Salmos 17:3 - Biblia Enxet

³ Apya'ásegkok xép élchetámeykha ewáxok; axta'a chá'a hey'ótak hélanha; apkelányók xép sektémakxa ektémól'a kóllanok ektémakxa ektaqmalma kólwatnek ma'a sawo, meteyk xama enxoho ekmaso sektémakxa. Maxeyenmak ma'a aqsok megkapayhawo nak axének

Salmos 17:3 Referans Kwoze

Salmos 26:2

elano ko'o sektémakxa, ¡hékpelkoho! ¡elano ektémakxa nak élchetámeykha ewáxok, tén han ma'a kañók agko' nak ewáxok!

Salmos 39:1

Ekxeyenmeyk axta ko'o alanagkohok sektémakxa, tén han mehélanaksek may'assáxma m'a sekpeywa, tén han amágwakxak chá'a sekpeywa, apchaqnáncha'a enxoho chá'a emonye' m'a élmasagcha'a nak apkeltémakxa.

Job 23:10

Apya'ásegkok ekyókxoho ektémakxa sekxega ko'o m'a; apkelanawók agkok sektémakxa, étak sa' eyáxña'awo agko' sektémakxa ektémól'a sawo ekyátekto ekmomnáwa.

Malaquías 3:2

¿Yaqsa sa' awanchek kalenmaxaxkohok ma'a ekhem apwa'a sa'? ¿Yaqsa sa' awanchek kamallánek? Hakte ewak sa' ektémól'a táxa, yaqwayam enxoho hẽláxñásekxak negko'o, máxa sa' etnehek keltexnéyak sẽlhaxyawássesso nak egyempehek ekmanyása.

Salmos 139:1

Wesse', apkelányok xép sektémakxa, ey'ásegkok nahan;

Salmos 119:106

Éltennássek axta exchep alának aqsok, alának sa' nahan: ¡alának sa' ma'a apchánamakxa nak antéhek élpéwomo!

Salmos 66:10

Dios egagkok, apkelányok negko'o exchep nentémakxa yaqwayam ékpelkoho', ¡ẽláxñáseykekxe', máxa enteméssessók ma'a kéltémól'a sawo ekmope kólaxñásekxa'!

Miqueas 2:1

¡Énxet'ák la'aye, élxéneykha nak apkelwáxok elanagkok aqsok ekmaso neyseksa aphéyak apkelyetnamakxa néten, kelsakak agkok, elanagkok chá'a m'a élxeyenma nak apkelwáxok elanagkok, hakte yetneyk apmopwancha'a elanagkok!

Oseas 7:6

Apkelyepetchegwokmók axta wesse' apwányam yetlo élxeyenma apkelwáxok etnéssessamhok exma ekmaso, máxa axta aptamhágkok ma'a kélwatneykekxal'a táxa; etyenek chá'a axta'a m'a apkelwatneykekxa nak chá'a táxa, káléwha eyke aqsa chá'a táxa ekwokmoho élsaka.

Jeremías 50:20

Ektáhak ko'o sekpeywa s'e, sektáha nak Wesse': Megkóteyaxcheyk sa' apkelsexnánémap tén han melya'assáxma énxet'ák Israel, tén han Judá xa ekhem nak, hakte mayaqmagkásekxeyk sa' ko'o apkeltémakxa axta m'a énxet'ák seyhayo nak elweynchamha makham.

Proverbios 13:3

Nenláneykegkoho nentáhakxa nempeywa, cháxa negmeyókaxkoho egagkok egagko' xa; etwasakpohok apagko' eyke chá'a m'a énxet ekxákma nak appeywa.

Salmos 16:7

Alpeykeshok sa' ko'o Wesse' egegkok, epaqhetchesek chá'a ewáxok axta'a hélxekmósagkok.

Salmos 11:5

Elanok chá'a Wesse' egegkok ma'a apkelpéwomo nak, tén han ma'a élmasagcha'a nak apkeltémakxa, etaqnawhok apagko' chá'a m'a apkelmopmenyého nak elyennaqtésha apyempe'ék.

Salmos 7:4

¿Ekmaso enxeykel'a ekyaqmagkáseykekxak setnéssessamakxa ektaqmela émók? ¿Ektawáseykegkók enxeykel'a ko'o meykexho ektáhakxa m'a sénmexma nak?

Job 24:14

Amonye' élseye chá'a exatakhak ma'a ekyetno nak apyógkexma, yaqwayam yaqhek ma'a énxet meyke nak aqsok apagkok, keñe axta'a etnekxak chá'a apmenyexma.

1 Samuel 26:23

egkéshok chá'a ekyánmaga Wesse' egegkok ektémakxa aqsok apkelane m'a énxet ekpéwomo nak aptémakxa, tén han meyenyaweykha nak chá'a. Egkéssek eykhe ko'o Wesse' egegkok yaqwayam waqhek xép se'e sakhem nak, makke ko'o amakók atnéssessamhok exma ekmaso xép wesse' apwányam, aptáha nak apkelyéseykha Wesse' egegkok.

1 Samuel 24:12

¡Wesse' egegkok sa' etnehek segyekpelchémo negko'o s'e egqánet nak, hexnésseshok sa' mók apmáheyókxa nak xép hetnéssesek, wesse'! Keñe sa' ko'o, matnéssessamók exma ekmaso xama enxoho exchep, wesse'.

1 Samuel 24:10

Apwanchek ékpelkohok xép segkésa eykhe Wesse' egegkok yaqwayam amok ma'a kañe' nak meteymog áxwa, makke amako' waqhek xép wesse', ey'awok aqsa eweynchamha makham, hakte exchek ko'o táhak ekxéna ewáxok xép wesse': wesse' apwányam, Wesse' egegkok apagko' axta apkelyéseykha.

1 Samuel 26:11

Megyohok sa' ko'o waqhek Wesse' egegkok ma'a wesse' apwányam apkelyéseykha nak. Ema aqsa xa sawhéwa apagkok apkenegkesa nak ekpayhókxa apqátek, tén han egheykok ekyawe apagkok apyeta nak chá'a yegmen, keñe sa' óltaqhoho'.

1 Crónicas 28:9

Keñe sa' xép, hatte Salomón, ey'asagkoho sa' Dios apagkok nak apyáp, elána' sa' chá'a ekweykmoho kañók agko' apwáxok ma'a apkeltémókxa nak etnehek, tén han yetlo ekmáheyo apwáxok, hakte elanok chá'a Wesse' egegkok ma'a ektémakxa nak egwáxok, ékpelkohok han ma'a ektáhakxa enxoho chá'a ekmámenyého egwáxok, tén han élchetamso egwáxok. Apketamchek sa' agkok chá'a exchep ma'a, megkatnehek sa' chá'a méteyeykekxa'; apyenyókek sa' agkok xép ma'a, eyenyók sa' megkatnégwayam néxa m'a.

1 Crónicas 29:17

Dios ahagkok, ekya'ásegkók ko'o apteme apkelányo chá'a egwáxok, tén han apchásekhayo m'a ekpéwomo nentémakxa. Cháxa keñamak sélmésa nak xép ekyókxoho s'e aqsok nak yetlo eyáxñeyo ewáxok. Payhékxeyk kaxwók ewáxok sekwet'a énxet'ák apagkok apchaqnákxo nak se'e, apkelmésa chá'a aqsok apkelmésso naqsa yetlo melmeyágweykekxa.

Salmos 139:23

Oh Dios, elano sektémakxa ékpelkoho ewáxok; hépkeyn, ey'asagkoho élchetamso ewáxok;

Jeremías 12:3

Kaxnók ko'o, ey'ásegkók xép Wesse', éteyak nahan, apya'ásegkók nahan ektémakxa ewáxok ekmámenyého exchep. ¡Enaqlow sa' xa énxet'ák nak, ektémól'a m'a nepkések kélnaqleykekxal'a m'a aptekyómakxa; elyetnakhés sa' ma'a, yaqwayam nak etekyók ekhem ekwokmo sa' aptekyómakxa!