Jeremías 49:31 - Biblia Enxet

³¹ Ektáhak ko'o seyáneya s'e, sektáha nak Wesse': ¡Kólxeg, kólchetamák xa énxet'ák megkalyetnakhassamo nak apkelwáxok xama aqsok tén han ektaqmalma nak apheykha, apheykha nak chá'a meyke atña'ák apagkok, tén han meyke apkelápeykekxa, apyetno nak apxakko'!

Jeremías 49:31 Referans Kwoze

Ezequiel 38:11

Sa' etnehek appeywa s'e: Eynnaqtések sa' ko'o émpehek atxek ma'a xama apchókxa meyke nak éleyxcháseykha, apheykegkaxa nak ma'a énxet'ák ektaqmalma apheykha, meyke nak éltamheykha apkelwáxok, cham'a apyókxoho tegma apkelyawe meyke nak kélhaxta meteymog nepyáwa, tén han meyke nak atña'ák apagkok tén han ma'a kélyennaqteyáseykekxexa nak chá'a kólápekxa'.

Miqueas 7:14

¡Wesse', eltaqmelches énxet'ák apagkok, aptáha nak nepkések apnaqtósso apagkok apagko', apkelweynchámeykha nak apxakcha'awók naxma, ekwakhaya nak xapop éltaqmalma! Enaqlakxa m'a ekhakxa nak pa'at Basán tén han Galaad, ektéma axta m'a nanók axta.

Isaías 47:8

Keyxho kaxwók se'e, kelán'a, ekmámenyého nak aqsok éltaqmalma, ekhama nak chá'a néten ektaháno ekyawe ektaqmalma yetlo meyke ektamheykha awáxok, ekteme nak chá'a awáxok se'e: ‘Ko'o aqsa, méko émók sekhawo; matnehek sa' chá'a ko'o tampe', matnehek sa' nahan chá'a meyke étchek.’

Deuteronomio 33:28

Exek sa' chá'a meyke ektamheykha apwáxok ma'a Israel, méko sa' katnehek ektáhakxa apkelweynchámeykha m'a aptawán'ák neptámen nak. Exek sa' hótáhap tén han anmen yámet kélcheneykekxa m'a xapop apagkok nak, megkameykkehek sa' chá'a ekmámeye.

Números 23:9

Ekwet'ak ko'o neyseksa sénmeykha s'e netnók meteymog ekwenaqte nak, élanawók neyseksa sénmeykha s'e néten egkexe étseksek nak: apteme énxet'ák apheykha apxakcha'awo', megkólpáxaqtésso m'a pók énxet'ák nak.

Sofonías 2:15

Cháxa tegma apwányam apheykegkaxa nak énxet'ák apkeleymákpoho xa, meyke éltamheykha apkelwáxok, apkelxeyenma axta chá'a apheykha nak kañe' méko ekhawo s'e ekyókxoho nélwanmeygkaxa nak. ¡Meyke agko' aqsok tamhákxa', aqsok nawha'ák éllo élyáqtamakxa'! Apkelyeykhágwokmek sa' agkok chá'a énxet'ák ma'a elmóhaksek sa' chá'a, keñe sa' elyaqyéssesha chá'a apmék elwanyoho'.

Nahúm 1:12

Cháxa keñamak aptáha nak Wesse' egegkok apkeláneya énxet'ák apagkok se'e: “Apmelyeyha'ak eykhe m'a asirios, apxámok eykhe han, kólmasséssók sa' eyke, kamaskok sa' apkelwetamap. Éllegassáseykegkok axta ko'o kéxegke, mallegássesagkók sa' eyke kaxwo'.

Ezequiel 39:6

Wáphaksek sa' ko'o táxa m'a kañe Magog tén han nepyeseksa m'a énxet'ák ektaqmalma nak apheykha m'a apkelókxa, ekhéyak nak neyáwa wátsam ekwányam. Keñe sa' elya'ásegwók ko'o sektáha Wesse'.

Ezequiel 30:9

“Wokmek sa' agkok ekhem yaqwánxa kóllegássesagkohok ma'a Egipto, aláphaksek sa' apseykha amya'a apkelchánte yántakpayhe m'a neyseksa wátsam ekwányam nak, yaqwayam sa' elteméssesha apkelwáxok ma'a énxet'ák meyke nak éltamheykha apkelwáxok ma'a Etiopía, elyegwáwhok apagko' sa'. Ketók yaqwánxa kawak xa ekhem nak.

Jeremías 48:11

Apkelweteyak chá'a meyke ektáhakxa apheykha m'a énxet'ák Moab, megkólnaqleykekxak makham megkatnahakxa apkelókxa xama enxoho. Aphémók ma'a vino kélpekkenmal'a aqsa meyke kéltaqheyáseykha, megkólyetmeykekxal'a m'a mók kélyeta nak, cháxa keñamak megkamassama nak chá'a ekmátsa, tén han ekpaqneyam.

Isaías 32:11

Kéxegke, kélweynchámeykha nak meyke élyetnakhayo kélwáxok, kólyegwe'; kéxegke, ektaqmalma nak kélheykha kólpexyennem, kólhaxyawasák xa kélántaxno nak, kólántaxnekxa m'a apáwa sẽlwáxaqxamól'a magkenatchesso éllapwámeygko.

Isaías 32:9

Kelán'ák, meyke nak élyetnakhassamo kélwáxok aqsok, kóleyxho sa' sekmako nak ko'o altennaksek kéxegke. Kelán'ák, ektaqmalma nak kélheykha, kóleyxho sa' sekpeywa.

Salmos 123:4

¡Ẽlleklámeykegkek sẽlya'ásseyam ma'a kelwesse'e nak, tén han sẽlwanyeykha m'a apkeleymákpoho nak!

Salmos 73:12

¡Kóllano apkeltémakxa m'a élmasagcha'a nak apkeltémakxa! Megkaltemeykha apkelwáxok, exámasagkok aqsa aqsok apagkok.

Isaías 42:11

Kalpayhekxa kélwáxok kéxegke kélheykha nak meykexa énxet yetlo tegma apkelyawe kélagkok tén han ma'a apkelpakxeneykegkaxa nak Quedar énxet'ák. Kólmeneykmés yetlo ekmátsa kélwáxok kélheykha nak Selá; nágkóleysagkoho kólpáxamha m'a néten egkexe étseksa'ák nak.