Joel 2:3 - Biblia Enxet

³ Máxa m'a táxa eksawhomól'a kalwatnek ekyókxoho aqsok élwatnamól'a amonye' ekyeykhe; keñe ekwatneykekxohol'a ekyeyk'a enxoho. Yókxexma ektaqmalma axta sekxók megkawánxa táxa, keñe ekyeyk'a ektamhákxo m'a ektémól'a yókxexma meykexa énxet. ¡Méko xama aqsok enxoho apcháyam!

Joel 2:3 Referans Kwoze

Isaías 51:3

Kapyóshok sa' ko'o alanok ma'a Sión, tegma apwányam apmopsagko nak apyókxoho. Namyep éltaqmalma sa' atnessásekxak ma'a ekyamáyekxa nak exma xapop yókxexma meykexa nak énxet, ektéma axta m'a Edén apkeneykekxexa axta aqsok ma'a Wesse' egegkok. Keytek sa' ekpayheykekxa egwáxok ma'a tén han negátseykha, tén han negmeneykmasso tén han negháxenmo m'a kélpáwasso ekmátsa.

Génesis 2:8

Tén axta natámen Dios Wesse' egegkok apkelana yókxexma ektaqmela Edén, ekpayho nak ekteyapmakxa ekhem, keñe aphésa m'a énxet ektáha axta apkelane.

Zacarías 7:14

Axta keñamak séxpánchessama ko'o ektémól'a samaxche kaxpánchesek aqsok sélya'assama nepyeseksa m'a apyókxoho énxet'ák melweteya nak, meyke xama aqsok axta nahan tamheykekxak natámen ma'a apkelókxa, meyke xama énxet enxoho apmopwána exek. ¡Ekmaso axta aptemessáseykekxak ma'a xama apchókxa ektaqmalma agko' nak!”

Éxodo 10:15

Apsawhekxók axta m'a xapop nak ekwokmoho apyáqtéssesa exma, hakte apxámok apagko' axta, maxta agwet'ak ma'a náxop nak, aptókagkek axta m'a ekyókxoho kélcheneykekxa tén han ma'a ekyókxoho yenta'a élyawe ekyexna éleymomáxche' axta natámen ektéyam ma'a yegmen élyennaqte. Méko axta xama enxoho eyeymomáxche ekyápaqmáteyák áwa' aqsok ma'a kañe' Egipto, cham'a yókxexma nak tén han ma'a yenta'a élyawe nak.

Éxodo 10:5

Esawhekxohok sa' ma'a ekyókxoho kañe' xapop apagkok, magwetyehek sa' anlanok ma'a náxop nak hakte apxámok sa' etnehek. Etawagkok sa' ma'a aqsok éleymomáxche axta ántawo', éláyam axta m'a yegmen élyennaqte. Etawagkok sa' nahan ma'a ekyókxoho yenta'a élyawe élaqnágko nak ma'a yókxexma.

Amós 7:4

Keso sexekmósa axta ko'o Wesse' egegkok se'e: ekwet'ak axta apcháphasa táxa ekmexanma agko' yaqwayam hẽllegássesagkoho', yamássek axta ekyókxoho m'a wátsam ekwányam ekmattawóneg nak, kelwatneyk axta han ekyókxoho aqsok ma'a yókxexma.

Jeremías 5:17

Etókasek sa' ma'a aqsok ekyexna apkeneykekxa, tén han apto, elnáhakkasek sa' nahan ma'a apketchek apkelennay'a tén han kelwán'ák. Etókasek sa' nahan ma'a nepkések apnaqtósso, tén han weyke, anmen yámet apkeneykekxa, tén han higo yámet. Sókwenaqte sa' elmaha emasséssók ma'a tegma apkelyawe ekyennaqte nak kélhaxtegkáseyak nepyáwa', cham'a apchásenneykekxo nak chá'a exchep.”

Salmos 50:3

Apxegakmek Dios egagkok, makke ewanmeyakmok, xegakmek apmonye' m'a táxa ekmassésseykmoho nak ekyókxoho aqsok, wakha'ak éxchahayam ekyennaqte agko' ma'a nepyáwa'.

Génesis 13:10

Apkenmexawók axta Lot ekyókxoho ekyapwate nak wátsam Jordán, apwet'ak axta han ekyawa yegmen ekweykekxoho m'a yókxexma étkok nak Sóar, máxa axta m'a yókxexma ektaqmalmal'a. Hawók axta m'a ektémakxa axta Egipto. (Cháxa ektémakxa axta xa, amonye' axta apmassésseyam Wesse' egegkok ma'a tegma apkelyawe Sodoma tén han Gomorra.)

Salmos 97:3

xegamchek táxa eyáléwe m'a apmonye', kalwatnek chá'a m'a apkelenmexma apheykha nak nepyáwa'.

Isaías 9:18

Tawáseyha aqsok ma'a nentémakxa ekmaso, máxa táhak ma'a ektémól'a táxa eyáléwe kalwatnek ma'a yámet ekha nak am'ák tén han ma'a ekmompánaqma nak, ekweykmohol'a élwatno m'a yenta'a élaqnéyak nak naxma, keñe kay'aksek néten ma'a éten nak.

Isaías 9:19

Metchek apchókxa eñama aplo m'a Wesse' ekha nak apyennaqte, masséssekmek táxa m'a énxet'ák; aptókagkokxék chá'a aphápetek ma'a apketchek apancha'awo nak, megkalepyósak nahan chá'a apkelano m'a apnámakkok. Apheyk xama ekmanyehe nak enaqsapok apto s'e, megkeyxek eyke kaqhek aqsa chá'a meyk, kaxek chá'a mók aptawakxa á, meyaqkanmek eyke.

Isaías 14:17

aptemessáseykekxo nak meyke xama aqsok keso nélwanmégkaxa, apmassesseykmo nak ma'a tegma apkelyawe, mekxeykekxo axta m'a énxet'ák apkelmomap axta?’

Isaías 15:6

Kelyameygkek axta yámelchet ma'a Nimrim, kelyameygkek axta m'a pa'at, ketsekkek axta áwa' m'a yámet, méko axta xama enxoho eyeymomáxche m'a élyápaqmátamo nak áwa'.

Ezequiel 36:35

Tén sa' etnehek chá'a elpaqmétek se'e: Keso xapop ektamheykekxa axta ekyamayéxma meyke xama aqsok se'e, keñe kaxwók ekhágweykxoho m'a yókxexma Edén; tegma apkelyennaqte nahan kaxwók aptamhágkok ma'a tegma apkelyawe kélnaqtawáseykha axta, tén han kélpalchesso axta tén han kéltemessáseykekxo axta aphopák, apháha nahan kaxwók énxet ma'a kañe'.

Isaías 33:4

máxa sawa' apxámokmal'a apkelenmexma xa énxet'ák nak, apcháhapwokmek agkok chá'a ektamagkok, elyementamagkok chá'a m'a aqsok apagkok ekyetnakxa nak.

Habacuc 1:6

Wampakhássesek sa' ko'o m'a caldeos, énxet'ák apkello megkalmayósa nak elanok aqsok, apkelweynchámeykha nak chá'a ekyókxoho yókxexma, yaqwayam emok chá'a xapop megkatnahakxa nak chá'a apagkok.