Sofonías 1:15 - Biblia Enxet

¹⁵ Katnehek sa' ekhem eklo xa ekhem nak, nenlegeykegkoho ekmáske tén han ekyentaxnamo egwáxok, sẽlmassésseyam tén han kéltemessáseykekxa meyke xama aqsok, ekyaqtessóxma tén han yaphope néten ekyentaxno agko';

Sofonías 1:15 Referans Kwoze

Joel 2:2

ekhem ekyáqtésso exma tén han ekho axta'a, yaphope ekyentaxno ekho pessesse. Apsawhawók sẽlpextétamo apkelyennaqte, tén han apxámokma m'a néten egkexe nak, máxa aptáhak ma'a ektémól'a ekyetcheyam la'a amonye' élseye. Megkótémaxchek chá'a katnehek nanók axta xa ektéma nak, megkólwetekxók sa' nahan chá'a katnekxa'.

Isaías 22:5

Hakte appekkenchek axta Wesse' ekha nak apyennaqte yaqwayam kawak xama ekhem negyegwakto tén han sẽlmassésseyam tén han magya'áseyak nentáhakxa m'a xóp ekyapwate ekwesey nak sẽlxekmóssamakxa aqsok. Apkelyaqnegkásegkek ma'a meteymog kélhaxta nak nepyáwa tegma; wokmók élpayheykha kélatña'ák ma'a néten meteymog élekhahéyak nak.

Sofonías 2:2

amonye' kélchempasso ektémól'a pa'at apák, ekmassamól'a aqsa xama ekhem agko'; amonye' eyáhapwe kéxegke m'a Wesse' egegkok aplo; amonye' eyáhapwe kéxegke m'a ekhem aplawa sa' Wesse' egegkok.

Sofonías 1:18

Megkalwagkasek sa' teyp sawo ekmope élmomnáwa tén han sawo ekyátekto élmomnáwa apagkok énxet'ák ma'a ekhem, aplawa sa' Wesse' egegkok, hakte kasawhohok sa' Wesse' egegkok aplo ekyókxoho apkelókxa ektémól'a táxa kalwatnek aqsok. ¡Ekmanyehe agko' sa' kólmasséssók apyókxoho apheykha nak keso náxop!

Joel 2:11

Kaxtegyók chá'a appeywa Wesse' egegkok epaqmétek apmonye'e nak sẽlpextétamo apagkok. Apxámok apagko' ma'a sẽlpextétamo apagkok; mogwanchek ólyetsetek ma'a apkelyaheykekxoho nak chá'a appeywa. ¡Yentexók agko' Wesse' egegkok ekhem apagkok! Méko awanchek kalenmaxaxkoho'.

Jeremías 30:7

¡Chágketwa'ak ekhem ekmaso, xama ekhem megkaxnémo nak ma'a mók ekhem nak! Katnehek sa' ekhem éllegeykegkaxa apkelwáxok ma'a Jacob énxet'ák apagkok, alwagkasek sa' eyke ko'o teyp.

Deuteronomio 28:52

“Ewakhekxak sa' ma'a apyókxoho tegma apkelyawe kélagkok keñe sa' ektamagkok, ekwokmoho apkelyaqnegkásegko m'a meteymog kélhaxta nak nepyáwa netna'awók agko' tén han kélhaxtegkesso nak ekyennaqte kélásenneykekxo nak chá'a; ewakhekxak sa', tén sa' ektamagkok ma'a apyókxoho tegma apkelyawe nak ma'a apchókxa apkelmésso axta m'a Dios Wesse' kélagkok.

Isaías 8:22

keñe sa' elanok makham náxop, elwetak sa' katnehek ekmaso apheykha tén han ekyaqtéssóxma, ekyaqtéssóxma tén han élyaqhápeykha apkelwáxok. Kápok sa' ekyaqtéssóxma ekyókxoho aqsok.

Joel 2:31

Kapeysemekxak sa' ekhem, keñe sa' pelten etnekxak apyexwase ektémól'a éma, amonye' ekwayam ma'a Wesse' egegkok ekhem apagkok, ekhem ekwányam sa' nahan, tén han ekyentaxno.”

Isaías 13:9

Wa'ak kaxwók Wesse' egegkok ekhem apagkok, ekhem apagkok ekmaso agko', tén han aplómo apagko', cham'a peya sa' katnessásekxak meyke xama aqsok keso náxop, tén han kamasséssók ma'a énxet'ák melya'assáxma apheykha nak ma'a kañe'.