Salmos 128:2 - Biblia Enxet

² Etwok sa' chá'a ekyánmaga aptamheykha, kapayhekxak sa' apwáxok, tásek sa' nahan chá'a katnehek ekteyapma aqsok apkelane.

Salmos 128:2 Referans Kwoze

Isaías 3:10

Apkeleñémo énxet appéwomo, hakte tásek sa' chá'a katnehek ma'a aqsok apkelane, kataksek sa' ektaqmalma apha m'a aptamheykha eñama apwasqápeykekxoho.

Isaías 62:8

Naqsók kaxwók aptáha appeywa Wesse' egegkok apya'asa néten apaktog apkelya'assamakxa ekha nak ekyennaqte s'e: “Magwohók sa' chá'a kaxwók etawagkok hótáhap apaktek kélagkok ma'a kélenmexma nak. Magwohok sa' nahan kaxwók énagkok vino kélláneyák nak ma'a énxet'ák apkeleñama nak mók nekha;

Deuteronomio 28:4

Tásek sa' katnehek ekheykha m'a kélketchek, xámok sa' katnehek, tén han ma'a aqsok kélcheneykekxa nak, tén han étkók nak ma'a weyke kélnaqtósso, nepkések tén han ma'a ekyókxoho aqsok kélnaqtósso nak.

Deuteronomio 28:11

Exekmósek sa' apkelásekhayo kéxegke Wesse' egegkok elmések ekxámokma agko' ma'a kélketchek, tén han ekxámokma étkók ma'a weyke kélnaqtósso tén han ekxámokma agko' ma'a aqsok ekyexna kélcheneykekxa kélnakxo eñama m'a xapop apxeyenma axta naqsók egkések kéxegke m'a kélyapmeyk nano'.

Eclesiastés 8:12

¡Cháxa ektémakxa nak chá'a m'a énxet apkelane nak aqsok ekmaso, cham'a apkelenxanmeykegkoho nak chá'a apkelane aqsok ekmaso, kawegqohok chá'a apha! (Ekya'áseykegkók eyke ko'o m'a énxet'ák apkeláyo nak chá'a Dios, tén han ma'a apkelyeheykekxoho nak chá'a, tásek héxta chá'a katnehek apheykha;

Jeremías 22:15

¿Apkenagkamcheya anxek aqsa segwakhe yámet cedro nenteme nak wesse' apwányam? Payheykekxeyk axta apwáxok neyseksa apha m'a apyáp nano', apkeláneyak axta eyke chá'a aqsok yetlo ekpéwomo aptémakxa, tén han ekpayhawo nak chá'a etnehek, axta keñamak ektaqmalma chá'a aqsok apkelane.

Isaías 65:13

Cháxa keñamak aptáha nak appeywa Wesse' egegkok se'e: “Yetneyk sa' chá'a katnehek aptéyak ma'a séláneykha; keñe sa' kéxegke kóllegagkohok meyk élnapma; yetneyk sa' katnehek ma'a apyenéyak, keñe sa' kéxegke kóllegagkohok hem élnapma; kalpayhekxak sa' apkelwáxok ma'a, keñe sa' kéxegke kólmegqe';

Deuteronomio 28:51

Etókasek sa' ma'a étkók nak weyke kélnaqtósso tén han ma'a ekyexna nak eñama m'a xapop kélagkok, ekwokmoho apteméssesa meyke agko' aqsok; megyeygkesek sa' ma'a hótáhap apaktek, tén han ma'a vino, tén han ma'a pexmok égmenek, tén han ma'a étkok nak ma'a weyke kélnaqtósso tén han nepkések, kólmaskok sa' meyk élnapma.

Deuteronomio 28:39

Kólchenekxak sa' chá'a m'a anmen yámet, kóllanha sa' nahan chá'a, megkólyenagkek sa' eyke m'a égmenek nak, megkólnakxek sa' nahan ma'a ekyexna nak hakte askok sa' kasáwak ma'a ekyókxoho nak.

Génesis 3:19

Katyapok sa' chá'a apyemes ekpayhakxa nápat étak apto, ekwokmoho aptamhákxo makham xapop, apkeñamakxa axta apkelánamap, hakte xapop xeyep, xapop sa' han etnekxa'.

Salmos 109:11

Elsakxak sa' ekyókxoho aqsok apagkok ma'a apmássáseykha nak chá'a selyaqye apagkok. Elyementamok sa' apwete nak chá'a eñama aptamheykha m'a énxet'ák melweteya nak.

Deuteronomio 28:8

“Etaqmelchessesek sa' Wesse' egegkok ma'a kélxátamakxa nak chá'a aqsok aktek ekyexna kélcheneykekxa tén han ma'a ekyókxoho aqsok kéllanakxa enxoho chá'a, yának sa' kalpayhekxak kélwáxok neyseksa kélheykha m'a apchókxa yaqweykenxa nak egkések.

Salmos 1:3

Cháxa énxet nak, aphawók ma'a yámet kélcheneykekxal'a neyáwa wátsam, ekyexnamól'a kammok ekhem agkok ekyexnamakxa, cham'a megkalyamayél'a chá'a áwa'. ¡Tásek chá'a katnehek ekteyapma m'a ekyókxoho aqsok apkelanakxa enxoho!