Salmos 101:5 - Biblia Enxet

⁵ Alwanmeyásekxak sa' chá'a m'a apkelyexamakpoho nak chá'a apkelxéneykha ekmaso m'a apheykha nak ketók apheykegkaxa'; ¡megkalchehek sa' ko'o ewáxok ma'a apkelásennómap nak, tén han ma'a éleymáxkoho apkelwáxok!

Salmos 101:5 Referans Kwoze

Salmos 18:27

Elwagkashok eyke chá'a exchep teyp ma'a megkaleymáxkoho nak apkelwáxok, mékoho eyke chá'a etnessásekxak ma'a éleymáxkoho nak apkelwáxok.

Salmos 15:3

mexeyenma nak chá'a ekmaso pók, metnéssesseykmoho nak exma ekmaso m'a apxegexma, metaqnagko nak ma'a apha nak ketók apxagkok;

Proverbios 30:13

Yetneyk énxet apkenagko nak etnahak ekyawe kéláyo, elanok chá'a pók yetlo eyeymáxkoho apwáxok.

Salmos 50:20

Kólxénmakha chá'a ekmaso kélnámakkok, ¡Kólenmexmakha chá'a kélyáxeg'a kélagko' nak!

Daniel 4:37

“Élpeykessamók ko'o kaxwók ma'a Wesse' Apwányam apha nak néten, ko'o Nabucodonosor, eyáyók han, ekteméssessegkek han apcheymákpoho, hakte naqsók agko' ma'a ekyókxoho aqsok apkelane nak, péwók nahan, apwanchek etnessásekxak mékoho m'a apkenè nak chá'a etnahak ekha kéláyo.”

Proverbios 20:19

Mopwanchek meltennaha m'a énxet apkeltennágwayam nak aqsa chá'a nátegma, ná epaxqaha chá'a m'a énxet'ák apkeltennágwayam nak aqsa chá'a amya'a nátegma.

Ezequiel 22:9

Yetneyk nahan chá'a nápakha énxet'ák apagkok apkelsexnenagko apnámakkok apkeletsapma, eñama apkelmopwancha'a amya'a; tén han appásegwayam chá'a élánamáxche ektámaxche ekyawe m'a néten egkexe, eñama kéllánésso m'a aqsok kéleykmássesso, tén han apkelánéyak chá'a m'a aqsok ekmaso agko' nak.

Isaías 2:11

Elháxahagkok sa' yetlo apkelmegqakto m'a énxet'ák apkeleymákpoho nak; kólmasséssesek sa' nahan apkeleymákpoho m'a apkene nak etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak,

Proverbios 25:23

Kasógmohok chá'a ekmámeye m'a excheyha, keñe negya'ásseyam ekmaso m'a eklo nak négát.

Proverbios 10:18

Ekpósek chá'a ektémakxa aplo m'a énxet apmopwána nak amya'a, keñe m'a élyeyháxma nak elsawha aqsa chá'a apkelmopwancha'a amya'a.

Salmos 138:6

Netnók eykhe aphakxa m'a Wesse' egegkok, étak eyke chá'a m'a énxet megkeymáxkoho nak apwáxok, makhawók chá'a ékpelkohok ma'a apcheymákpoho nak.

1 Samuel 2:3

Méko sa' keyxkohok ekpeywa kapaqmeyesmakha, méko sa' kapaqmeyesmakha kaxénaxchekxohok agko', hakte Wesse' egegkok apteme Dios apya'áseykegkoho ekyókxoho aqsok, cha'a apkelyetsátéyak chá'a aqsok apkelane nak énxet tén han apkelyekpelchémo.

Levítico 19:16

“Nágkóltemeykha kélmowána amya'a nepyeseksa énxet'ák kélagkok. “Nágkólwéhenekxoho chá'a m'a kélmók apmáheyo yaqhek pók. Ko'o sekteme Wesse' kélagkok.

Éxodo 23:1

“Ná exén chá'a amya'a ekmowána amya'a, ná ewhánho nahan énxet ekmaso nak aptémakxa yaqwayam exének ma'a amya'a megkamámnaqsoho nak.

Éxodo 20:16

“Ná etne apmopwána amya'a exének ekmaso pók.

Proverbios 21:4

Negwanyémo egmók, eyeymáxkoho egwáxok; cháxa melya'assáxma élmoma nak apkelwáxok ma'a énxet'ák élmasagcha'a nak apkeltémakxa'.