11 Nágkatneykha aqsa awáxok. Apkelya'ásegkók eyke kaxwók xeye' apyókxoho énxet'ák ahagkok ektáha kelán'a ektaqmalma ektémakxa. Atnehek sa' ko'o m'a ektáhakxa exchek seyáneya exche'.
Askehek agwetak entáwa' ektaqmalma nak ektémakxa'; ¡yeykhásseykmók ektémakxa ekmomnáwa m'a meteymog éltaqmalma nak!
Kapeykessásekxak chá'a apwáxok atáwa' m'a kelán'a ektaqmalma nak ektémakxa', kahaxaksek agko' eyke chá'a aptáwa' énxet ekmaso nak ektémakxa'.
Naqsók eykhe ko'o sekteme émók ahagko' xeye'. Yetneyk eyke nahan pók ekteme mók xeye'; eyke ektáha ketók agko' mók xeye' m'a, kaxnók ko'o.
Apxekmowáseykpek axta han Wesse' egegkok xa axta'a nak. Aptáhak axta apcháneya s'e: “Ko'o sekteme Dios apagkok ma'a apyáp axta Abraham. Nágye aqsa, ekheyk ko'o xamo' xép. Apasmok sa', axámássesagkok sa' han aptawán'ák neptámen, eñama m'a séláneykha Abraham.”