लूका 20:21 - जीवन को च्यानणो (सेकावाटी नया नियम की पोथ्या)

²¹ जणा बे जासुस बिनै फसाबा ताँई सुवाल बुज्यो, “गरूजी म्हें जाणा, तू जखी बी बोलै अर सीखावै बे साची ह अर तू कोईनै छोटो बडो देखर कोईको पक्सपात कोनी करै पण परमेसर को गेलो ईमानदारीऊँ बतावै ह ,

लूका 20:21 Referans Kwoze

मत्ती 22:16

जणा बे हेरोद का गुट का क्युंक मिनखा क सागै आपका चेलानै ईसु कनै भेज्या। अर बे ईसुनै कह्या, “गरूजी म्हें जाणा हां थे सचा हो अर परमेसर आपणाऊँ काँई चावै बिनै खराईऊँ बताओ हो। म्हें आबी जाणा हां थे मुंडो देखर टिको कोनी काडो अर नइ खिकी परवा करो हो।

गलातियो 1:10

के म मिनखाऊँ मंजुरी लेबो चाऊँ? मनै इकी जुर्त कोनी! जिकी मनै जुर्त ह बा परमेसर की मंजुरी ह! म मिनखानै राजी करबो कोनी चाऊँ ज म अंय्यां करबो चाऊँ जणा म मसी को सेवक कोनी।

2 कुरन्थीयो 2:17

परमेसर का बचना को परचार को धंधो करबाळा बोळा हीं बे आपको फाईदो चावै ह। पण म्हें अंय्यां का कोनी हां, म्हानै परमेसर सचाई क सागै बोलबा ताँई ईसु मसी का दास क रूप म भेज्यो ह।

यहून्ना 3:2

एक रात बो ईसु कनै गयो अर बिऊँ बोल्यो, “गरूजी, म्हें जाणा हां क म्हानै सीखाबा ताँई परमेसर तनै भेज्यो ह। अर ज परमेसर थारै सागै नइ होतो तो थे चमत्कार कोनी कर सका हा।”

मरकुस 12:14

बे ईसु कनै गया अर बिऊँ बोलबा लाग्या, “ओ गरूजी म्हें जाणा हां क तू बोळो ईमानदार ह अर तू इ बात की परवा कोनी करै क लोग तनै काँई खेवै ह अर तेरा बारां म काँई सोचै ह। अर तू मिनखा को मुंडो देखर बाता कोनी करै पण परमेसर क कनै जाबा ताँई जखो गेलो ह बिनै तू सच-सच बतावै ह। पण म्हें तनै बुजां हां क कैसरनै चुंगी देणी चाए क कोनी?”

गलातियो 2:6

अर जखा मिनख मान्या-थान्या हा, चाए बे कंय्यांका बी हो, मनै कोई फरक कोनी पड़ै, परमेसर कोईको भेद-भाव कोनी करै बानै मेरा सुणाईड़ा चोखा समचार म क्युंई कमी कोनी लाधी।

लूका 20:20

अर बे सगळा इ ताक म रेह्बा लागगा की बो कोई गळती करै। बे जासुसानै हक देर बिकै गेल छोड्या। जखा ईमानदारी ताँई जाण्या जाता हा। अर इ आस म की बे ईसुनै बाता म फसार बिऊँ क्युं गळत खुवा देसी। जिऊँ बे बिनै रोमी सरकार क हाता म सूप दिं।

लूका 20:22

जणा थे म्हानै बताओ आपणा नेम-कायदा गेल रोमी समराटनै लगान देबो ठिक ह क कोनी?”