Salmos 32:5 - Biblia Enxet

⁵ Éltennássek axta eyke ko'o exchep may'assáxma meyke seyáyam xama enxoho, tén han sektémakxa ekmaso; xénchek axta ko'o ewáxok altennaksek may'assáxma, keñe axta exchep, Wesse', meyaqmagkásekxo.

Salmos 32:5 Referans Kwoze

Proverbios 28:13

Asagkek katnehek apha m'a énxet appósso nak chá'a mey'assáxma; yásekhekxohok eyke chá'a Dios ma'a énxet apkeltennasso nak chá'a aptémakxa, tén han apyenyeykekxa nak chá'a.

2 Samuel 12:13

Keñe axta David aptáha apcháneya Natán: —Éláneyak ko'o may'assáxma nápaqtók Wesse' egegkok. Keñe axta Natán aptáha apchátegmowágko: —Meñássesagkók sa' eyke exchep Wesse' egegkok aptémakxa mey'assáxma, megyetsepek sa' han.

Salmos 38:18

¡Axének sa' ko'o may'assáxma, hakte tawáseykha élchetamso ewáxok!

Isaías 65:24

Wátegmowagkok sa' chá'a ko'o, amonye' sewóneykha xa énxet'ák nak; añak sa' nahan chá'a aptáhakxa apkelpeywa, amonye' apsawhéyak apkelpaqmeyesma.

Oseas 6:1

Kólchexyem kélyókxoho, agyo'ókxak makham Wesse' egegkok. Ẽlekkexmeyk axta negko'o m'a, sa' eyke hẽltaqmelchessók makham ma'a; ẽlyensáseykegkek axta, sa' eyke hẽlpextehetchesek makham nélyense m'a.

Job 33:27

Sa' etnehek se'e: “Éláneyak ko'o may'assáxma, éláneyak han ma'a megkapayhawo nak antéhek, makke emáheyók heñássesagkohok ma'a Dios;

2 Samuel 24:10

Chaqhak axta apwáxok David eyesagko aptáhakxa apnaqtáxésagko apkelwesey weykcha'áhak, keñe axta aptáha apkeltennasa Wesse' egegkok se'e: —Élanak ko'o ekyawe agko' may'assáxma sélana xa aqsok nak. Wesse' ahagkok, éltamhók eyke ko'o heyásekhekxohok makham neyseksa sélane xa aqsok ekmaso nak, ko'o sektáha nak xép apkeláneykha, asagkek ko'o sektáhakxa, máxa ektáhak ma'a énxet ekyeyháxmal'a.

Salmos 103:12

Makhawók chá'a hegya'ássesek ma'a mólya'assáxma nak negko'o, ekhawo ektémakxa nak ekyetno makhawók mók ma'a teyapmakxa ekhem tén han taxnegwánxa ekhem.

Salmos 30:5

Hakte megkawegqók chá'a aplo m'a, megkamassegwomek eyke m'a ektaqmeleykha nak chá'a apwáxok henlano'. Nenlekxagweyha agkok chá'a axta'a, keñe axto'ók chá'a kapayhekxak egwáxok.

Salmos 103:3

Cha'a meyaqmagkáseykekxa ko'o ekyókxoho may'assáxma m'a, tén han setaqmelchesseyam ekyókxoho sekháxamáxche',

Salmos 86:15

Wesse', xép akke apteme Dios ektaqmeleykha apwáxok, tén han apmopyósa henlano', mepekhésamap, tén han ekyawe segásekhayo, apteme apmámnaqsoho.

Salmos 86:5

Wesse', tásek xép awáxok, meyaqmagkásekxeyk nahan nentémakxa; elásekhohok chá'a exchep ma'a apwóneykha nak chá'a.

2 Samuel 12:9

¿Yaqsa ektéma melyaheykekxoho nak sekpeywa, apkeláneya m'a aqsok megkaleklo nak ewáxok? Apchaqhegkek xép ma'a Urías, apteme axta hitita, apchásenneykekxo yaqhek ma'a amonitas, apmeykekxeyk han aptamheykekxo aptáwa' m'a Urías axta aptáwa'.

Josué 7:19

Aptáhak axta Josué apcháneya m'a Acán: —Eyáxeg, etnésses sa' apcheymákpoho Wesse' egegkok, Dios apagkok nak Israel. Héltennés sa' ma'a aqsok apkelane nak. ¡Ná ekpós aqsa!

Jeremías 3:13

Eyke kay'ásegwakxoho aqsa m'a ektémakxa ekmaso, tén han énmexeykekxo m'a Dios Wesse' agkok; ekweynchámeykencha'a chá'a ektegyeykencha'a énxet apkeleñama mók nekha yaqwayam kagkések ekyókxa, m'a kóneg nak yenta'a élyentaxno pessesse agkok, tén han megkalyeheykekxo m'a séltémókxa nak katnehek. Ko'o sekxeyenma xa, sektáha nak Wesse'.”

Jeremías 2:35

Naqsók eykhe chá'a kéltéma kélpeywa kélyókxoho s'e: ‘Méko negko'o néltémakxa. Massék negko'o sẽltaqnaweygko m'a Dios.’ Alyekpelkohok sa' ko'o kaxwók kéxegke, hakte kélxeyenmeyk chá'a megkóllánéyak megkólya'assáxma.

Jeremías 2:23

Megkólwanchek kéxegke kóltéhek kélpeywa s'e: ‘Mólpeysegkesamaxchek negko'o, mólpeykessamók han ma'a aqsok kéláyókxa élmowancha'a amya'a nak.’ Kóllano kéltémakxa axta m'a yókxexma ekyapwátegweykenxa nak xapop, kóllano ekyókxoho aqsok kélláneyak axta, kéxegke kélhémo nak yányátnáxeg apkelwána apyennaqtél'a apxega, apweynchámeykhal'a ekyókxoho yókxexma;

Proverbios 30:20

Keso ektémakxa kelán'a ektawáseykegkoho nak chá'a atáwa' s'e: kapathetagkok énxet, kayaqpaksek yegmen, keñe kaxének chá'a megkalana aqsok ekmaso.

Malaquías 3:8

Keñe ko'o sektáha sélmaxneyencha'a s'e: ¿Apwancheya xama énxet emenyexchesek aqsok ma'a Dios? ¡Hakte élmenyexmeyk chá'a ko'o kéxegke! Keñe kéltáha makham sélmaxneyencha'a s'e: ‘¿Yaqsa aqsok negmenyexchessama chá'a exchep?’ ¡Neykhe m'a ekwayam nak chá'a diez ekyókxoho xama aqsok, tén han ma'a aqsok sélmésso naqsa nak chá'a!

Job 31:33

Makpóssók nahan chá'a xama enxoho m'a aqsok magwaqhémo, aptamheykegko nak chá'a m'a pók énxet'ák, mamáheyók han akpósek

Jeremías 31:20

“Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

Levítico 5:5

“Énxet eksexnenagko enxoho apteme xa ekyókxoho aqsok nak, kéméxcheyk exénekxohok ma'a mey'assáxma apkelane nak,

2 Samuel 24:17

Xama axta apwet'a David Wesse' egegkok apchásenneykha apkellegassásegkoho axta m'a énxet'ák, aptáhak axta apcháneya Wesse' egegkok se'e: —¡Ko'o sélane may'assáxma! ¡Ko'o sélsexnenagko! ¿Yaqsa eyke aqsok ekmaso apkelánegko xa meyke nak apkeltémakxa'? ¡Ko'o eyke tásek heñássesagkoho', tén han ma'a énámakkok!

1 Reyes 8:50

Ná eyaqmagkásekxa aqsa melya'assáxma m'a énxet'ák apagkok, tén han apkenmexeykekxa exchep. Yána aqsa elepyóshok elanok ma'a énxet'ák ektáha axta apkelántekkesso apkelókxa.

2 Crónicas 6:29

yeyxho sa' xép ekyókxoho kélmaxnagko aptamhéyak nak chá'a m'a énxet'ák, essenhan ma'a apyókxoho énxet'ák Israel, apkelwet'a enxoho chá'a ekmaso apheykha tén han apkellegeykegkoho, apkelya'asa enxoho chá'a néten apmék etnahagkok nempeywa nélmaxnagko elpayhentámhok se'e tegma appagkanamap nak. Yeyxho sa' xeyep ma'a aphakxa nak néten, ná eyaqmagkásekxa aqsa apkeltémakxa melya'assáxma; etnésses sa' chá'a xama m'a ekpayhawo nak chá'a etnéssesek ektémakxa aqsok apkelane, hakte xép apwánxa apya'áseykegkoho ektémakxa ekmáheyo apwáxok elának énxet.

Esdras 10:11

Kólya'ásegwakxoho kéxegke kélteme kélsexnánémaxche s'e nápaqto' nak Wesse' egegkok, Dios apagkok nak kélyapmeyk, kóllána chá'a m'a apmopmenyého nak Wesse' egegkok, nágkólpaxqaha kaxwók ma'a énxet'ák melya'áseyak nak Dios, tén han se'e kelán'ák megkatnaha nak kélpeywomo xamo'.

Salmos 25:16

Wesse', epeyncháp hana hélano', kapyósho ko'o hélano', hakte exakkók ko'o, yentexek han sekha.

Salmos 25:18

Elano ektémakxa nak ko'o seklegeykegkoho, tén han sekyampayo, ná eyaqmagkásekxa ektémakxa may'assáxma.

Salmos 38:19

Apxámágkek ko'o sélenmexma, apxámok ma'a setaqnagko nak ko'o meykexho ektáhakxa.

Salmos 51:6

Naqsók chá'a exchep yásekhohok ma'a megkeyxamaxkoho nak chá'a apwáxok, egkéssegkek sekya'áseykegkoho ekweykmoho kañók agko' nak élchetámeykegkaxa ewáxok.