1 Peturu 1:24 - Kifuliiru

²⁴ Mukuba biyandisirwi kwokuno: «Abandu booshi, bali nga byasi. Noꞌbulangashane bwabo, buli nga bwaꞌkaaso naaho. Ibyasi biri mu bogama, naꞌkaaso kanabugumuke.

1 Peturu 1:24 Referans Kwoze

Zaburi 103:15

Umwana woꞌmundu, isiku zaage ziryagagi niini bweneene, nga kishuka, zinali mu lenga duba nga twaso.

Yakobo 4:14

Si mutayiji íbigamùkoleka kwo, kiri na kusheezi! Uburambe bwinyu, bulyagagi buki? Si buli nga luuta! Luli mu boneka ku hyanya hiniini, lunayami nyerera!

Zaburi 37:2

Si bagakuluuduka nga kishuka, banahangalale nga byasi.

2 Baami 19:26

Yiri igambo, lyo litumiri abatuulaga baamwo keera bashenguka, banakoli yobohiri bweneene, banakoli teziibwi ishoni. Bakolaga nga byasi byoꞌmuyonga, íbikiri mu shoga ku katwe. Kundu kwokwo, biri mu yami yumaguka, bítanazi kula bwija.

1 Yohana 2:17

Ikihugo, neꞌbyaꞌbandu bali mu yifwija, byoshi bigalenga. Si iri umundu angagira byo Rurema aloziizi, yehe agaalama imyaka neꞌmyakuula.

Zaburi 129:6

Bakizi ba nga kishuka íkimeziri ku katwe keꞌnyumba. Mukuba, kiri mu yuma, buzira kukoma.

Zaburi 92:7

Banangora-mabi, kundu bangadeha nga kishuka, banakizi genduukirwa, haliko ubuzinda, bagashereera imyaka neꞌmyakuula. Yibyo byoshi, ibizeeze bitangabimenya. Abahwija batangabisobanukirwa.

Zaburi 102:4

Isiku zaani, ziri mu yami nyerera nga kyusi. Amavuha gaani, ganakoli duusiri.

Zaburi 90:5

Uli mu kizi mala abandu, mu kubahuniza. Bali mu ba nga kishuka kya shesheezi.

Hayubu 14:2

Ali mu yasa bwija nga kaaso, haliko haaho, anashubi bogama. Ali mu lenga nga kimbehwa, anayami nyerera.

Zaburi 39:6

Isiku zaani, si ziri niini bweneene, zinakwiziri ha fune. Ee! Imyaka yani yoshi, iri nga ndaayo. Ubulamu bwoꞌmundu, buli mu lenga nga úwayisa umuuka liguma naaho.»

Hisaaya 51:12

Nahano adetaga kwokuno: «Mumenye kwo niehe, nie ndi mu mùholeeza. Aaho! Kituma kiki muki yobohiri abandu, banali ba kufwa naaho? Si bagaahera nga byasi! Kituma kiki baki gweti bagamùkanga?

Mataayo 6:30

«Kwokwo, kwo Rurema ali mu limbiisa ibyasi bya mu kishuka. Yibyo byasi, zeene biri ho. Na kusheezi, binakabulwe mu muliro. Aahago! Ka itali yo haahe kwo na niinyu agakizi mùyambika. Si ubwemeere bwinyu, buki niihiri bweneene!