1 यहून्ना 5:18 - जीवन को च्यानणो (सेकावाटी नया नियम की पोथ्या)

¹⁸ आपा जाणा हां क, जखोबी मिनख परमेसर को ह बो पाप कोनी करतो रेह्‍वै क्युं क परमेसर बिनै बचावै ह अर बिकै सेतान हात कोनी अड़ा सकै।

1 यहून्ना 5:18 Referans Kwoze

1 यहून्ना 3:9

जखोबी परमेसर को बेटो बणगो ह बो पाप करतो कोनी रेह्‍वै। क्युं क बिकै मांयनै मसी बास करै ह अर बो परमेसर को बेटो ह इ ताँई बो पाप करतो कोनी रेह्‍वै।

1 यहून्ना 5:4

अर जखाबी मिनख परमेसर का टाबर बणज्यावीं हीं बे दुनियानै जीत लेवै ह। इकी बजे आपणो बिस्वास ह।

यहूदा 1:21

आपणा परबु ईसु मसी की दयानै उडिकता रेह्‍ओ, जखो थानै अजर-अमर जीवन देसी। अंय्यां कर थे खुदनै परमेसर का परेम म बचार राखस्यो।

1 यहून्ना 5:1

जखाबी मिनख ओ बिस्वास करीं हीं क, ईसुई मसी ह बे परमेसर का टाबर हीं, अर जखाबी परमेसरऊँ परेम करसी बे बिका टाबराऊँ बी परेम करसी।

यहूदा 1:24

परबु ईसु मसी की बजेऊँ आपानै बचाबाळा परमेसर की जे-जैकार हो। परमेसरई थानै बचा सकै ह, अर पापऊँ धो सकै ह। अर बोई ह जखो थानै आपकी मेमाभरी मोजूदगीऊँ राजी कर सकै ह अर खुद क सामै निरदोस खड़्यो कर सकै ह। जुगादऊँ इब ताँई अर आबाळा जुग-जुग ताँई मेमा, मान, ताकत अर अधिकार परमेसर कोई ह। अंय्यांई होवै।

1 यहून्ना 3:3

अर जखो बी मिनख बिमै आस करमाली ह, बो खुदनै बंय्यांई पबितर राखै जंय्यांकी मसी पबितर ह।

याकूब 1:27

पण परमेसर अर परम-पिता की नजर्या म खरी अर पबितर भगती तो आ ह क अनाथ अर खाली होईड़ीनै बाकै दुख दरद म समाळै अर खुदनै इ दुनियादारीऊँ बेदाग राख।

1 पतरस 1:23

क्युं क थे नयो जीवन पाया हो। अर थारो ओ नयो जीवन मिनखऊँ कोनी आयो जिको अंत होवै ह। पण थारो ओ जीवन परमेसरऊँ आयो ह, जिको कोई अंत कोनी। क्युं क थे परमेसर का बचन प बिस्वास कर्या, जखो सदा-सदाई बण्यो रेह्‍वै ह।

1 यहून्ना 2:29

अर ज थे आ जाणो हो क बो धरमी ह जणा थे आबी जाणल्यो क जखो मिनख धरम का काम करै ह बो बिऊँ जलम्यो ह।

यहून्ना 15:9

“जंय्यां परम-पिता मेरूँ परेम करै ह, बंय्यांई म बी थारूँ परेम करूं हूँ। मेरा परेम म बण्या रेह्ओ।

दरसाव 2:13

म जाणू हूँ क, तू बठै रेह्‍वै ह जठै सेतान को सिंघासन ह। इकै वावजुद बी तू मेरै नाम प सचो बिस्वास करै ह। तेरी नगरी म सेतान को सिंघासन ह जठै मेरा बिस्वास जोगा दास अन्तिपासनै मार्यो गयो जणाबी तू मेर प बिस्वास करबो कोनी छोड्यो।

1 यहून्ना 5:21

मेरा भाईड़ो, थे खुदनै मूरती धोकबाऊँ बचार राखज्यो।

1 यहून्ना 4:6

पण आपा परमेसर का हां अर जखो बी परमेसरनै जाणै ह बो आपणी बाता सुणै ह। पण जखो परमेसर को कोनी बो आपणी कोनी सुणै। अर इ बातऊँ आपा आ जाण सकां हां क, कूणसी आत्मा सच की ह अर कूणसी आत्मा भंगराबाळी ह।

यहून्ना 15:7

ज थे मेर म अर मेरा बचन थारै म बण्या रेह्सी, जणा थे जोक्यु बी थारी इंछ्या गेल माँगस्यो बो थानै मिलसी।

यहून्ना 1:13

एक टाबर, जंय्यां मिनखऊँ बिकी इंछ्या गेल जलमै ह, बि तरिकाऊँ जलम'र बे परमेसर का टाबर कोनी बण्या, पण परमेसर की इंछ्याऊँ आत्मिक रूपऊँ जलम लेर परमेसर का टाबर बण्या हीं।

1 यहून्ना 3:12

आपानै कैन की जंय्यां कोनी बणणो ह जखो सेतान को हो, जखो आपका भाईड़ानै मार गेर्यो ह। अर बो अंय्यां इ ताँई कर्यो क्युं क बिका खुदका काम तो बुरा हा पण बिका भाई का काम धरम का हा।

भेजेड़ा चेला का काम 11:23

बरनाबास बठै परमेसर की दयानै देखर राजी होयो। अर बानै उपदेस दिओ की तन मनऊँ बिस्वास जोगा अर परमेसर म बण्या रेह्ओ।

यहून्ना 15:4

थे मेर म बण्या रेह्ओ, जणा म बी थारै म बण्यो रेहस्युं। एक डाळी खुदऊँ कोनी फळ सकै, फळबा ताँई बिनै बोजा म लाग्यो रेह्णो पड़ै ह। अंय्यांई थे मेरै बिना कोनी फळ सको।

यहून्ना 14:30

इब ओर बेत्ती म थारूँ बात कोनी कर सकूँ क्युं क इ दुनिया को राजा सेतान आर्यो ह, पण मेर प बिको बस कोनी चालै।

याकूब 1:18

बो आपकी इंछ्याऊँ आपानै सचाई का बचनऊँ पैदा कर्यो ह जिऊँ आपा बिकी बणाएड़ी सगळी सरस्टि म पेलो फळ होवां।

मत्ती 5:37

पण थारी बात ‘हाँ’ की ‘हाँ’ अर ‘ना’ की ‘ना’ हो। क्युं क जखो मिनख इकै अलावा क्युं बोलै ह जणा बो सेतान कानिऊँ ह।

मत्ती 6:13

अर थे म्हानै बिचासबा मना द्‍यो पण बुराईऊँ बचाओ।

1 यहून्ना 5:15

अर आपा आबी जणा हां क, जदकी बो आपणी सुणै ह अर जद आपा बिऊँ माँगा हां जणा आपा जाणा हां क, जोक्यु आपा माँग्या हां बो आपानै मिलगो ह।

1 यहून्ना 5:19

आपा आबी जाणा हां क, सगळा जगत का मिनख सेतान क बस म ह, पण आपा परमेसर का हां।

1 यहून्ना 5:20

इ बातनै बी आपा जाणा हां क परमेसर को बेटो ईसु मसी आयो अर आपानै समज दिओ जिऊँ आपा सचा परमेसरनै जाण सकां, अर आपा बिकै सागै रेह्‍वां जखो सचो ह, मतबल ईसु मसी क सागै। ओई सचो परमेसर अर अजर-अमर जीवन देबाळो ह।