Hezekyeri 5:14 - Kifuliiru

¹⁴ E Yerusaleemu! Ibinyamahanga íbimùsokaniini, bigaadeta kwo muli ba busha, binakizi mùhonyoleza.

Hezekyeri 5:14 Referans Kwoze

Hezekyeri 22:4

Mukuba, keera mwayona umuko, munali mu kizi yiyulubaza mu kuyibaajira imigisi. Kwokwo mwayegereza ulusiku lweꞌkihano, neꞌsiku ziinyu zikola mbaruure. Kyo kitumiri nꞌgaleka ibinyamahanga bikizi mùshekeereza, ti honyo!

Nehemiya 2:17

Ha nyuma, nanababwira: «E balya, ku kasiisa mubwini ngiisi kwo tukola mu libuuka. Kano kaaya keꞌYerusaleemu kakola biguuka. Neꞌnyiivi zaako, keera zikasiriizibwa. Aahago! Zino nzitiro zeꞌYerusaleemu, tushubi ziyubakulula, gira tutashubi gayirizibwa.»

Mika 3:12

Hiꞌgulu liinyu, kyo kitumiri akaaya keꞌYerusaleemu kagahingwa nga ndalo, kanahinduke biguuka! Na ngiisi ho bayubasiragi inyumba ya Nahano, hooshi, hagaamera ibishungu-shungu.

Kimombo 5:18

Umugazi Sayuni gukolaga mushaka. Imirunga naaho, yo yasigala ikola mu hinda-hinda mwo.

Kimombo 1:8

Yerusaleemu âli kizi yifunda mu byaha bweneene, na buno, akoli yulubiiri. Kundu âli kizi huuzibwa, halikago leero, akola mu negurwa! Abagoma keera bakabona ngiisi kwo akola bukondwe. Buno, akola mu gongeera, iri anayibisha hiꞌgulu lyeꞌshoni.

Kimombo 1:4

Injira íziloziri akaaya keꞌSayuni, zikoli jengiirwi. Mukuba, abandu batakiri mu zilenga mwo, mbu bashambaalire isiku ngulu, batanakiri mu lenga mu miryango yako. Abagingi baamwo bakola mu gongeera. Naꞌbanyere bakola mu bululuka. Kalya kaaya, kakola mu gooka ngana!

Yeremiya 42:18

Yeremiya anashubi deta kwokuno: «Nahano woꞌbushobozi, Rurema waꞌBahisiraheeri anadeta na kwokuno: “Keera nꞌgarakarira abandu booshi beꞌYerusaleemu. Kiri na niinyu, iri mwangagenda i Miisiri, ngamùrakarira. Abandu bagakizi mùdaaka, iri banamùhuumira. Banakizi mùtuka, noꞌkumùshekeereza, ti honyo! Na kino kihugo kyeꞌmwinyu, mutâye shubi kifina mwo.”»

Yeremiya 19:8

Kano kaaya, ngakashereeza lwoshi-lwoshi! Ikyanya abandu bagakizi lenga hoofi lyako, banabone ngiisi kwo kasigala biguuka, bagahuumirwa, banasoomerwe.

Bukengeeze 28:37

Iyo munda Nahano agamùtwala, mugahuumira abandu bweneene. Bagakizi mùshekeereza, noꞌkukizi mùhonyoleza, honyo!

Yeremiya 23:40

Abandu bagakizi mùhonyoleza, iri banamùteeza ishoni. Yizo ishoni zigaaba zoꞌkuyama ho, zitaganayibagirwa halinde imyaka neꞌmyakuula!»

Hezekyeri 6:6

«“Ngiisi twaya two mutuuziri mwo, tugahinduka biguuka. Na ngiisi ho muli mu yikumbira imigisi, hagahongolwa. Ututanda twayo, tugaashaka. Neꞌmigisi yinyu, igaki vungulwa-vungulwa, halinde inamale lwoshi. Ngiisi ho muli mu giyokera umubadu, hagahongolwa, na byoshi byo mwâli kizi kola, binashereezibwe.

Hezekyeri 12:20

Utwaya twinyu, kundu tuki yijwiri abandu, tugasigala biguuka, halinde ikihugo kinasigale kimaata. Kwokwo, lyo mugaamenya ku kasiisa kwo nie Nahano.»

Hezekyeri 16:57

Halikago buno, niinyu amahube giinyu keera gakayerekanwa ku bweranyange. Kwokwo buno, abakazi beꞌHedoomu bagweti bagamùteeza ishoni, kiri naꞌBafirisiti-kazi. Yabo booshi bakola mu mùnegura.

Hezekyeri 23:32

«Nie Rurema Nahamwinyu nadetaga kwokuno: Urusoozo lwo mukulu wawe akanywa kwo, lwo na naawe ugaanywa. Ee! Yulwo rusoozo luli luhamu, lunali lwa bukunda. Na bwo lukoli yijwiri, abandu booshi bagakuhonyoleza, honyo!

Hezekyeri 33:28

Yikyo kihugo, ngakihindula libe ishamba limaata. Noꞌbushobozi bwo bâli kizi yikangaata mwo, bugaamala. Imigazi yeꞌHisiraheeri, igaashaka, ndaanaye mundu úgagilenga mwo.

Danyeri 9:16

Yibyo byaha biitu, kuguma noꞌbuligo bwa bashokuluza biitu, byo bitumiri akaaya keꞌYerusaleemu kakola mu kizi gayirizibwa naꞌbandu baꞌmahanga gooshi. Naꞌbandu baawe, bagweti baganegurwa. «“E Nahamwitu! Ukukulikirana na ngiisi kwo uli mu gira íbikwaniini, utaki gwatwe noꞌbute hiꞌgulu liitu. Si akaaya kaawe Yerusaleemu, kali ku mugazi gwawe mweru!

Hezekyeri 36:34

Ikyanya abandu bâli kizi genda ha butambi lyeꞌndalo ziinyu, banabona ngiisi kwo zasiba. Kundu kwokwo, ngashubi mùleka mukizi zihinga.