Salmos 99:7 - Biblia Enxet

⁷ Elpaqhetchesek axta chá'a Dios ma'a kañe' yaphope, apkeláneykegkek axta chá'a m'a apkeltémókxa axta chá'a etnahagkok, tén han ma'a segánamakxa apmésso axta.

Salmos 99:7 Referans Kwoze

Éxodo 33:9

Aptaxnegwákxeyk axta agkok chá'a Moisés ma'a, kaweywenták axta chá'a m'a yaphope émha ekwenaqte, keytnaták axta chá'a m'a átog nentaxnamakxa nak kélpakxanma neyseksa appaqhetchesso Wesse' egegkok ma'a Moisés.

Números 12:5

Tén axta Wesse' egegkok apweywénto yetlo xama yaphope ekyentaxno agko', apkenegwa'akteyk axta m'a átog nak kélpakxanma; yetlókok axta apwóneykha Aarón tén han María. Xama axta élmahágko m'a,

Deuteronomio 4:5

Élxekmóssegkek axta ko'o kéxegke segánamakxa tén han nélánémaxchexa nak antéhek apkeltémo axta ko'o alxekmósek ma'a Dios Wesse' ahagkok, yaqwayam sa' kóllanagkok chá'a m'a apkelókxa yaqwánxa sa' kólhamok.

Proverbios 28:9

Agkok emakók kélxama elyahakxohok ma'a Dios segánamakxa apagkok, memek sa' nahan takha' nempeywa nélmaxnagko apagkok ma'a Dios.

Salmos 105:28

Apcháphassegkek axta Dios ekyáqtessóxma, eyapma axta ekyókxoho aqsok, axta eyke yaháxenmok appeywa m'a egipcios.

Deuteronomio 33:9

aptéma axta chá'a elának apyapmeyk se'e: ‘Malweteyk ko'o xama enxoho m'a’, aptéma axta chá'a elxének apkelyáxeg'a s'e: ‘Malya'ásegkok ko'o m'a’, aptéma axta chá'a elxének apketchek se'e: ‘Malya'ásegkok ko'o xa, yaqsak kexa.’ Apkeláneykegkek ektémakxa nak appeywa xa énxet'ák nak, apkelmeyásamakpók apagko' nahan ma'a ekhémo mók nélpaqhetchásamáxkoho apagkok nak.

Éxodo 40:16

Apkelanak axta Moisés ekyókxoho m'a apkeltamhókxa axta etnehek ma'a Wesse' egegkok.

Éxodo 19:9

Tén axta aptáha apcháneya Wesse' egegkok se'e: —Elano, atnegwaták sa' ko'o apmonye' exchep neyseksa xama yaphope ekyentaxno agko', yaqwayam enxoho ellegak apaqhetchesek ma'a énxet'ák nak, tén sa' keytek chá'a kéláyo exchep. Apkelánekxók axta makham apkeltennasso Moisés Wesse' egegkok ma'a aptáhakxa axta apkelátegmoweykegkokxa m'a énxet'ák.

Números 16:15

Aplókók apagko' axta m'a Moisés. Aptáhak axta apcháneya Wesse' egegkok se'e: —¡Ná ema aqsa takha' aqsok apkelmésso naqsa apkelseykentegkesso xa énxet'ák nak! Malyementamák ko'o xama enxoho yámelyeheykok apnaqtósso m'a, matnéssesseykmohok nahan exma ekmaso xama enxoho m'a.