Números 25:6 - Biblia Enxet

⁶ Apyentamákxeyk axta nahan xama israelitas kelán'a madianita, nápaqtók Moisés, tén han ma'a apyókxoho israelitas apchaqnákxo axta m'a, neyseksa apkellekxagweykha axta m'a átog nentaxnamakxa nak kélpakxanma apchaqneykekxexa nak chá'a énxet'ák.

Números 25:6 Referans Kwoze

Joel 2:17

Kóllekxagwaha apkelmaxnéssesso énxet'ák ahagkok, apkeltamheykha nak chá'a sekhakxa ko'o sektáha nak Wesse', kólteme kólpaqmétek émha amonye' apwáxok nak tegma appagkanamap, tén han élwatnamáxchexa nak aqsok se'e: “Wesse', elásekhekxoho énxet'ák apagkok; nágyoho aqsa ey'ássók xama énxet enxoho m'a énxet'ák apagkok; nágyoho enaqtawasagkohok ma'a pók énxet'ák nak, nágyoho etnehek énxet melya'áseyak nak xép se'e: ¿Háxko aphakxa Dios apagkok?”

Números 22:4

Tén axta énxet'ák Moab aptáha apkeláneya apkelámha apmonye'e nak Madián se'e: “Hensawhaksek sa' xapop egagkok apyókxoho nak xa énxet'ák nak, ektémól'a weyke yágkelwána kasáwak pa'at ma'a yókxexma.” Balac axta nahan wesse' apwányam Moab xa apyeyam nak,

Jeremías 36:23

Xama axta appenchesa apkelyetsete Jehudí ántánxo essenhan cuatro kéltáxésso, apyaqténchek axta wesse' apwányam xama sawo m'a weykcha'áhak, tén axta apkelwatna. Cháxa apteméssesakxa axta xa, ekwokmoho eksawhéxko élmeyesma ekyókxoho m'a weykcha'áhak nak.

Jeremías 8:12

¡Kéméxcheyk eykhe elmegqágwók apkelánegko enxoho chá'a xa ektéma nak aqsok sektaqnagkamo nak ko'o! Melmegqágwakxeyk eyke, ¡melya'ásegkok ma'a ektémakxa negmegqakto! Éllegassásegkók sa' agkok ko'o m'a, elpelapmok sa', elyaqnenagkok sa' ektéma nak chá'a m'a nápakha nak. Ekxénchek ko'o xa, sektáha nak Wesse'.’”

Jeremías 3:3

Cháxa keñamak megkamámeya nak ma'a apmopsamágexal'a, tén han ma'a élyapweykxal'a. Hawók xe' megkamegqakto m'a kelán'a ekyaqmagkáseyak pók énxet ekma nak chá'a ekyánmaga ekpathetéyak; ¡kéméxcheyk kamegqágwók!

Isaías 22:12

Apkeláneyáha axta kéxegke Wesse' ekha nak apyennaqte apkeltamho kóllekxagwaha xa ekhem nak tén han kallapwomagkok, tén han kólmópésagkohok kélyese kólántaxnekxak ma'a apáwa sẽlwáxaqxamól'a magkenatchesso éllapwáméyak.

Jueces 2:4

Xama axta appenchesa apteme appeywa Wesse' egegkok apchásenneykha xa ektáha nak, axta eleyságkohok apkellekxagweyncha'a m'a apyókxoho israelitas.

Números 31:2

“Eyaqmagkáseykxa sa' xép apkeltémakxa énxet'ák Madián eñama apteméssessamakxa axta m'a israelitas, keñe sa' yetsapok.”

Génesis 37:28

Xama axta apkelwa'a apkelseykha aqsok madianitas ma'a aphágkaxa axta, aptekkessákxeyk axta apkelpepma José m'a kañe' yámelchet, apyenyókek axta ekha ekyánmaga apmésa m'a ismaelitas, veinte sawo selyaqye axta han ekyánmaga. Apyentamákxeyk axta José m'a Egipto.

Números 16:47

Aptemék axta Aarón ma'a aptáhakxa axta apcháneya m'a Moisés, apketchágkokxeyk axta apmeyákxo m'a apchaqnákxexa axta énxet'ák. Tekkessek axta aqsok ekmaso nepyeseksa énxet'ák ma'a negmasse ekmaso apcháphasso axta m'a Dios. Appekkenchek axta Aarón ma'a aqsok ánek ekmátsa nak ekpaqneyam, tén axta apkelmaxneya Dios apkeltamho meyaqmagkásekxeyk melya'assáxma m'a énxet'ák.

1 Reyes 11:18

Apkelánteyepmeyk axta Madián, keñe apkelweykmo m'a yókxexma Parán, apkelmomakxa axta nápakha énxet'ák yaqwayam etnehek apkeláneykha. Apkelweykmek axta Egipto keñe apkelmaheykegko m'a aphakxa axta faraón, wesse' apwányam Egipto, apkelmeyásegkek axta apxanák tén han aptéyak, apkelmeyásegkek axta aqsa han apkelmésso naqsa m'a xapop.

Salmos 94:16

¿Yaqsa sa' ko'o hey'áwak hepásegwak sétamakmo enxoho m'a élmasagcha'a nak apkeltémakxa, tén han ma'a apkeláneykegkoho nak aqsok ekmaso?