Sofonías 3:18 - Biblia Enxet

¹⁸ ektémól'a kalanaxchek ma'a ekhem kélessawássessamo. Aptáhak Wesse' egegkok se'e: “Almallahanchesek sa' ko'o kéxegke m'a aqsok ekmaso ekmáheyo nak káhapwa', cham'a kélmegqakto élyaqhapma nak kéxegke.

Sofonías 3:18 Referans Kwoze

Ezequiel 36:24

Alántekkesek sa' ko'o kéxegke xa ekyókxoho apkelókxa kélheykegkaxa nak chá'a nepyeseksa m'a pók aptémakxa énxet'ák; wánchásekxak sa', tén sa' wának kólmeyekxak makham ma'a xapop kélagkok axta.

Lamentaciones 1:4

¡Yaqhapmók exma m'a ámay nak Sión! ¡Méko xama énxet apye'eykekta kélessawássessamo! Meyke énxet aptáhak ma'a atña'ák nak tegma apyawe, apkellekxagweykha m'a apkelmaxnéssesso nak Dios énxet'ák apagkok, kelyaqhápeyha awáxok ma'a kelán'a étkók, legágkók ekmáske m'a Jerusalén.

Sofonías 3:20

Anaqlanták sa' ko'o kéxegke xa ekhem nak, wánchásekxak sa'; wának sa' kayaqmagkasek mók ma'a ektémakxa nak kélheykha, ekha kéláyo sa' atnéssesek tén han kélya'áseykegkoho ekyókxoho yókxexma nepyeseksa m'a apyókxoho énxet'ák nak keso náxop. Ko'o sekxeyenma xa, sektáha nak Wesse'.”

Oseas 9:5

¿Yaqsa sa' kóllának kéxegke kélessawássessamókxa nak chá'a Wesse' egegkok?

Oseas 1:11

Keñe sa' épetchekxak makham énxet'ák Judá m'a énxet'ák Israel, elyésha sa' xama apkemha apmonye' wánxa xama, elmeyenták sa' Jerusalén ma'a énxet'ák apkeleñama ekyókxoho yókxexma. ¡Awanhók agko' sa' katnehek ma'a ekhem apagkok nak Jezreel!

Ezequiel 34:13

Alántekkessekxak sa' ma'a apkelókxa nak pók énxet'ák, wánchásekxak sa', keñe sa' anaqlakxak ma'a ektáhakxa nak xapop apagkok apagko'. Anaqlakxak sa' wágwakxak aptéyak ma'a egkexe élekhahéyak nak ma'a Israel, tén han ma'a élyapwáteyak ényahamakxa nak chá'a yegmen tén han ma'a ekyókxoho yókxexma apheykegkaxa nak chá'a énxet'ák ma'a apkelókxa.

Lamentaciones 1:7

Xénwákxók awáxok Jerusalén ma'a ekhem ektamhákxo axta axakko', tén han ekyaqhápeykha awáxok; xénwákxók awáxok ekyókxoho m'a aqsok ekxámokma ekweteya axta m'a nentámen axta; xénwákxók awáxok ma'a apmoma axta élenmexma, megkólya'áya axta kólpasmok, apkelányo axta m'a élenmexma keñe apkesméssama m'a kéltemessásekxo mékoho.

Jeremías 23:3

Ko'o ahagko' sa' nahan anaqlanták apkeleymomap nak nepkések seknaqtósso apkeleñama m'a apkelókxa sélya'assamakxa axta sekmenxenma, wánchásekxak sa', keñe sa' alya'ásenták makham ma'a apteykegkaxa axta chá'a pa'at, yaqwayam sa' exámekxak makham apketkók.

Salmos 43:3

Heyaphásses ko'o élseyéxma apagkok, tén han aqsok ekmámnaqsoho apagkok, yaqwayam sa' ko'o hexekmósek ma'a ámay, ekmahéyak nak egkexe ekpagkanamaxche' apagkok, aphamakxa nak xép.

Ezequiel 9:4

aptáhak axta apcháneya s'e: “Eweynchamha sa' kañe' tegma apwányam Jerusalén, elqahássesák sa' chá'a élpayhakxa nápaqta'a m'a énxet éllapwámeyak nak chá'a tén han eyaqhe nak chá'a apkelwáxok ma'a aqsok ekmaso agko' nak élánamáxche m'a kañe'.”

Salmos 79:4

Ẽlya'ásseykmek chá'a negko'o m'a apheykha nak neyáwa negókxa; ẽlasméssegkek ma'a segwakhaya nak, ẽlxéneykha nahan chá'a ekmaso.