Salmos 19:8 - Biblia Enxet

⁸ Kelpéwók ma'a apchánamakxa nak antéhek Wesse' egegkok, hakte hegméshok chá'a ekpayheykekxa egwáxok. Cháxña'awók agko' ma'a apkeltémókxa nak antéhek Wesse' egegkok, hegya'assásegwók chá'a.

Salmos 19:8 Referans Kwoze

Salmos 12:6

Naqsók agko' ma'a apxeyenma nak Wesse' egegkok, cháxña'awók agko', ¡máxa m'a sawo ekmope ekmomnáwa agko' la'a, kéltemél'a siete kélháneykekxa'!

Salmos 119:105

Xép appeywa ekteme cháléwasso sélsássesso chá'a exma sekmahágkaxa enxoho chá'a, séltátchessesso chá'a m'a ámay ahagkok.

Jeremías 15:16

Epaqhetchessek axta agkok chá'a exchep, ataqmelcheshok axta chá'a ko'o sekháxenmo; hakte cha'a ekteme ko'o sepeykessáseykekxa chá'a ewáxok ma'a, tén han segkésso ekmátsa ewáxok, hakte ko'o apagkok xép Wesse' Dios ekha nak apyennaqte.

Proverbios 30:5

Eltaqmelcheshok Wesse' egegkok ma'a ektáha nak chá'a apcháyo, máxa xama negáhakkásamáxche etnehek; naqsók ma'a ekyókxoho aqsok apxeyenma nak chá'a.

Salmos 119:128

Cháxa keñamak seyhayo nak hepékessesagkok ma'a apchánamakxa nak antéhek, ataqnawhok ko'o ekyókxoho m'a nentémakxa megkamámnaqsoho nak.

Proverbios 2:6

Hakte Wesse' egegkok keñamak segmésso ektémakxa negya'ásegwayam aqsok; tén han sẽltámeye, keñe han negyekpelchémo.

Salmos 119:92

Kaxtemék axta mehegkésso ekpayheykekxa ewáxok ma'a nélxekmowásamáxche apagkok, heyaqhek axta ekyentaxno ewáxok.

Salmos 119:80

Kalyahakxohok sa' ko'o ewáxok ma'a ekyókxoho segánamakxa apagkok, yaqwayam sa' mamegqayhek chá'a.

Proverbios 6:23

Máxa cháléwasso eyápogwate m'a nélánemáxchexa nak antéhek tén han ma'a sẽlxekmowáseyak nak; ámay ekyennaqte egnények ma'a sẽlpeykessáseyak nak, tén han ma'a sẽlpaqhetcháseykha nak chá'a.

Salmos 119:16

Hepeykessásekxak sa' ko'o ewáxok ma'a segánamakxa apagkok, mehelwánaqmágwomek sa' ma'a appeywa.

Salmos 119:14

Kapayhekxohok agko' sa' ko'o ewáxok eytlakxak ma'a apchánamakxa nak antéhek, megkaxók sa' ma'a ekweykenxa nak chá'a ekpeykáseykekxa ewáxok ekxámokma aqsok ahagkok.

Ezequiel 36:27

Apekkenchesek sa' ko'o kélwáxok kéxegke m'a espíritu ahagkok, tén sa' wának kóllának ma'a segánamakxa ahagkok nak tén han ma'a séltémókxa nak chá'a kóltéhek;

Salmos 119:171

Malwátéssemek sa' chá'a sélpeykessamo, hakte élxekmóssegkek xép segánamakxa apagkok.

Salmos 119:143

Ekweteyak chá'a ko'o ekyentaxno ewáxok, tén han may'áseyak sektáhakxa, hepeykessásekxak eyke chá'a ewáxok ma'a apkeltémókxa nak antéhek.

Salmos 119:130

Hẽlsássesek chá'a exma sẽltennáseyncha'a enxoho chá'a m'a appeywa, kaltamaksek chá'a m'a énxet'ák meyke nak apkelya'áseyak.

Salmos 119:121

Malwátésseykmok chá'a ko'o sélane m'a aqsok ekpéwomo; ná heyenyaw aqsa hegkések ma'a setwáseykegkoho nak chá'a.

Salmos 119:40

Émenyeyk ko'o m'a apchánamakxa nak antéhek, ¡hegkés sekyennaqte, hakte xép apteme appéwomo!

Salmos 119:12

¡Wesse', élpeykessamók chá'a ko'o exchep! ¡Hélxekmós ko'o segánamakxa apagkok!

Salmos 105:45

yaqwayam enxoho elyahakxohok chá'a m'a Wesse' egegkok segánamakxa apagkok, tén han elanagkok chá'a m'a nélxekmowásamáxche' apagkok nak. ¡Aleluya!

Salmos 40:8

Dios ahagkok, kalkohok chá'a ko'o ewáxok alának ma'a apmopmenyého nak xép; ¡ekpekkenmeyk ewáxok ma'a segánamakxa apagkok nak!

Salmos 13:3

Dios Wesse' ahagkok, ¡hélano, heyátegmowák, hewasqakkásekxoho, tén sa' meytnemek ma'a aphagweykemxa nak apkeletsapma!

Éxodo 18:16

Yetneyk agkok chá'a ekteyapma apkelátegmomap nepyeseksa, elchexyamok chá'a hey'ótak yaqwayam enxoho chá'a ko'o altennásekxohok yaqsa énxet ektaqmela aptáhakxa; keñe ko'o ay'ássesagkohok chá'a m'a ektémakxa nak segánamakxa tén han ma'a ektémakxa nak nélxekmowásamáxche eñama m'a Dios.

Génesis 26:5

hakte élyaheykekxók axta ko'o m'a Abraham, apkeláneyak axta han ma'a séltémókxa nak chá'a etnehek, seyánamakxa axta chá'a etnehek, tén han segánamakxa ahagkok nak, keñe han ma'a nélxekmowásamáxche ahagkok nak.”

Isaías 64:5

Emhohok xép takha' m'a énxet apkelane nak chá'a aqsok ektaqmela yetlo ekpayheykekxa apwáxok, megkalwagqayam nak chá'a elának ma'a apmopmenyého nak chá'a exchep. Aplamchek axta exchep, hakte nenláneykegkek axta negko'o mólya'assáxma; nanók agko' axta nenlókáséyak.

Salmos 119:54

Sekmeneykmasso ko'o ektemék segánamakxa apagkok keso náxop, sekhamakxa nak yaqwatakxoho.

Salmos 119:24

Hepeykessásekxohok chá'a ko'o ewáxok ma'a apchánamakxa nak chá'a antéhek; cha'a ekteme ko'o sepaqhetcháseykha chá'a m'a.

Nehemías 9:13

“Tén axta apweyweykento apkenegweykto m'a néten egkexe nak Sinaí, apkelpaqhetchessegkek axta m'a ekpayho nak néten; apméssegkek axta segánamakxa ekpéwomo, tén han nélxekmowásamáxche ekmámnaqsoho, tén han apkeltémókxa nak antéhek ektaqmela.

Nehemías 8:12

Apyókxoho énxet'ák axta apkeltaqhákxak aptásweykxo aptéyak, tén han apyenágko, tén han appasmeykxo chá'a aptéyak pók, tén han apkelánegko apkelsawássessamo ekyawe, hakte apkelya'ásegwokmek axta ektáhakxa kélxekmósso.

Deuteronomio 16:14

Kalpayhekxa sa' kélwáxok neyseksa xa kélessawássessamo nak yetlo kélketchek tén han ma'a kélásenneykha naqsa nak, tén han yetlo m'a levitas, tén han ma'a énxet'ák apkeleñama nak mók apkelókxa, tén han ma'a élyeheykha nak tén han ma'a xentampe'e ekheykha nak ma'a kañe' tegma apwányam kélagkok.

Deuteronomio 16:11

Kóllának sa' kélessawassamo nápaqtók Dios Wesse' kélagkok ma'a apkelyéságkaxa sa' ekyetnamakxa m'a apwesey, yetlo m'a kélketchek tén han ma'a kélásenneykha naqsa nak, tén han yetlo m'a levitas, tén han ma'a énxet'ák apkeleñama nak mók apkelókxa, tén han ma'a élyeheykha nak tén han ma'a xentampe'e ekheykha nak ma'a kañe' kélheykegkaxa.

2 Reyes 17:37

Kóllána sa' han meyke kélyenseyam ma'a segánamakxa ahagkok, tén han seyánamakxa nak, tén han nélxekmowásamáxche', tén han séltémókxa nak kóltéhek sekmésso axta sektáxéssesso. Nágkólpeykesho chá'a m'a mók aqsok kéláyókxa nak.

Salmos 93:5

Oh Wesse', payhawok kóláwhok chá'a m'a segánamakxa apagkok. ¡Aptémakxa appagkanamap chá'a katnéssesek aptaqmalma apagko' ma'a tegma appagkanamap apagkok nak!

Salmos 111:7

Péwók ma'a aqsok apkelane nak, naqso' nahan; payhawók magya'ássók ma'a segánamakxa apagkok nak,