Hayubu 10:15 - Kifuliiru

¹⁵ Iri nangaba ndi nangora-mabi, yayewe imwani. Kandi iri nangaba ndi woꞌkuli, ndashobwiri ukuyihuuza. Mukuba, nyijwiri mweꞌshoni, na ngola mu libuuka bweneene.

Hayubu 10:15 Referans Kwoze

Hisaaya 3:11

Halikago banangora-mabi, boohe, yayewe imwabo! Bagaahanwa, ukukulikirana naꞌmabi gooshi go bâli kizi kola.

Hayubu 9:15

Kundu nangabiiri ngwaniini imbere lyage, ndangamúshuvya. Bwo yehe ye mu twa imaaja, nangamúhuuna naaho, kwo angoge.

Malaki 3:18

Haaho, lyo mugashubi bona ulubibi, úluli ha kati koꞌmundu úkwaniini, noꞌmundu mubi. Muganaki bona ulubibi ha kati koꞌmundu úgweti úgakolera Rurema, na útali mu twaza ukumúkolera.

Zaburi 25:18

Ulolage ngiisi kwo ngola mu libuuka, ulole noꞌmukubo gwani. Kwokwo, unjaagize ibyaha byani byoshi.

Hayubu 10:7

Uyiji-yiji kwo ndagweti buhube. Kundu kwokwo, ndaanaye úwangangiza mu maboko gaawe.

Luka 17:10

«Kwokwo, na niinyu, ikyanya mugayusa ukugira byoshi byo mukabwirwa, mudetage kwokuno: “Twehe, tulyagagi bakozi naaho. Twakola naaho nga ngiisi kwo bitukwaniini.”»

Kimombo 1:20

E Nahano, langiizagya ngiisi kwo nashenguka bweneene. Umutima gwani, keera gukavunika, gunakoli shengusiri. Ala nie! Keera nꞌgahuna imbere lyawe. Buno mu mitalimbwa, abandu baani bakola mu yitwa ku ngooti. Kiri na mu nyumba, bayiji-yiji naaho kwo bakola bagaafwa.

Hisaaya 6:5

Iri nꞌgabona kwokwo, nanadeta: «Ala nie! Si leero ngola ngashereera! Si akanwa kaani kayulubiiri. Naꞌbandu bo tutuliinwi, nabo utunwa twabo tuyulubiiri. Kundu kwokwo, keera nayibonera Umwami. Ye na Nahano woꞌbushobozi bwoshi!»

Zaburi 119:153

E Nahano, ndazi yibagira imaaja zaawe. Aaho! Ulolage ngiisi kwo bagweti bagandibuza, unangize.

Zaburi 9:17

Nahano amenyekiini kwo ali woꞌkuli. Si yabo banangora-mabi, boohe, bali mu yigwasa mu mitego yabo boonyene.

Hayubu 27:7

«Umugoma wani akwaniini ahanwe, kuguma na banangora-mabi. Ngiisi kwo banangora-mabi bali mu hanwa, kwo naye akwaniini ahanwe.

Hayubu 23:15

Kyo kitumiri ngweti ngalenga mwoꞌmusisi imbere lyage. Yizo shungi, ikyanya ngweti ngazisalira kwo, ngweti ngayami shenguka.

Hayubu 21:6

Ikyanya ndi mu yitoneesa ku bikamba kwo, ndi mu huumirwa. Amagala gaani ganajugume bweneene neꞌkyoba.

Hayubu 9:29

Kundu kwangabiiri kuti, ngatwirwa ulubaaja naaho kwo ndi noꞌbuhube, Aahago! Kituma kiki ngashubi libuukira ubusha?

Hayubu 9:12

Byo Rurema anyugutula, nyandagi úwangaki bigalula? Nyandi úwangakolwa mbu amúbuuze, ti: “Ewe! Maki gano ugweti ugaagira?”

Kulyoka 3:7

Nahano anashubi múbwira: «Abandu baani, bakola mu libuuka bweneene mu kihugo kyeꞌMiisiri. Basheebuja baabo, bali mu balibuza ku kahaati. Yago malibu gaabo gooshi, ngabwini, na nyuvwiti na ngiisi kwo bagweti bagaalira. Na buno, ngweti ngabahahalira.

Hayubu 6:29

E maashi! Mulekage ukutona kwo nagira ubuligo. Si ndaabwo nagira.

Zaburi 83:16

Ukizi basingoola, nga kwoꞌmuliro guli mu singoola ulubako, na nga kweꞌmbigi zaagwo ziri mu boyola imigazi.

Zaburi 44:16

Ndi mu mala umulege-rege gwoshi ndeteriirwi. Amalanga gaani gayijwiri ishoni.