1 पतरस 2:22 - जीवन को च्यानणो (सेकावाटी नया नियम की पोथ्या)

²² “नइ तो बो पाप कर्यो, अर नइ मुंडाऊँ छळ की बात बोली।”

1 पतरस 2:22 Referans Kwoze

इबरानीआ 4:15

क्युं क आपणो म्हायाजक अंय्यां को कोनी जखो आपणी कमजोरीनै म्हेसुस कोनी कर सकै; क्युं क बिनै सगळी बाता म आपणी जंय्यां बिचास्यो गयो हो जणा बी बिमै कोई पाप कोनी लाध्यो।

2 कुरन्थीयो 5:21

अर जखो कदैई पाप कोनी कर्यो बिनै परमेसर आपणा ताँई पापबली बणायो जिऊँ आपा परमेसर क सामै धरमी बाजां।

1 यहून्ना 3:5

क्युं क थे आ तो जाणोई हो क मसी मिनखा का पापनै धोबा ताँई आयो , अर आबी जाणो हो क बिकै मांयनै क्युंई पाप कोनी।

दरसाव 14:5

अ मिनख कदैई झूठ कोनी बोल्या, अर अ बेकसूर मिनख ह।

1 यहून्ना 2:1

ओ मेरा टाबरो, म थानै अ बाता इ ताँई मांडूँ हूँ क, थे पाप नइ करो। पण ज कोई मिनख पाप करै ह बिका पाप धोबा ताँई धरमी ईसु मसी आपणै अर परम-पिता क बिचमै बकिल ह जखो आपणानै परमेसर क सामै सई बणावै ह।

इबरानीआ 9:28

बंय्यांई मसी बी बोळा मिनखा का पापनै धोबा ताँई एकर बलिदान होयो; अर मसी बा मिनखा ताँई जखा बिनै उडिकै ह बाका पाप धोबा ताँई नइ पण बाका छुटकारा ताँई दुसरकै परगट होसी।

लूका 23:41

क्युं क आपानै आपणी करनी गेल फळ मिलर्यो ह, पण ओ लाय तो क्युं कर्योई कोनी।”

यहून्ना 8:46

थारै मऊँ कूण मेर प पापी होबा को दोस लगावै ह? ज म साची बोलुँ हूँ, जणा पाछै थे मेरो बिस्वास क्युं कोनी करो?

यहून्ना 1:47

ईसु नतनएलनै आपकै कनै आतो देखर बोल्यो, “देखो, ओ सचमई इजरायली ह, जिमै क्युंई कपट कोनी।”

लूका 23:47

अठै जोक्यु होयो बिनै देखर सुबेदार परमेसर की बडाई कर बोल्यो, “ओ पक्कोई धरमी मिनख हो।”

मत्ती 27:19

अर जद पीळातुस न्यायहाळा सिंघासन प बेठ्यो हो जणा बिकी लूगाई बिकन एक संदेसो भेज्यो। जिमै मंडर्यो हो क, “सुआरैसिक म सूपना म इ मिनख की बजेऊँ बोळो दुख पाई हूँ। जणा इ धरमी मिनख क सागै क्युंई बुरो मना करज्यो।”

मत्ती 27:4

अर खयो, “म निरदोस मिनखनै धोकाऊँ पकड़ार पाप कर्यो हूँ।” अंय्यां सुणर बे बोल्या, “म्हानै इऊँ काँई लेणो ओ तो तेरो मामलो ह।”