Mwigiriza 5:10

Ibindu, iri byangayushuuka, abandu boꞌkubilya, nabo bali mu yushuuka. Aahago! Mwene yibyo bindu, bikoli múhitiiri akamaro kaki, ha nyuma naaho lyoꞌkukizi bihenekera?

Hisaaya 55:2

Kituma kiki mukiri mu tanga ifwaranga ku bitagaliibwa? Na kituma kiki mukiri mu yitubanula ku bitagamùmala isabwe? Aaho! Mundegage amatwiri, lyo mulya ibyokulya binunu, halinde imitima yinyu ihesherwe.

Hisaaya 30:22

Kwokwo, irya migisi yinyu, mukola mugagibona kwo iyulubiiri, munagikabulire. Kundu yangaba íkatulwa mu harija, kandi iri mu nooro, mugagibwira, ti: «Muyihereere! Si mulyagagi ngiꞌjolera!»

Barumi 11:9

Dahudi naye adesiri kwokuno: «Yabo bandu, ibyokulya byeꞌsiku zaabo ngulu, bikizi ba mitego yoꞌkubagwasa, halinde bakizi yitimba haashi, banahanwe.

2 Baami 7:15

Yabo bandu banagendaga, banakulikira Abaharaamu halinde ku lwiji Yorodaani. Neꞌri bakabakulikira ngiisi kwo bapuumuka, banakizi bona ngiisi kwo bâli kizi siga bajahika imirondo neꞌbirugu byabo. Iri bakagalukira imunda mwami, banayiji múmenyeesa byoshi.

Migani 10:2

Umundu, kundu angagungana, ndaako kamaro ka ali mu longa. Haliko, ikyanya agira íbikwaniini, lyoki ali mu kizibwa mu lufu.

Kimombo 4:1

Inooro, kundu ishuba njukiirize, inashubi keyengiini, halikago keera yakulubuka. Kiri naꞌmabuye ágakeyengiini ga mu nyumba ya Rurema, keera gakashaabulwa bwalaafwe mu njira zaꞌkaaya.

Hezekyeri 13:5

Kundu inzitiro ziinyu keera zikahongoka, si mutali mu zishakuulula, mutanali mu ziba amatule gaazo. Aaho! Ikyanya nie Nahano ngayiji twa imaaja zaꞌbandu, naꞌbagoma banabe bagweti bagamùteera, kutagi kwo mwangaki bahangirira?

Hezekyeri 30:3

Ee! Yulwo lusiku keera lwayegerera. Nie Nahano ngola ngatwira abandu ulubaaja. Ku yulwo lusiku, ibibungu bigazinga, neꞌbinyamahanga binashenguke.

Sefaniya 1:3

Ngaminika abandu, neꞌnyamiishwa, noꞌtunyuni twa mu kyanyaanya, kiri neꞌfwi mu nyaaja. Ngiisi ábakoli bihuusiri, ngaasiga nabalunda nga ndundo zaꞌmabuye. Yabo bandu, ikyanya ngabaminika, batâye ki boneke mu kihugo.