Miqueas 5:6 - Biblia Enxet

⁶ Sa' etnahagkok kelwesse'e apkelwányam Asiria m'a, cham'a apchókxa Nimrod, yetlo apmeykha sókwenaqte, hẽlmallahanchesek sa' nepyeseksa asirios apkelántaxna enxoho negókxa, appayhékxo enxoho m'a kañe' xapop egagkok.

Miqueas 5:6 Referans Kwoze

Isaías 14:25

Amasséssók sa' énxet'ák Asiria m'a seyókxa, alteyammaha sa' ma'a néten meteymog élekhahéyak ahagkok nak. Kamaskok sa' elhakpok énxet'ák ahagkok ma'a apkeltamheykha ekyentaxno apkelmésso nak chá'a m'a, kamaskok sa' apkelpata m'a aqsok ekyentaxno apkelpatmeykencha'a nak chá'a.

Sofonías 2:13

Ey'aksek sa' apmopwána m'a ekpayho nak nexcheyha yaqwayam emasséssók ma'a Asiria, meyke xama aqsok sa' etnessásekxak ma'a tegma apwányam Nínive, ekyamaye exma sa' etnessásekxa'.

Nahúm 2:11

¿Yaqsa ektáha m'a meteymog áxwa yámakméwa axanák nak? ¿Háxko ekhagwekxexa m'a ekheykegkaxa nak chá'a méwa étkók, élyáqtamakxa axta chá'a yámakméwa yetlo étkók meyke ektemegweykmohóxma, meykexa axta chá'a ekmenxeneykha,

Isaías 33:1

¡Xép laye, apmassésseyam nak chá'a aqsok memassegwayam nak makham! ¡Xép laye, appelakkassesso nak chá'a esexnenak pók, megkólpelakkassesso nak makham kólsexnena'! Appenchessek sa' agkok apmassésseyam aqsok, kólmasséssók sa' xép, appenchessek sa' agkok appelakkassesso chá'a apsexnenagko pók kólpelakkassesek sa' xépxa kólsexnena'.

Isaías 14:2

Elmok sa' takha' apxámokma apagko' pók aptémakxa énxet'ák ma'a israelitas, elyetlakxak sa' ekweykekxoho m'a apkelókxa, elmok sa' nahan yaqwayam etnéssesagkok apkelásenneykha naqsa m'a israelitas, cham'a Wesse' egegkok nak kañe' xapop apagkok. Elmok sa' israelitas ma'a ektáha axta chá'a apkelma, kóneg sa' etnessásekxak ma'a ektáha axta chá'a apnaqtawáseykegkoho.

2 Crónicas 33:11

Axta keñamak apchahaya Wesse' egegkok ma'a sẽlpextétamo apkelámha apmonye'e apagkok nak wesse' apwányam Asiria, apchásekkessama axta sawo élhaxe apmoma m'a Manasés, apkelpextetegkek axta cadena sawo élyexwase, apyentameykekxeyk axta m'a Babilonia.

2 Reyes 15:29

Apwokmek axta Tiglat-piléser, wesse' apwányam nak Asiria, aptémakxa axta wesse' apwányam Israel ma'a Pécah, apkelmeyk axta m'a tegma apkelyawe nak Iión, Abel-bet-maacá, Janóah, Quedes, Hasor, Galaad, Galilea keñe han ma'a ekyókxoho yókxexma nak Neftalí. Keñe axta m'a apheykha nak kañe' apkelmoma apnaqleykekxo m'a Asiria.

Isaías 37:36

Apxegkek axta m'a Wesse' egegkok apchásenneykha, apkelnáhapwokmek axta nahan ciento ochenta y cinco mil énxet ma'a apkelpakxeneykegkaxa axta m'a asirios; keñe axta mók ekhem, kelsakak axta, hágkek axta aphopák apyókxoho m'a.

Isaías 37:37

Tén axta Senaquerib, wesse' apwányam nak Asiria apleya appakxanma; aptaqháwók axta makham ma'a Nínive.

Deuteronomio 32:2

“Máxa ekmámeye sa' katnehek kapallenták ma'a nélxekmowásamáxche ahagkok, máxa yálye sa' katnehek ma'a sekpeywa, ektémól'a chawówa kapálwaták ma'a pa'at, ektémól'a kapálwaták yegmen ma'a pa'at ekpayhe.

1 Crónicas 1:10

Cus axta apyáp ma'a Nimrod, apteme axta apteyapma apmonye' énxet ekha apyennaqte keso náxop.

Job 29:22

Melpaqmétekxók axta han chá'a sekpenchesa enxoho chá'a ko'o sekpaqmeyesma. Máxa axta yegmen eksekkenma katnehek kapálwaták sekpeywa nepyeseksa m'a énxet'ák nak,

Salmos 72:6

¡Máxa ekmámeye sa' etnehek, tén han yálye, ekyássessamól'a xapop, tén han pa'at!

Salmos 110:3

Epasmekxak sa' énxet'ák apagkok peya enxoho yempakha'. Etépekxak sa' aqsa chá'a wokma'ák apagkok yókxoho ekhem ma'a egkexe élpagkanamaxche nak, ektémól'a yálye ektéyeykmohol'a amonye' ekteyapma ekhem.

Isaías 6:13

Apkeleymekpek sa' agkok nahan chá'a ektáhakxa diez xama m'a énxet'ák, kólmasséssók sa' nahan ma'a, ektémól'a kólyaqtennek ma'a xama yámet roble essenhan ma'a yámet encina, wánxa aqsa keymaxchek ma'a awhak nak.” (Katyapok sa' eyke xama éltektépeykekxa ekpagkanamaxche xa awhak nak)

Jeremías 14:22

¿Yetnéya neyseksa xama aqsok kéleykmássesso m'a ekmowána nak kamámeyaksek? ¿Awancheya káphaksohok agkok ekmámeye m'a yaphope? ¡Ma', Dios Wesse' egegkok! Xép chá'a apcháphasso m'a, xép chá'a apkelane xa ekyókxoho aqsok nak; ¡cháxa keñamak nélhaxanma nak negko'o exchep!

Sofonías 3:12

Alheyásekxak sa' ko'o kélnepyeseksa kéxegke m'a énxet'ák kéltemessáseykekxa nak meyke éleymáxkoho apkelwáxok tén han mékoho, yaqwayam sa' melya'ássók ma'a sekwesey nak.