Salmos 141:4 - Biblia Enxet

⁴ Nágyoho ko'o kaxének ewáxok alának aqsok ekmaso; nágyoho alyetlawha m'a apkeláneykegkoho nak chá'a apkeltémakxa ekmaso, essenhan apasmok apkeláneyak ektámáxche ekyawe m'a élmasagcha'a nak apkeltémakxa.

Salmos 141:4 Referans Kwoze

Salmos 119:36

Yána kalkohok ko'o ewáxok ma'a apchánamakxa nak antéhek, nágyoho kámenyéhok ewáxok ma'a aqsok élmeñexamaxche nak.

Isaías 63:17

Wesse', ¿yaqsa ektéma apkeltémo nak ólyetnakhágwók nélyetlo m'a ámay apagkok? ¿Yaqsa ektéma sẽlyennaqtéssessama nak egwáxok yaqwayam enxoho magakyehek xép? Hẽgyo'óta makham, eñama apkelásekhayo m'a apkeláneykha nak tén han ma'a pók aptémakxa nak chá'a énxet'ák ektáha nak xép apagkok.

1 Reyes 8:58

yána sa' kanmexhok egwáxok ma'a aphakxa nak, yaqwayam sa' anlának chá'a ekyókxoho m'a apmopmenyého nak, tén han ólyahakxohok ma'a apkeltémókxa nak antéhek, tén han segánamakxa apagkok, tén han apchánamakxa nak antéhek, apkeltémo axta elanagkok ma'a ẽlyapmeyk nano' axta.

Deuteronomio 29:4

Weykmók eyke makham megkésso Wesse' egegkok kélya'áseyak se'e negwánxa nak, meltémók makham kólya'ásegwók ektémakxa ekyókxoho xa aqsok nak.

1 Reyes 22:22

Tén axta apchátegmowágko espíritu apxéna etnéssesek apkelmopwancha'a amya'a m'a apyókxoho apkellegasso nak amya'a apagkok ma'a wesse' apwányam. Keñe axta Wesse' egegkok aptáha apcháneya s'e: Exeg, elyexanchesha sa' ma'a, katnehek sa' xa apmakókxa nak etnehek.

Deuteronomio 2:30

“Axta eyke yahayók negko'o ólyeykhak xapop apagkok ma'a wesse' apwányam Sihón, hakte Dios Wesse' kélagkok nak kéxegke axta apkeltémo melyahakxeyk ma'a énxet'ák nak, yaqwayam enxoho yának kólmok kéxegke m'a, ekhawo nak makham ektémakxa s'e kaxwo' nak.

Números 25:2

keltamhók axta nahan epasmok élnapma aqsok kélnaqtósso élmésso m'a aqsok éláyókxa nak. Aptókagkek axta han israelitas ma'a ektéyak nak, apkelpeykásawók axta han ma'a aqsok apcháyókxa nak moabitas.

Génesis 27:14

Apnaqlósawákxeyk axta Jacob ma'a yát'ay apketkók, apnaqlántegkessek axta egken. Hanchek axta ekmátsa agko' ma'a, apmáheyól'a m'a Isaac,

1 Reyes 13:8

Apchátegmowágkek axta Dios appeywa aplegasso m'a wesse' apwányam: —Meytlakxeyk ko'o exchep, matwehek han sekto, meynhek han yegmen se'e kañe' nak, megkeyxek sélmésso nekha aqsok apagkok ekhéyak nak se'e tegma apyawe apagkok;

Salmos 28:3

Ná heñássesagkoho aqsa xamo' ma'a élmasagcha'a nak apkeltémakxa, nágyoho hetnehek ma'a ektamheykegkaxa nak apkeláneykegkoho nak aqsok ekmaso, negane nak kaltaqmeláha apkelwáxok elának pók, láneyók eyke m'a aqsok élmasagcha'a.