2 तिमूतियूस 1:9 - जीवन को च्यानणो (सेकावाटी नया नियम की पोथ्या)

⁹ बो आपानै परमेसर का मिनख होबा ताँई बचायो अर बुलायो ह, ओ सोभाग आपणा प आपणा करमा गेल कोनी होयो ह पण ओ तो बिकी दया अर बिका मकसद गेल आपणा प होयो ह। जखो मसी ईसु म जगत की सरूआतऊँ पेली आपणा प होगो हो।

2 तिमूतियूस 1:9 Referans Kwoze

रोमीयो 16:25

बिकी बडाई होवै जखो थानै, ईसु मसी का संदेस, जि चोखा समचार को म हेलो पाड़ूँ हूँ अर परमेसर का परगट होयड़ा बि भेदभर्या सच गेल जखो जुगादऊँ लुखेड़ो हो, मजबूत बणाबा की सक्‍ति राखै ह।

तितूस 1:2

ओ सच अजर-अमर जीवन की आस बंधावै ह। जिको करार बिस्वास जोगो परमेसर जगत की सरूआतऊँ पेली कर दिओ हो।

रोमीयो 9:11

अर जोड़ला टाबरा क जलमऊँ पेल्या अर बाकै क्युं बी भलो-बुरो करबाऊँ पेल्या परमेसर रिबकाऊँ बोल्यो, “बडोड़ो छोटक्या की सेवा करसी।” परमेसर अंय्यां इ ताँई बोल्यो जिऊँ परमेसर क टाळबा को मकसद पूरो होवै जखो बा दोन्या क करमा गेल कोनी हो, पण इ बात प हो क परमेसर किनै बुलाबा की ध्यारमाली हीं।

यहून्ना 17:24

ओ परम-पिताजी, जखा मिनख थे मनै सूप्या हो म चाऊँ हूँ क बे बी बठै मेरै सागै होवीं जठै म हूँ, जिऊँ क बे बि मेमानै देख सकीं जखी थे मनै दिआ हो, क्युं क इ सरस्टिनै रचबाऊँ पेली थे मेरूँ परेम कर्यो।

इफिसुस 1:11

परमेसर सगळी चिजा बंय्यांई करी जंय्यां बो ध्यार राखी ही; अर परमेसर आपका मकसद गेल आपणानै बी मसी क सागै बिका मिनख होबा ताँई टाळ्यो जिनै बो बोळी पेल्याऊँई ध्यार राख्यो हो।

दरसाव 13:8

जखा मिनखा को नाम बि उन्या की जीवन हाळी पोथी म कोनी मांडेड़ो बे सगळा मिनख इ डरावना जानबरनै धोकसी। ओ उन्यो जखो इ सरस्टि की सरूआतऊँई बलि होबा ताँई ते कर्यो गयो हो।

1 पतरस 1:20

बिनै इ सरस्टि की रचना होबा क पेल्याई टाळ लिओ गयो हो, पण थारा भला ताँई आ आखरी दिना म बिनै परगट कर्यो गयो।

यहून्ना 17:9

“म बा ताँई अरदास करूं हूँ। म जगत ताँई अरदास कोनी करर्यो पण म तो बा ताँई अरदास करूं जानै थे मनै दिआ हो क्युं क बे थारा हीं।

1 पतरस 2:9

पण थे अंय्यां का मिनख कोनी हो। थे तो परमेसर का टाळेड़ा खास मिनख हो। थे स्याही याजका की टोळी अर पबितर कूणबो हो। एक कूणबो जखो परमेसरऊँ निकळ्यो ह। परमेसर थानै अँधकारऊँ ताजूबभर्या च्यानणा म ल्यायो ह। जणा इब थानै चाए क थे बिकी ताजूबभरी बाता को जखी बो करी ह, हेलो पाड़ो। पबितर सास्तर म मंडेड़ो ह,

इबरानीआ 3:1

ईस्बर नगरी का बुलावा म पाँतीवाळ ओ मेरा पबितर बिस्वासी भाईड़ो, थे थारो ध्यान बि परमेसर का भेजेड़ा ईसु प जखो म्हायाजक ह अर जिनै म्हें माना हां बिपै लगाओ।

इफिसुस 2:5

अर परमेसर का हुकमानै नइ मानबा की बजेऊँ आपा तो आत्मा म मरेड़ा हा। पण मसी क जीबा की बजेऊँ बो आपानै पाप भर्या जीवनऊँ बचार आत्मा म जीवायो। आ परमेसर की दयाई ह जिकी बजेऊँ आपा बचगा।

1 थिसलूनिकी 4:7

क्युं क परमेसर आपानै सूगलो नइ पण पबितर जीवन जीबा ताँई बुलायो ह।

1 कुरन्थीयो 1:18

मसी क सुळी भोगबा को समचार नास होबाळा मिनखा ताँई बकवास ह। पण आपणा ताँई जखा बचाया जार्या हां परमेसर की सक्‍ति ह।

यहून्ना 6:37

जोक्यु परम-पिता मनै देवै ह, बो मेरै कनै आसी अर म बिऊँ मुंडो कोनी फेरूं।

दरसाव 17:8

जि खुखार ज्यानबरनै तू देख्यो ह, बो पेली हो इब कोनी पण बो जिंदो होर पताळऊँ ओज्यु आसी अर बिको नास होज्यासी। अर धरती प रेह्बाळा बे मिनख जाका नाम जुगादऊँई जीवन की पोथी म कोनी मांडेड़ा बे इ खुखार ज्यानबरनै देखर ताजूब करसी, क्युं क ओ पेला जिंदो हो पण इब कोनी पण बो आबाळो ह।

इफिसुस 3:11

परमेसर इनै आपकी जुग-जुग ताँई रेह्बाळी मनस्याऊँ कर्यो ह जिनै बो आपणा परबु मसी ईसु की बजेऊँ पूरी कर्यो ह।

रोमीयो 3:20

नेम-कायदा का काम करबाऊँ कोईबी मिनख परमेसर क सामै धरमी कोनी हो सकै। क्युं क नेम-कायदाऊँ तो पाप की पिछाण होवै।

1 तिमूतियूस 1:1

म पोलुस, आपानै बचाबाळा परमेसर अर आपणी आस की निम मसी ईसु का हुकमऊँ मसी ईसु को भेजेड़ो चेलो बण्यो।

इफिसुस 1:9

परमेसर बोई कर्यो जखो बिको मकसद हो, अर बो बि भेदनै आपानै बतायो जिनै मसीऊँ पूरो करबा ताँई बो पेल्याऊँई ध्यार राख्यो हो।

रोमीयो 9:24

अर सचमई आपा बे मिनख हा जानै परमेसर बुलायो ह अर खाली यहूदिई नइ, पण गैर-यहूदि बी सामिल ह।

लूका 10:21

बि घड़ी ईसु पबितर आत्माऊँ भर'र राजी होर बोल्यो, “ओ परम-पिता ईस्बर नगरी अर धरती का मालिक म तेरो गुणगान करूं की तू आ बातानै ज्ञानीद्यान्याऊँ लखोर राखी अर गुठा छाप प आका भेदानै खोल्या। क्युं क ओ थारी नजर्या म चोखो हो।

मत्ती 1:21

बा एक बेटो जलमसी जखो आपका मिनखानै बाका पापऊँ बचासी। तू बिको नाम ईसु राखजे, जिको मतबल ह! परबु आपका मिनखानै बचावै।”

भेजेड़ा चेला का काम 2:47

अर परमेसर को गुणगान गाता। बे सगळा इ दान दयाऊँ राजी हा। अर जखो बी परमेसर क जरिए छुटकारो पातो, परमेसर बिनै रोजकी बाकी टोळी म जोड़ देतो।

भेजेड़ा चेला का काम 15:18

परबु बोलै ह क, म अ बाता बोळी पेल्याऊँई बता दिनी ही।’”

रोमीयो 11:14

बंय्यांई म चाऊँ हूँ क कंय्यां बी कर म मेरा मिनखा म होड पैदा कर सकूँ अर बामैऊँ क्युंकनै बचा सकूँ।

रोमीयो 11:29

क्युं क परमेसर का बरदान अर बिको बुलाया जाबानै कोनी बदल्यो जा सकै।

फलिपी 3:14

जिऊँ म निसाना कानि सिदो-सिदो भागर बो इनाम जीतल्युँ जिताँई परमेसर मसी ईसु की बजेऊँ मनै ईस्बर नगरी जीवन ताँई बुलायो ह।

2 तिमूतियूस 1:1

इ चिठीनै पोलुस मांडी, जखो परमेसर की इंछ्याऊँ मसी ईसु को भेजेड़ो चेलो ह, जिनै परमेसर बि जीवन को हेलो पाड़बा ताँई भेज्यो ह जिकै बारां म परमेसर आपणाऊँ मसी ईसु म देबा को बादो कर्यो ह।