Jeremías 25:18 - Biblia Enxet

¹⁸ Élágkek axta ko'o m'a énxet'ák Jerusalén, tén han ma'a énxet'ák apheykha nak tegma apkelyawe Judá, yetlo kelwesse'e apkelwányam apagkok tén han apkelámha apmonye'e, yaqwayam enxoho amasséssók, tén han atnessásekxak meyke xama aqsok, tén han aqsok eyeymáxkohol'a kataxche', tén han segyegwakkassamól'a, tén han éñamakxa néltémo hentemegwomhok exma ekmaso, aptamheykegko nak makham se'e kaxwo' nak.

Jeremías 25:18 Referans Kwoze

Jeremías 44:22

Massegkek axta eyke apkelenmáxamap Wesse' egegkok ma'a aqsok ekmaso kélláneyak, kélláneykegko axta kéxegke, cham'a aptaqnagkamo apagko' nak chá'a m'a. Cháxa keñamak ektamheykekxo nak kaxwók ekmaso kélókxa kéxegke tén han meyke xama énxet apha m'a; éñamakxa néltémo hentemegwomhok exma ekmaso tamheykekxa', aqsok eyeymáxkohol'a kataxche'.

Jeremías 24:9

Wának sa' ko'o káhapwak aqsok ekmaso agko' ma'a, yaqwayam sa' kalyegwakkasek chá'a elwetak ma'a apyókxoho énxet'ák apheykha nak keso náxop, elasmésakpok sa' chá'a ekyókxoho apkelókxa sélya'asakxa enxoho chá'a ko'o waxpánchesek, eltaqnaweykpok sa' nahan, kóltamhok sa' nahan chá'a kaltemégwomhok exma ekmaso.

Salmos 60:3

Apkellegassáseykegkók axta ekyentaxno agko' ma'a énxet'ák apagkok, ẽleykegkek axta negko'o exchep vino segyeykessamo nak exma.

Amós 3:2

“Kéxegke axta kélwánxa kélagkok sélyéseykencha'a ko'o nepyeseksa m'a apyókxoho énxet'ák nak keso náxop. Cháxa keñamak peya nak ko'o ayaqmagkásekxak ma'a ekyókxoho aqsok élmasagcha'a nak kélláneyák.”

Amós 2:5

Cháxa keñamak peya nak ko'o awatnek ma'a Judá, kamasséssók sa' tegma apkelyawe nak Jerusalén xa táxa nak.”

Daniel 9:12

Apkeláneyak xeyep ma'a apxeyenmakxa axta henteméssesek, segaphássesa m'a néllegeykegkoho ekmaso agko', ekweykekxoho m'a senláneykha nak chá'a negko'o; hakte axta kótémaxchek chá'a katnehek xama enxoho ekhawo ektémakxa axta kéllegassásegkoho eyáhapwe m'a Jerusalén.

Jeremías 25:11

Kólmasséssók sa' ekyókxoho s'e apchókxa nak, ekmaso sa' kóltemessásekxa'. Setenta apyeyam sa' kawomhok apteme apkeláneykha Wesse' apwányam Babilonia xa énxet'ák nak.

Jeremías 25:9

aláneyha sa' ko'o apyókxoho énxet'ák apheykha nak nexcheyha yetlo séláneykha Nabucodonosor, wesse' apwányam nak ma'a Babilonia, yaqwayam sa' elxegma', ektámegmak se'e apchókxa nak, yetlo apyókxoho énxet'ák apheykha nak kañe', tén han ma'a apyókxoho énxet'ák apheykha nak neyáwa'. Amasséssók sa' ko'o ekyókxoho. Meteymog ektaháneykekxa mók meyke néxa sa' atnessásekxa', negaye agweta', tén han segyegwakkassamo.

Jeremías 1:10

“Ekpekkenchessek ko'o exchep apátog sekpeywa. Sakhem sekmésa ko'o exchep apmopwána nepyeseksa m'a apyókxoho énxet'ák nak keso náxop tén han ma'a apkelókxa, yaqwayam sa' esawhohok aqsok ma'a kañe' tén han elyaqnegkesagkok, yaqwayam sa' emasséssók tén han etnéssásekxak nápakha'a apketkók, tén han yaqwayam enaqxétekhasagkokxak makham, tén han eknekxak makham aqsok aktek.”

Nehemías 9:36

“Elano sentémakxa negko'o s'e kaxwo' nak, sẽlásenneykha naqsa nentamheykegkok se'e apchókxa nak, apméssamakxa axta m'a ẽlyapmeyk nano', yaqwayam enxoho katókasek ma'a aqsok ektekkesso nak, tén han ma'a aqsok éltaqmela.

Esdras 9:7

Nanók negko'o nentémakxa ekmaso agko' mólya'assáxma, ekwokmoho makham se'e kaxwo' nak, élmasagcha'a nentémakxa keñamak negko'o sẽlméssama m'a kelwesse'e mók apkelókxa, negko'o tén han ma'a kelwesse'e apkelwányam egagkok, tén han ma'a apkelmaxnéssesso nak Dios énxet'ák apagkok. Nanók ektémakxa negko'o sẽlyensasso chá'a, sẽlnaqleykekxa megkatnahakxa negókxa, sẽlmenyexchesso aqsok egagkok, tén han sẽlwanyeykha, cháxa sentémakxa nak makham se'e kaxwo' nak.

2 Reyes 22:19

apyelaqtéssek axta han apwáxok, apkelyahákxók axta apleg'a sekpeywa peya ko'o wanmexek se'e yókxexma nak, tén han ma'a apheykha nak ma'a, peya kólmasséssamhok apagko', tén han kólmések ekmaso agko' apheykha, apkelyepteyk axta apkelnaqta, apkelekxagweyha axta han nahaqtók ko'o, cháxa keñamak sekhaxnawo nak aptáhakxa. Éltennássek ko'o exchep xa, ko'o sektáha nak Wesse'.

1 Reyes 8:24

apkelanak xép ma'a apkeltennassama axta elának ma'a apkeláneykha David, táta axta. Sakhem apkelana m'a ekyókxoho apxeyenma axta elána'.

Josué 6:18

Kóltaqmelchesaxkoho sa' kéxegke, nágkólma aqsa tén han nágkólpaknegwomho m'a aqsok ekhéyak nak ma'a tegma apwányam, hakte appenchessek apkelpagkanma Wesse' egegkok yaqwayam kólmasséssók xa aqsok nak. Sa' agkok kólyahákxak kéxegke xa, kélsexnenagko kélagko' sa' kóltéhek ma'a apkelpakxeneykegkaxa nak énxet'ák Israel, kólhágwakxak sa' ma'a ekmaso agko' nak.

2 Crónicas 29:8

Axta keñamak Wesse' egegkok apkeltaqnaweykegko m'a énxet'ák Judá tén han Jerusalén, keñe axta aptemessásekxo segyegwakkassamo nak agweta', tén han élmeneymáxchexa', ekhawo ektáhakxa nak kélwet'a kéxegke kélaqta'ák kélagko'.

Isaías 40:23

Mékoho nahan chá'a etnessásekxak ma'a énxet'ák ekyawe nak kéláyo, emasséssamhok nahan chá'a m'a kelwesse'e nak keso náxop.

Isaías 65:15

Elmaha sa' kélwesey kéxegke m'a sélyéseykha nak ko'o yaqwayam sa' elyemnaha tén han eltamhok yetsapok ma'a pók, alyaqmagkassesek sa' eyke ko'o mók apkelwesey m'a séláneykha.

Jeremías 26:6

sa' atnéssesek ko'o sekteméssessamakxa axta Siló s'e tegma appagkanamap nak. Apkelxéneykha ekmaso sa' ko'o atnéssesek apyókxoho énxet'ák apheykha nak keso náxop, cháxa tegma apwányam nak.’”

Ezequiel 30:7

“Egipto sa' aqsa nahan katnehek apkelókxa meyke agko' xama aqsok neyseksa m'a mók apkelókxa nak, tén han apmopsagcha'a apagko' ma'a tegma apkelyawe agkok nak.

Miqueas 6:16

Hakte apyetlamchek xép aptémakxa axta m'a Omrí, apkeláneyak ma'a aptamheykegkaxa axta m'a Ahab apnámakkok, aptemegkek ma'a aptamheykegkaxa axta. Cháxa keñamak peya nak atnéssesek xép aqsok eyeymáxkohol'a kóllano' tén han apkesmésamap yetlo m'a énxet'ák apagkok, kápekxak sa' xép apkelmegqakto m'a énxet'ák ahagkok.”

Jeremías 13:3

Tén axta sepaqhetchásekxo makham ma'a Wesse' egegkok. Aptáhak axta seyáneya s'e:

Jeremías 13:9

Aptáhak axta seyáneya s'e: “Sa' atnéssesek ko'o amasséssessók ektémakxa nak éleymáxkoho apkelwáxok énxet'ák Judá xa ektáha nak tén han ma'a Jerusalén.