Malaquías 3:6 - Biblia Enxet

⁶ “Ko'o sekteme Wesse' kélagkok. Mayaqmagkasseykmok mók sektémakxa. Cháxa keñamak megkólmassesseykmo nak kéxegke, kélteme nak Jacob aptawán'ák neptámen.

Malaquías 3:6 Referans Kwoze

Números 23:19

Maghawok negko'o m'a Dios nentáha nak énxet néletsapmo nak chá'a, metnehek apmopwána amya'a, meyaqmagkassemek nahan mók ma'a aqsok apxeyenma. Apxénchek agkok xama aqsok, elának nahan. Apxénchek agkok nahan élanak xama aqsok, elának nahan.

Jeremías 32:27

“Ko'o sekteme Wesse', Dios agkok ma'a ekyókxoho aqsok ekha nak élennama. Méko ko'o xama aqsok mamowagkexa alána'.

1 Samuel 15:29

Hakte metnehek apmopwána amya'a m'a Dios apcheymákpoho nak Israel, meyaqmagkassemek han appeywa, hakte háwe énxet eyaqmagkassók mók appeywa.

Isaías 44:6

Aptáhak Wesse' egegkok se'e, Wesse' apwányam apwagkasso nak teyp ma'a Israel, Wesse' ekha nak Apyennaqte: “Ko'o sekteme eyeynókxa tén han ektemegwánxa néxa; méko pók kéláyókxa, ko'o sekwánxa ahagkok.

Salmos 103:17

Megkamassegwomek eyke chá'a apkelásekhayo Wesse' egegkok ma'a ektáha nak chá'a apcháyo; megkatnégwomek chá'a néxa aptaqmelchessáseykekxa apheykha apyókxoho m'a aptawán'ák neptámen nak,

Salmos 102:26

Kalmassegwók sa' eyke ekyókxoho xa, keñe exchep memassegwome'. Apák sa' katnahagkok ekyókxoho xa, aptémól'a apáwa etnehek aphápak; ¡elyaqmagkasek sa' xép mók keñe sa' kalyaqmagkasek mók, ektémól'a kólyaqmagkasek pók apáwa kólyenyók!

Isaías 41:13

Hakte amagkok sa' ko'o exchep ma'a apmék, ko'o sektáha nak Dios Wesse' apagkok, ektemék xeyk ko'o seyáneya exchep se'e: ‘Nágyé aqsa, apasmok sa'.’”

Oseas 11:9

Matnehek sa' ma'a ektáhakxa nak eklo ewáxok: mamasséssemek sa' ko'o kaxwók ma'a Efraín, hakte Dios ko'o, háwe énxet. Sekpagkanamaxche ko'o, sekha nak aphakxa exchep, maxñekmok ko'o yaqwayam amasséssak xép.”

Salmos 78:57

aphémók axta m'a apyapmeyk nano', apkelyamasmeyk axta, apkelyenseykmek axta han apkelyetleykekxa; apkeltaqhegweykmek axta, máxa axta m'a yágke ekyetnakhágwayam la'a ekxega!

Salmos 78:38

Apyósekak axta eyke apkelányo m'a Dios, meyaqmagkásekxeyk axta chá'a apkeltémakxa ekmaso, axta han emassésseykmok; megyohók axta chá'a katxek apwáxok aplo.

Génesis 15:7

Keñe axta aptáha apcháneya s'e: —Ko'o sekteme Wesse' apagkok, ko'o axta sektekkesso exchep ma'a Ur yókxexma apagkok nak caldeos, yaqwayam agkések se'e xapop nak, yaqwayam etnehek apagkok.

Génesis 22:16

Aptáhak axta apcháneya s'e: —Aptáhak Wesse' egegkok se'e: ‘Naqsók ko'o sekxéna exchep eñama apteme xa ektáha nak, memyágweykekxa apketche xama apagko'

Génesis 15:18

Cháxa ekhem apkelanakxa axta han ekhémo mók apkelpaqhetchásamákpoho Wesse' egegkok ma'a Abram. Aptáhak axta apcháneya s'e: —Agkések sa' ko'o aptawán'ák neptámen se'e xapop nak, eyeynamo m'a wátsam nak Egipto, ekweykekxoho m'a wátsam ekyawe nak Éufrates,

Salmos 102:27

Meyaqmagkassemek eyke chá'a aptémakxa exchep, megkatnégwomek néxa apha.

Daniel 6:26

éltamhók ko'o kóláwho tén han kólyahakxohok Daniel Dios apagkok ma'a ekyókxoho yókxexma séláneykegkaxa nak. “Hakte cham'a apteme Dios megyetsapma m'a, megkatnégwomek néxa apha. Megkólmasséssemek han ma'a aptémakxa nak wesse' apwányam megkamassegwomek nahan apmopwána.

Habacuc 1:12

Wesse' egegkok, aphegkek xép meyke néxa', Dios ahagkok appagkanamap, apteme nak megyetsapma. Wesse', apteme nak semasma, apméssegkek xép apkelyennaqte caldeos, yaqwayam enxoho ellegássesagkohok énxet'ák eñama apkeltémo exchep.

Salmos 102:28

Egkések sa' meyke ektáhakxa apheykha m'a apkeláneykha aptawán'ák neptámen nak; eltaqmelchesek sa' chá'a m'a egketchek nentámen.

Isaías 46:4

atnéssesek sa' nahan chá'a ekwokmoho kéltáha kélwányamo' xa ektáha nak; kamópak sa' eyke kélpátek, apasmok sa' eyke aqsa chá'a. Éláneyak axta ko'o kéxegke, malwátéssemek sa' sélqeyneykha; apasmok sa', alwagkasek sa' teyp.