Jeremías 23:14 - Biblia Enxet

¹⁴ Ekweteyak axta ko'o apkeláneykegko aqsok ekmaso agko' ma'a apkellegasso axta sekpeywa apheykha axta m'a Jerusalén: apnaqtawáseykegkók axta apnaqteyegka'a apkeláneykegko chá'a mók, apkelyexancháseykha axta nahan chá'a apnámakkok, elyáteyagkohok axta chá'a megyánhek elwátesagkok apkeltémakxa ekmaso m'a élmasagcha'a nak apkeltémakxa. Ekhéssamok ko'o Sodoma tén han Gomorra xa énxet'ák nak, tén han ma'a apheykha nak tegma apwányam.

Jeremías 23:14 Referans Kwoze

Jeremías 29:23

Sa' katnehek xa ektáha nak, eñama apkeláneyak aqsok ekmaso agko' ma'a kañe' Israel: Apnaqtawáseykegkók apnaqteyegka'a apkelánéseykegko chá'a m'a apnámakkok apnaqteyegka'a, apkelmopwancha'a amya'a nahan chá'a aptamheykegkok apkelxeyenma m'a sektémakxa sekpeywa, maltémo nak chá'a ko'o elxének. Ekya'ásegkók ko'o xa, ekweteyak nahan. Ko'o sekxeyenma xa, sektáha nak Wesse'.’”

Ezequiel 22:25

xama apkelókxa apheykegkaxa nak ma'a kelwesse'e apkelyetchesamakpoho yámakméwa, élyexwéweykhal'a tén han élyeptamól'a m'a ekyógkexma; ektómól'a kañe' yókxexma agkok ma'a énxet, tén han élmenyexchessamól'a aqsok élmomnáwa apagkok tén han ma'a aqsok apagkok ekxámokma nak, ekteméssessamól'a xentampe'e' ekxámokma agko' ma'a kelán'ák.

Miqueas 3:11

Elmok chá'a takha' elxawagkok selyaqye m'a énxet'ák segyekpelchémo nak tegma apwányam, selyaqye aqsa chá'a eltamhok elxawagkok ekyánmaga apkelxekmósso apnámakkok ma'a apkelmaxnéssesso nak Dios énxet'ák apagkok, keñe m'a apkellegasso nak chá'a Dios appeywa, elmok chá'a ekyánmaga apkeltenneykha elxénmakha appasmo m'a Wesse' egegkok, etnehek chá'a apkelpeywa s'e: “Apheyk negyeseksa negko'o Wesse' egegkok; méko xama aqsok ekmaso awanchek hegáhapwak negko'o.”

Jeremías 23:32

Ekxénchek ko'o alenmexek xa apkelxeyenma nak chá'a apkellegasso sekpeywa, apkelxeyenma nak chá'a apkelwanmagko ekmowána amya'a; apkeltémo nak chá'a elyetnakhássók énxet'ák ahagkok eñama apkelmopwancha'a amya'a, tén han apkelpaqméteykha naqsa. Malapháseykha ko'o, magkéssók han sekpeywa xama enxoho séltémókxa etnahagkok, mopwanchek epasmok énxet'ák ma'a. Ko'o sekxeyenma xa, sektáha nak Wesse'.

Jeremías 14:14

Tén axta Wesse' egegkok aptáha seyátegmowágkokxo s'e: “Aptemék agkok chá'a apkelxeyenma sekpeywa apkellegasso nak chá'a sekpeywa xa ektáha nak, apkelmopwancha'a amya'a. Malapháseykha ko'o m'a, magkéssók nahan sekpeywa xama enxoho, malpaqhetchessók nahan. Háwe naqsók ma'a aqsok apkelwete, mékoho agko' ma'a apkelya'áseykegkoho nak ektémakxa aqsok ekpowásamaxche', élchetámeykha agko' apkelwáxok keñamak. Cháxa apkeltémakxa nak chá'a apkellegassama kéxegke xa énxet'ák nak.

Deuteronomio 32:32

Aphawók anmen yámet kélcheneykekxa ekmasól'a xa énxet'ák nak. Sodoma énxet'ák aptawán'ák neptámen xa tén han Gomorra, apkeneykekxohol'a chá'a m'a anmen yámet ekmáske nak ekyexna tén han segwayól'a;

Génesis 18:20

Keñe axta Wesse' egegkok aptáha s'e: —Legamaxcheyk apkelwesey ekmaso agko' ma'a énxet'ák Sodoma tén han Gomorra, asagko' agko' han ma'a melya'assáxma,

Sofonías 3:4

Éleymáxkoho apkelwáxok ma'a énxet'ák apagkok apkellegasso nak chá'a Dios appeywa tén han apkelyexancháseykha chá'a pók; aptawáseykha tegma appagkanamap ma'a énxet'ák apagkok apkelmaxnéssesso nak chá'a Dios énxet'ák apagkok, meláneykegkok ma'a Wesse' egegkok segánamakxa apagkok.

Jeremías 20:16

¡Exhok sa' tegma apkelyawe xa énxet nak apmassesseykmo axta Dios meyke néxa! ¡Eñak sa' chá'a axto'ók élpayheykha kélatña'ák kéllegeykegkoho ekmáske, keñe sa' yetseksók ekhem eñak chá'a sẽltennasso peya kampakhaxche',

Génesis 13:13

apheykegkaxa axta apyókxoho énxet'ák élmasagcha'a apkeltémakxa, apkeláneykegkaxa axta ekmaso agko' apkeltémakxa melya'assáxma, énmexma nak Wesse' egegkok.

Malaquías 1:1

Keso Wesse' egegkok appeywa aplegasso axta énxet'ák Israel, apchásenneykekxo axta Malaquías apteme axta Dios appeywa aplegasso.

Ezequiel 13:16

cham'a apkelxeyenma nak chá'a apkellegasso sekpeywa apheykha nak ma'a Israel apkelwete nak chá'a aqsok megkamámnaqsoho, apkellegasso nak chá'a apyókxoho énxet'ák Jerusalén ektaqmalma apheykha, neyseksa eykhe megkataqmalma apheykha.’ Ko'o sekxeyenma xa sektáha nak Wesse'.

Jeremías 23:17

Etnehek chá'a elának apkelwanyeykha nak chá'a sekpeywa s'e: ‘Méko sa' katnehek ektáhakxa kélheykha kéxegke.’ Keñe m'a apkelyennaqtésso nak chá'a apkelwáxok apkelyetleykekxa m'a ektémakxa élchetámeykha apkelwáxok, etnehek chá'a elának se'e: ‘Megkáhapweyk sa' xama enxoho aqsok ekmaso.’”

Jeremías 18:13

Cháxa keñamak aptáha nak Wesse' egegkok se'e: “Kólmaxneyha hana m'a pók aptémakxa nak énxet'ák, aplegayak kexa xama xa ektéma nak aqsok. ¡Asagkók agko' apkeláneyak aqsok ma'a énxet'ák Israel!

Isaías 9:15

(Apqátek ekyetchesamaxkoho m'a apkelámha apmonye'e nak tén han ma'a kelwesse'e apkelwányam nak, keñe épakyek ekyetchesamaxkoho m'a apkellegasso nak chá'a amya'a, apkelxekmósso nak chá'a apnámakkok apmopwancha'a amya'a.)

Jeremías 23:22

Kaxtemeyk axta apkelya'áseykegkoho m'a ektémakxa nak élchetámeykha ewáxok megkólya'áseyak nak, ellegaksek axta sekpeywa m'a énxet'ák ahagkok; yának axta eltaqhegwók ma'a ámay apagkok ekmaso apkelyetlama nak, tén han elwátésagkok apkeláneyak ma'a aqsok ekmaso.”

Jeremías 36:2

“Ema sa' xama weykcha'áhak meyke kéltáxésso, etaxés sa' ekyókxoho séltennasa axta, sekxéna axta m'a Israel, tén han Judá, tén han ma'a mók apkelókxa nak, axta eyeynamók xép sekpaqhetchessama m'a apyennaqtamakxa axta Josías, ekwokmoho makham se'e kaxwo' nak.

Jeremías 49:18

hakte exnágwakxohok sa' ma'a ektémakxa axta Sodoma tén han Gomorra, tén han ma'a tegma apkelyawe aphéyak axta neyáwa', cham'a kélmassésseykmo axta. Méko sa' kaxnekxak kaxwók ma'a, méko sa' ma'a yaqwatakxoho enxoho aphayam. Ko'o sekxeyenma xa, sektáha nak Wesse'.

Ezequiel 13:19

Kéltawáseykha chá'a kéxegke sekwesey nápaqta'awók énxet'ák ahagkok eñama kélxawéyak chá'a apqántawók ma'a hótáhap apaktek tén han ma'a kelpasmaga apnek; kélnapmeyk chá'a m'a énxet'ák megkapayhawo nak eykhe yaqwayam eletsapok, keñe kéláyekmo chá'a m'a énxet'ák ekpayhawo nak eykhe yaqwayam eletsapok. Cháxa kéltémakxa chá'a kéxegke kélyexancháseykencha'a m'a énxet'ák ahagkok, apkelháxenmo nak ma'a amya'a ekmowána amya'a.

Oseas 6:10

Ekweteyak ko'o aqsok ekmaso agko' ma'a Israel: Apkeláneyak aptémakxa megkamopsexta m'a Efraín, apkenyetséssegkek apyempehek ma'a Israel.

Amós 4:11

“Ekmaso agko' axta ko'o ekmassésseykmok kéxegke, ekhawo sekteméssessamakxa axta sekmassésseykmo m'a Sodoma tén han Gomorra; máxa átex axta kéltemék kélhaxyawassól'a neyseksa táxa, ¡axta eyke hélye'eykekták ko'o kéxegke!” Wesse' egegkok apxeyenma xa.

Zacarías 13:2

Amasséssamhok ahagko' sa' ko'o élwesey aqsok kéláyókxa ekyókxoho s'e apchókxa nak, yaqwayam sa' megkóllenxanmagkók chá'a kélwóneykha. Amasséssók sa' nahan apchókxa m'a Dios appeywa apkellegasso apkelmopwancha'a amya'a nak tén han ma'a espíritu élmanyása nak. Ekxénchek ko'o xa, sektáha nak Wesse'.

Génesis 19:24

keñe axta Wesse' egegkok appalchesánto táxa, tén han aqsok ánek ekyátekto eyáléwomo nak, néten Sodoma tén han Gomorra;

Génesis 19:25

masséssekmek axta ekyókxoho aqsok ekhéyak ma'a kañe', ekweykekxoho énxet'ák, masséssekmek axta han ekyókxoho aqsok élánteyapma axta m'a xóp ekyapwate nak.

Jeremías 29:21

“Aptáhak apxéna Wesse' ekha nak apyennaqte, Dios apagkok nak Israel ma'a Ahab, Colaías axta apketche, tén han ma'a Sedequías, Maaseías axta apketche, apkeltennassama nak chá'a kéxegke aqsok megkamámnaqsoho, apxeyenma m'a Wesse' egegkok appeywa: ‘Wának sa' ko'o elmok ma'a Nabucodonosor, wesse' apwányam nak Babilonia, elnápok sa' kélnápaqta'awók kéxegke.

Lamentaciones 4:6

Awanhók agko' apkeltémakxa ekmaso m'a énxet'ák apheykha nak tegma apwányam ahagkok, megkaxnawok ma'a ektémakxa axta melya'assáxma m'a apheykha nak Sodoma, kélmassésseykmo axta ekmanyehe agko', meyke xama enxoho kélchetámeyak.

Miqueas 1:5

Katnehek sa' ekyókxoho xa eñama apkenmexeykekxa Dios ma'a Jacob énxet'ák apagkok, eñama melya'assáxma m'a énxet'ák apheykha nak Israel. ¿Yaqsa énmexcháseykekxa Dios ma'a Jacob énxet'ák apagkok? ¡Énxet'ák Samaria! ¿Háxko apkelpeykessamókxa kéleykmássesso m'a énxet'ák Judá? ¡Jerusalén!