Malaquías 2:6 - Biblia Enxet

⁶ Apkelxekmóssegkek axta chá'a amya'a ekmámnaqsoho m'a Leví, axta exeyenmak xama aqsok ekmaso enxoho. Aphegkek axta meyke aptémakxa xamók ko'o. Apmasséssessegkek axta apkelánéyak aqsok ekmaso apxámokma apagko' énxet.

Malaquías 2:6 Referans Kwoze

Daniel 12:3

Máxa aqsok élápogwátéyak néten sa' etnahagkok elápogwátek ma'a apkelyekpelchémo nak aqsok, apnaqlo axta chá'a ámay ekpéwomo m'a apxámokma énxet; ¡elápogwátek sa' meyke néxa, aptémól'a yaw'a!

Jeremías 23:22

Kaxtemeyk axta apkelya'áseykegkoho m'a ektémakxa nak élchetámeykha ewáxok megkólya'áseyak nak, ellegaksek axta sekpeywa m'a énxet'ák ahagkok; yának axta eltaqhegwók ma'a ámay apagkok ekmaso apkelyetlama nak, tén han elwátésagkok apkeláneyak ma'a aqsok ekmaso.”

Oseas 4:6

Méko apkelya'áseyak ma'a énxet'ák ahagkok, la'a kélmasséssekmo nak. Keñe exchep apkelmaxnéssesso nak énxet'ák ahagkok, aptaqnagko nak ma'a negya'áseykegkoho, matnéssesek sa' ko'o kaxwók aptamheykha apkelmaxnéssesso énxet'ák ahagkok. Megkaxének sa' ko'o kaxwók ewáxok ma'a aptawán'ák neptámen nak, hakte kelwagqeykmek ma'a nélxekmowásamáxche' ahagkok, ko'o sektáha nak Dios apagkok.

Salmos 37:30

Yetlo apkelya'áseyak chá'a elpaqmétek ma'a énxet'ák éltaqmalma nak apkeltémakxa; yetlo ekmámnaqso' han chá'a etnehek apkelpeywa m'a.

Génesis 17:1

Apxekmowáseykpók axta Wesse' egegkok Abram, ektéma axta noventa y nueve apyeyam apagkok. Aptáhak axta apcháneya s'e: —Ko'o sekteme Dios ekha sekyennaqte, etne ekpéwomo aptémakxa nahaqtók ko'o.

Génesis 6:9

Keso ektémakxa axta ekxénamaxche apha Noé s'e: énxet ekpéwomo aptémakxa axta Noé, elyahakxohok axta chá'a m'a Dios, wánxa axta aqsa han apxakko' chá'a apkeláneya ektémakxa apmopmenyého Dios, nepyeseksa m'a énxet'ák aphamakxa axta.

Deuteronomio 33:10

Apkelxekmóssegkek axta segánamakxa apagkok tén han apchánamakxa antéhek ma'a Jacob, cham'a Israel; appekkenchessegkek axta chá'a nápaqtók ma'a aqsok ekmátsa nak ekpaqneyam éten agkok appekkenchessegkek axta chá'a néten ekwatnamáxchexa nak chá'a aqsok ma'a kéltósso kélmésso naqsa nak chá'a.

Deuteronomio 33:8

Keñe axta Leví aptáha apxéna s'e: “Wesse', xép apagkok ma'a, Tumim tén han ma'a Urim; apkelxawáyak nahan ma'a énxet'ák meyenseyam nak apyetleykha exchep, apyepkeynma axta chá'a m'a yókxexma Masá, apkenmexeykencha'a axta chá'a m'a nekha yegmen nak Meribá,

Deuteronomio 33:9

aptéma axta chá'a elának apyapmeyk se'e: ‘Malweteyk ko'o xama enxoho m'a’, aptéma axta chá'a elxének apkelyáxeg'a s'e: ‘Malya'ásegkok ko'o m'a’, aptéma axta chá'a elxének apketchek se'e: ‘Malya'ásegkok ko'o xa, yaqsak kexa.’ Apkeláneykegkek ektémakxa nak appeywa xa énxet'ák nak, apkelmeyásamakpók apagko' nahan ma'a ekhémo mók nélpaqhetchásamáxkoho apagkok nak.

Salmos 37:37

Elano énxet meyke nak aptémakxa, tén han eyáxñeyo nak aptémakxa: yetneyk aptawán'ák neptámen ma'a énxet meyke nak ektáhakxa apha.

Salmos 119:142

Megkatnégwomek chá'a néxa ekpéwomo m'a ektémakxa nak chá'a ekpéwomo apkelánéseykekxa apheykha énxet'ák, naqsók nahan ma'a nélxekmowásamáxche apagkok nak.

Salmos 119:151

Wesse', apheyk xép keto', naqsók nahan ekyókxoho m'a apkeltémókxa nak antéhek.

1 Samuel 2:12

Asagkek axta apkeltémakxa m'a Elí apketchek, megkalxének axta apkelwáxok ma'a Wesse' egegkok,

Proverbios 5:2

Keñe sa' ey'ásegwók apteme apmopwána apkeláneykegkoho aptémakxa, epaqmétek sa' nahan yetlo ekha ektémakxa apya'áseykegkoho aqsok.