Sofonías 3:19 - Biblia Enxet

¹⁹ Cháxa ekhem nak, allegássesagkohok sa' ko'o apyókxoho m'a ektáha nak chá'a apnaqtawáseykegkoho. Apasmok sa' ma'a nepkések apyaqteyeykha nak, almekxak sa' han ma'a apkelxegányam nak; ekha kéláyo sa' atnessásekxa' tén han kélya'áseykegkoho ekyókxoho yókxexma keso náxop, eñama kélwanyeykha.

Sofonías 3:19 Referans Kwoze

Isaías 60:14

Elya'áwak sa' kéxegke m'a apketchek nak énxet'ák apnaqtawáseykegkoho axta chá'a, eltekxeyagkok sa' aptapnák kélmonye'e, metwasha apagko' sa' elháxahagkok eltekxeyagkok aptapnák xóp kélchaqnágkaxa apyókxoho m'a ektáha axta chá'a apkelwanyeykha, eltéhek sa' nahan Jerusalén ‘Wesse' egegkok Tegma Apwányam apagkok’, ‘Dios Aptaqmalma nak Israel Sión apagkok’.

Jeremías 30:16

Kólmasséssók sa' eyke nahan apyókxoho m'a apmassésseyam nak chá'a kéxegke, kólnaqlakxak sa' nahan megkatnahakxa apkelókxa apyókxoho m'a kélenmexma nak; wának sa' ko'o kólyementamagkok aqsok apagkok ma'a apkelyementaméyak nak chá'a aqsok kélagkok, wának sa' nahan kólmenyexchesagkok aqsok apagkok ma'a apkelmenyexchesso nak chá'a aqsok kélagkok kéxegke.

Sofonías 3:15

Apkelwátessekmek Wesse' egegkok yaqwánxa axta etnéssesek kéxegke, apkelántekkessek nahan ma'a kélenmexma nak. Apheyk kélnepyeseksa kéxegke m'a Wesse', Wesse' apwányam nak ma'a Israel: megkólakyek sa' kaxwók xama enxoho m'a aqsok ekmaso.

Miqueas 7:10

Elwetak sa' nahan ma'a sélenmexma nak, cháxa peya sa' kalmegqaksohok apagko' xa. Hakte axta etnehek chá'a heyának se'e: “¿Háxko aphakxa Dios Wesse' apagkok?”, alanha sa' ko'o kaxwo' kólteyammaha ektémól'a yelpa' m'a ámay nak.

Ezequiel 34:16

Alchetmok sa' ma'a nepkések apkelxegányam nak, anaqlanták sa' ma'a apkelyetnakhágwayam nak chá'a apkelxega, alpextehetchesagkok sa' nahan ma'a ekhakxa nak chá'a énté xama apyók, apasmok sa' nahan ma'a apkelyelqamákpoho nak, keñe sa' amasséssók chá'a m'a apnaqmele nak tén han ma'a apkelyennaqte nak. Alanha sa' chá'a ko'o m'a, yetlo sekteméssesso m'a ekpayhawo nak chá'a anteméssesek nenláneykha.

Isaías 61:7

Kayeykhágwomhok sa' apkelxawéyak ekxámokma aqsok apkelókxa m'a énxet'ák ahagkok, hakte yeykhágweykmók axta apkellegeykegkoho apkelmegqakto tén han kélwanyeykha, megkamassegwomek sa' élpayheykekxa apkelwáxok.

Jeremías 33:9

Ekpeykeseykekxa ewáxok sa' ko'o atnessásekxak ma'a Jerusalén, séláyo tén han seyeymáxkoho nápaqta'awók apyókxoho énxet'ák apheykha nak keso náxop. Apkelleg'ak sa' agkok apyókxoho énxet'ák peya ko'o wáphássesek nepyeseksa aqsok éltaqmela m'a apheykha nak Jerusalén, tén han peya agkések ekyókxoho ektaqmelwayam nak negha, elpexyennók sa' apkelaye.”

Isaías 60:18

Kamaskok sa' kañexchek kaxwók ekyennameykhaxma apkelyennaqteyáseykha apyempe'ék énxet ma'a kañe' xapop kélagkok nak, kamaskok sa' nahan kélmassésseyam aqsok tén han kéltawáseykha, kaltamhaxchek sa' aqsa kélhaxta nak nepyáwa tegma apwányam kélagkok ‘Segwagkasso teyp’ keñe sa' ma'a atña'ák kélagkok nak kaltamhaxchek ‘Nélpeykessamo Dios’.

Ezequiel 39:26

Wánchásekxak sa' ko'o makham anaqlósawakxak ma'a nepyeseksa nak énxet'ák apheykha nak mók apkelókxa tén han ma'a apkelókxa nak ma'a apkelenmexma; keñe sa' kataqmelhok apheykha m'a xapop apagkok apagko' nak, méko sa' kalyegwakkasha chá'a. Axekmósek sa' ko'o ektémakxa sektaqmalma m'a, elwetak sa' nahan apxámokma apagko' ma'a pók aptémakxa nak chá'a énxet'ák. Kalwagqamagkok sa' nahan apkelmegqakto eñama seyenseyam ma'a énxet'ák Israel.

Jeremías 46:28

Ektáhak ko'o sekpeywa s'e, sektáha nak Wesse': Jacob énxet'ák apagkok, apteme nak séláneykha, nágkóle, hakte ekheyk ko'o xamók kéxegke. Amasséssók sa' ko'o ekyókxoho apkelókxa, cham'a sélya'assamakxa axta chá'a ko'o kéxegke séxpánchessama. Keñe sa' kéxegke mamassésseme'; allegássesagkohok sa' aqsa ekpayhawo nak atnéssesek séllegassáseykegkoho: megkatnehek sa' mallegassáseykegkoho kéxegke.”

Isaías 62:7

nágkólho ellókasek apyampé ekwokmoho apkelánekxo makham ma'a Jerusalén, tén han ekwokmoho apkeltamho elxénmakha makham ektaqmela m'a apyókxoho énxet'ák.”

Isaías 26:11

Wesse', appenchessek xép aptáhakxa yaqwayam ellegássesagkoho', makke elya'ásegkok ma'a; apkelwet'ak sa' agkok ektémakxa ekyawe apkelásekhayo exchep ma'a énxet'ák apagkok, elmegqeyk sa'. ¡Kamassessamho annal'a aplo xa énxet'ák nak!

Jeremías 31:8

Wának sa' ko'o elchexyók makham apkeleñama m'a apkelókxa ekpayho nak nexcheyha, wánchásekxak sa' makham ekweykmoho m'a néxa xapop nak. Elyetlanták sa' nahan elchexyók ma'a meyke nak apaqta'ák, tén han ma'a ekmaso nak apkelxega, tén han kelán'a lós'awo', tén han ma'a naqláw'ák nak; ¡elchexyók sa' apxámokma apagko'!

Ezequiel 16:27

“Axta keñamak seklegassásegkoho ko'o exche': ekteméssessek axta meyke aqsok ekhakxa, tén axta sekmésa m'a tegma apkelyawe nak filisteos apchókxa, cham'a aptaqnagkamo nak tén han megkaleklo nak apwáxok ma'a ektémakxa ekmaso segmegqassamo nak.

Ezequiel 16:57

megkóteyamaxchexa axta makham ma'a ektémakxa ekmaso; keñe so kaxwo nak ekxéneyncha'a ekmaso m'a kelán'ák ekheykha nak tegma apkelyawe Edom tén han ma'a filisteos apchókxa, tén han ma'a ekyókxoho ekheykha nak ketók axagkok; ¡Apyókxoho énxet apwanyeykha!

Ezequiel 39:13

Apyókxoho énxet sa' eltemeykha elátawanyek ma'a, katnehek sa' xama ekhem melwagqayam xa. Axekmósek sa' ko'o seyeymáxkoho xa ekhem nak. Ko'o sekxeyenma sektáha nak Wesse'.

Zacarías 8:23

Diez énxet sa' chá'a emássesagkok aptaxno xama Judío énxet xa ekhem nak, cham'a apkeleñama nak chá'a mók apkelókxa, keñe sa' etnehek chá'a yának se'e: ‘¡Negmakók negko'óxa ólyetlakxak kéxegke, hakte nenlegayak chá'a amya'a apha kélnepyeseksa m'a Dios!’”

Deuteronomio 26:19

Sa' etnéssesek kéxegke néten agko' kéláyo nepyeseksa m'a apyókxoho énxet'ák ektáha axta apkelane, tén han kéleymáxkoho, tén han kélxénamaxche ekyókxoho yókxexma tén han ekha kéláyo, kóltéhek sa' énxet'ák apkelpagkanma m'a Dios Wesse' kélagkok, ekhawo m'a aptémakxa axta apkelanagkama.”

Jueces 1:7

Tén axta aptáha Adonisédec se'e: “Ko'o axta sekxók emonye' sélyaqténchesso apophék élyawe apmék ma'a setenta apkelwesse'e nak, tén han ma'a apophék élyawe apmagkok nak, éltémok axta chá'a ko'o eyekhamha sekto ekpalleykha m'a kóneg mésa ahagkok. Keñe kaxwo' setnéssesa ko'óxa Dios sekteméssessamakxa axta m'a énxet'ák nak.” Keñe axta kélyentamákxo m'a Jerusalén, cha'a apketsapweykekxexa axta han ma'a.

Isaías 33:1

¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

Jeremías 30:19

Sa' kañék katyapok negmeneykmasso negmésso nak ekxeyenma egwáxok Wesse' egegkok ma'a, tén han néktegmeykha ekpayheykekxa egwáxok. Metnekxeyk sa' apqántawo', hakte ko'o sa' axámasagkok. Megkólwanyaha sa' nahan, hakte ko'o sa' atnéssesek ekha kéláyo.