Oseas 3:1 - Biblia Enxet

¹ Aptáhak axta makham seyáneya Wesse' egegkok se'e: “Exeg makham, yásekhekxoho makham ma'a kelán'a élane nak ma'a pók, cham'a ektawáseykegkoho nak atáwa' élánegwayam pók énxet. Cháxa aptémakxa Wesse' egegkok apkelásekhayo m'a israelitas, elyo'ókxohok eykhe chá'a m'a mók aqsok apkeláyókxa nak, etawagkok han chá'a m'a anmen yámet ekyexna kélyamasso kélyaqyeyáseykekxa kélmésso nak chá'a.”

Oseas 3:1 Referans Kwoze

Jeremías 31:20

“Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

Isaías 45:22

“Énxet'ák, kélheykha nak ekyókxoho apkelókxa keso náxop hélyo'óta ko'o, ko'o sa' alwagkasek teyp, hakte ko'o sekteme Dios, méko pók.

Miqueas 7:7

Aleyxek sa' eyke ko'o m'a Wesse' egegkok; malwataksek sa' sélhaxanma m'a Dios ahagkok sewagkasso nak teyp, hakte yeyxhok sa' ko'o sélmaxnagko m'a.

Oseas 11:8

“¡Mowanchek ko'o eytnakhaksek xép Efraín! ¡Mowanchek ko'o ayenyók xép Israel! ¿Ewanchek enxeykel'a amasséssók ektéma axta sekmassésseykmo m'a tegma apwányam nak Admá? ¿Ewanchek enxeykel'a atnéssesek xép sekteméssessamakxa axta m'a Seboím? ¡Megkeynnák ko'o ewáxok, awanhek apmopyósa sélányo exchep!

Zacarías 1:16

Cháxa keñamak sektáha nak sekpeywa, ko'o sektáha nak Wesse': Ekya'aweykteyk ko'o makham yetlo seyásekheykekxoho m'a Jerusalén, wának sa' kólxátekhásekxak ma'a tegma appagkanamap tén han ma'a apyókxoho tegma apwányam nak.’”

Jeremías 3:20

Kéltemék kéxegke sélyenseykmo sélyetleykha m'a, ektémól'a kelán'a ektawáseykegkoho atáwa' élánegwayam la'a chá'a pók énxet megkatnahakxa atáwa'. Ko'o sekxeyenma xa, sektáha nak Wesse'.

Salmos 123:2

Nélenmexawók negko'o aphakxa exchep negwóneyncha'a Wesse', Dios egagkok, aptémól'a elanha apmék wesse' apagkok ma'a apkeláneykha, ektémól'a kalanha ámek wesse' agkok ma'a éláneykha, nélhaxanma negko'o kapyóshok henlano'.

Amós 6:6

kólmaha chá'a egheykok élyawe kólyenagkok ma'a vino, kólexpaqhaxchek chá'a m'a sokmátsa élmátsa agko' nak élpaqneyam élmomnáwa, ¡megkalyetnakhassamók kélwáxok ekmasagko m'a kélókxa!

Amós 2:8

Exnagkok chá'a néten apáwa kélmésso nak chá'a sekxók ekyaqmageykekxa aqsok apagkok kélmassáseykha, epasmok etawagkok ma'a nento kéllánesso nak aqsok kéleykmássesso; etegyagkok chá'a anmen yámet égmenek ma'a selyaqye apkelhaxyawassáseyak nak chá'a apnámakkok meykexho aptamhágkaxa, énagkok chá'a m'a apkelpeykessamókxa nak aqsok apcháyókxa.

Nehemías 9:31

Apkelásekhayo ekyawe axta eyke keñamak memassésseykmo apyókxoho, tén han mekxakhama; hakte xép apteme Dios ektaqmeleykha apwáxok, tén han apmopyósa henlano'.

2 Reyes 13:23

Apkelapyósegweykmek axta eyke apkelányo Wesse' egegkok, chaqhegkek axta apwáxok apkelányo, apkelányók axta chá'a eñama m'a aphéssamo axta mók apkelpaqhetchásamákpoho m'a Abraham, Isaac tén han Jacob, axta emáheyók emasséssók, tén han elántekkesek ma'a aphakxa nak, wokmók eyke makham metnéssesso s'e kaxwo' nak.

2 Samuel 6:19

keñe axta apkelmeyásegko chá'a apyókxoho israelitas apkelwayam axta m'a, énxet'ák tén han kelán'ák, xama pán, tén han xama torta apkelánamap nak yátapa'ag apyexna kélyaqyeyáseykekxa', tén han anmen yámet ekyexna nak kélyamasso kélyaqyeyáseykekxa'. Keñe axta natámen apkeltaqháwo apyókxoho apkelmeyákxo makham ma'a apxanák.

Jueces 10:16

Tén axta israelitas apkexeygko m'a aqsok kéláyókxa éleñama nak mók nekha, yaqwayam elpeykeshok makham ma'a Wesse' egegkok. Massék axta ekyenna apwáxok Wesse' egegkok apkelano ektémakxa apkellegeykegkoho chá'a m'a israelitas.

Jueces 9:27

apkelxegkek axta énxet'ák apkelmahágko namyep apnakxégko anmen yámet ekyexna, apkelánegkek axta vino, apkelánegkek axta ekwányam agko' apkelsawássessamo, aptókagkek axta aptéyak, apyenágkek axta han ma'a tegma apkelpeykessamókxa axta chá'a aqsok apcháyókxa, apxénáha axta ekmaso m'a Abimélec.

Éxodo 32:6

Mók ekhem axta entáhak, axto'ók agko' axta apnaqxétekhágko, apkelwatneyk axta aqsok, apkelnapchek axta nahan apnaqtósso segwetassamo nak nélásekhamaxchekxoho. Tén axta natámen apheyncha'a énxet'ák apmako etawagkok tén han énagkok anmen yámet égmenek, apkelchampákxeyk axta makham néten apmako eneywagkok yetlo apkeltemegweykmohóxma.

Oseas 7:5

Apchaqhássessek axta vino apkelámha apmonye'e kélteméssesa axta wesse' apwányam ma'a wesse' apwányam egagkok. ¡Tén axta apya'ássesa apmek ma'a ektáha axta apkesmésso!

Oseas 4:11

“Ekmaso nentémakxa mansexta, tén han negyá vino, awanchek hegyeykesek exma.

1 Crónicas 16:3

keñe axta apkelmeyásegko chá'a apyókxoho israelitas, énxet'ák, kelán'ák, xama pán, xama torta apkelánamap nak yátapa'ag apyexna kélyaqyeyáseykekxa', tén han anmen yámet ekyexna nak kélyamasso kélyaqyeyáseykekxa'.

Cantares 2:5

¡Hélák hana ko'o anmen yámet ekyexna kélyamasso kélyaqyeyáseykekxa, yaqwayam sa' eynnákxohok makham! ¡Hélák hana ko'o manzana ekyexna, ekyelqáxcheyk ko'o eñama seyásekhayo m'a sekpagkanma nak!

Oseas 2:5

Keláneyak axta ekmaso ektémakxa megkamasexta m'a egken nak, massegkek axta ekteme meyke ektémakxa', ektéma axta ekpeywa s'e: ‘Ategyaha sa' ko'o sélpathetéyak, segkésso nak chá'a sekto, tén han ma'a yegmen, tén han nepkések apwa', tén han apáwa apkeláxñeyo nak, tén han pexmok égmenek, tén han ma'a sekya.’