रोमीयो 7:4 - जीवन को च्यानणो (सेकावाटी नया नियम की पोथ्या)

⁴ जणा मेरा लाडला बिस्वास्यो सुणो, मसी की काया क जरिए नेम-कायदा ताँई थे बी मरेड़ा हो। जणा इब थे बी ओराऊँ नातो राख सको हो, बिऊँ जिनै मरेड़ा मऊँ ओज्यु जीवायो गयो जिऊँ आपा परमेसर ताँई फळां-फुलां।

रोमीयो 7:4 Referans Kwoze

1 पतरस 2:24

बो आपणा पापनै खुदकी काया प लेर सुळी प चढगो, जिऊँ आपा पाप करबा बेई मर्या समान होवां अर जखो सई ह बिनै करबा बेई जीवां। थानै निरोगो कर्यो जा सकै, इ ताँई बो आपकी काया प घाव लिआ।

रोमीयो 8:2

क्युं क मसी ईसु म जीवन देबाळी पबितर आत्मा को नेम-कायदो मनै पाप अर मोत का बिधानऊँ छुटावै ह।

इफिसुस 2:15

अर नेम-कायदा का हुकमा अर नेम-कायदानै भुजाण दिओ अर यहूदि अर गैर-यहूदिआनै आपसरी म मिलार परमेसर का मिनख बणा दिओ।

रोमीयो 7:6

पण इब आपानै नेम-कायदाऊँ छुटकारो दे दिओ गयो ह जिकै बंदण म आपा बंदर्या हा अर आपा बि नेम-कायदा ताँई मरलिआ। जिऊँ बि पुराणा मंडेड़ा नेम-कायदाऊँ नइ पण पबितर आत्मा की नएड़ी रीत गेल सेवा करां।

गलातियो 5:18

अर ज थे पबितर आत्मा क कह्या गेल भेवार करो हो जणा थे नेम-कायदा क बस म कोनी हो।

कलुसीयो 1:22

पण इब, हाड-मास की काया म बिकी मोतऊँ परमेसर थारूँ बी मेळमिलाप कर लिओ। जिऊँ थानै पबितर, बिना कळंक अर निरदोस बणार आपकै सामै लेर आवै।

रोमीयो 6:22

पण इब थानै पाप का बंदणाऊँ छुटा लिओ गयो ह, अर थे परमेसर का दास बणगा हो, जणा जखी खेती थे काटर्या हो बा थानै पबितरता म लेज्यावै ह जिको आखरी फळ अजर-अमर जीवन ह।

गलातियो 3:13

मसी आपणा सरापनै आपकै उपर लेर आपानै नेम-कायदा का सरापऊँ अजाद कर दिओ। क्युं क पबितर सास्तर म मंडेड़ो ह क, “जखो बी सुळी प लटकायो जासी बो सरापित ह।”

रोमीयो 6:14

थार प पाप को राज कोनी हो सकै क्युं क थे नेम-कायदा क साराऊँ कोनी जीओ पण परमेसर की दया क साराऊँ जीओ हो।

कलुसीयो 2:14

अर बि आदेसनै जखो आपणै नाम अर खिलापत म हो बिनै भुजाण दिओ अर ईसुनै सुळी प किलाऊँ जड़र आपणै सामैऊँ बि लेखनै हटा दिओ,

कलुसीयो 1:10

जिऊँ थे परबु जंय्यां चावै ह बंय्यां जी सको अर हर बाता म सदाई परबु मसीनै राजी राख सको। थारै जीवन म भला कामा का फळ लागै अर थे परमेसर का ज्ञान म दिन-दिन बढता रह्यो।

फलिपी 1:11

धारमिक्‍ता का चोखा लखणाऊँ थारो जीवन भरज्यावै, जखो परमेसर की मेमा अर जे-जैकार ताँई ईसु मसीऊँ मिलै ह।

दरसाव 19:7

इ ताँई आओ आपा राजी होर खुसी मनावां, अर बाकी जे-जैकार करां। क्युं क उन्या की ब्या की त्यारी पूरी होगी ह, अर बिकी बिनणी बी सजि-धजी त्यार बेठी ह।

रोमीयो 6:2

कदैई नइ, आपा जखा पाप ताँई मरगा हां, पाप म कंय्यां जिस्यां?

कलुसीयो 2:20

थे तो मसी क सागै मरेड़ा हो अर थानै जगत प राज करबाळी आत्मा क कनैऊँ छुडायड़ो ह। जणा पाछै थे आ जगत का मिनखा की जंय्यां क्याले जीओ हो? थे जगत का अंय्यांलका नियमानै क्याले मानो हो?

कलुसीयो 1:6

चोखो समचार सगळा जगत म फळर्यो-फुलर्यो अर फेलर्यो बी ह। बंय्यांई जद थे परमेसर की दया क बारां म सुण्या अर सचमई बिनै समज्या हा जदऊँ लेर थारै म बी चोखो समचार फळर्यो-फुलर्यो अर फेलर्यो बी ह।

फलिपी 4:17

इको मतबल ओ कोनी क मनै दान चाए; पण म थारी बही म बढतो होयो फाईदो देखबो चाऊँ हूँ।

यहून्ना 3:29

बिंद बोई ह जिकै बिनणी ह। पण बिंद को भाईलो जखो खड़्यो होर बिकी सुणै ह, बो जद बिंद बोलै जणा बिकी उवाज सुणर राजी होज्यावै ह। ठिक बंय्यांई म बी राजी होयो।

मत्ती 26:26

बे जिमर्याई हा क ईसु रोटी लेर परमेसरनै धनेवाद देर रोटीनै तोड़्यो अर आपका चेलानै आ खेतो रोटी बाटी, “ल्यो आ मेरी काया ह।”

दरसाव 21:9

इकै पाछै बा सात्यु ईस्बर नगरी दुता मऊँ जाकै कनै सात म्हामारीऊँ भरेड़ा प्याला हा एक जणो आगै आर मेरूँ बोल्यो, “अठै आ, म तनै बा बनड़ी दिखास्युं जखी उन्या की बिनणी ह।”

इबरानीआ 10:10

अर परमेसर की बि इंछ्याऊँ आपा ईसु मसी की कायानै एकर बलिदान करबा की जरिए पबितर कर दिआ गया हां।

2 कुरन्थीयो 11:2

क्युं क जंय्यां परमेसर थारी चिंत्या करै ह बंय्यांई म बी थारी चिंत्या करूं हूँ अर थे पबितर कुंआरी छोरी की जंय्यां हो जिकी सगाई म मसी क सागै करबा को करार कर दिओ हूँ।

1 कुरन्थीयो 10:16

जि प्याला मऊँ आपा परबुभोज क रूप म धनेवाद देर पिवां हां, बो दरसावै ह क आपा मसी का लोय मऊँ पिवां हां। अर बा रोटी जखी आपा परबुभोज म तोड़र खावां हां बा दरसावै ह क आपा मसी की काया मऊँ खावां हां।

यहून्ना 15:8

जखी परम-पिता चावै ह, थे बंय्यांई करो जणा इऊँ परम-पितानै मान मिलसी अर जणाई बेरो पड़सी क थे मेरा चेला हो।

यहून्ना 6:51

बा जीवती रोटी म हूँ जखी ईस्बर नगरीऊँ उतरी। जखो बी इ रोटीनै खासी बो सदाई जिंदो रेह्सी। अर इ जगत का मिनखानै जीबा ताँई जखी रोटी म देस्युँ, बो मेरो मास ह।”

मरकुस 4:20

अर जखा बीज उपळी माटी म बोया गया अ बे लोग हीं जखा बचन सुणर बिनै मानी हीं अर बिकै गेल फळीं, जिऊँ बे तीसुणा, साठुणा, सोगुणा अर सो गुणाऊँ बी घणो फळ ल्यावीं।”

रोमीयो 6:11

अंय्यांई थे थारै ताँई बी सोचो क थे पाप ताँई मरमरागा पण मसी ईसु म परमेसर ताँई जिर्या हो।

रोमीयो 7:3

ज बा आपका मोट्यार क जीताजीई पराया क सागै समंद राखै जणा कुकरम करै ह। पण ज बिको मोट्यार मर जावै जणा ब्या का काण कायदा बिपै लागू कोनी होवै अर ज बा दुसरो मोट्यार करले जणा बा कुकरमी कोनी खुवावै।