Jeremías 2:20 - Biblia Enxet

²⁰ “Nanók agko' ko'o kéxegke sélenmexeykekxa', megkalyaqwámeykegkok hélyahakxoho.’ Axta kéltemék chá'a kélpaqméteykencha'a s'e: ‘Mogmenyeyk negko'o exchep agyetlawha.’ Kélláneykegkek axta kéxegke kéltémakxa megkólmasexta'a m'a néten egkexe nak tén han ma'a kóneg nak yenta'a élyentaxno pessesse agkok.

Jeremías 2:20 Referans Kwoze

Deuteronomio 12:2

“Kólmasséssem sa' ekyókxoho apheykegkaxa nak chá'a elpeykeshok aqsok apcháyókxa énxet ma'a xapop yaqwánxa sa' chá'a kólmok: cham'a ekhéyak nak néten egkexe tén han ma'a egkexe náxap'awo nak tén han ma'a ekhéyak nak kóneg yenta'a élyentaxno pessesse agkok.

Levítico 26:13

Ko'o sekteme Dios Wesse' kélagkok, sélántekkesso axta m'a Egipto, yaqwayam megkóltamhagkek chá'a apkelásenneykha naqsa m'a énxet'ák nak; ekmasséssegkek ko'o m'a aqsok ekyentaxno élyaqhapma axta kéxegke, ekmasséssegkek kélhamaxche'.

Jeremías 17:2

Kelxénweykekxók chá'a apkelwáxok kélketchek ma'a kélwatnamakxa axta chá'a aqsok, tén han ma'a yámet awhók kéleykmássesso kélpeykessamo axta chá'a, ekheykegko axta m'a nekha nak yenta'a élyentaxno pessesse agkok, tén han ma'a néten egkexe nak,

Oseas 3:3

Axta ektáhak seyáneya s'e: “Ahóxek sa' katnehek sektamheykha sekxegexma exche'; nágkagkés ekyókxa pók énxet ekha ekyánmaga, nágkalánegwom pók énxet, atnehek sa' ko'óxa xa ektáha nak meyke sektawáseykegkoho.”

Jeremías 30:8

Ektáhak ko'o sekpeywa s'e, sektáha nak Wesse' ekha sekyennaqte: Almallahanchesek sa' ko'o énxet'ák ahagkok ektémakxa nak ekyentaxno kéltemessáseykha naqsa, kamaskohok agko' sa' kaxwo' aptamhéyak apkelásenneykha naqsa m'a énxet'ák apkeleñama nak mók nekha.

Isaías 1:21

¡Aphágweykxók kelán'a ekyaqmagkáseyak pók énxet ekma nak chá'a ekyánmaga ekpathetéyak ma'a tegma apwányam meyenseyam nak Wesse' egegkok! Tásek axta chá'a katnehek aqsok apkelánéyák apyókxoho énxet'ák apheykha nak ma'a, cham'a nanók axta, kapéwhok axta chá'a, keñe kaxwók aptamhágko tekyawa yapmeyk.

Nahúm 1:13

Alekkexchesek sa' ma'a aqsok ekyentaxno élyaqhapma nak, alyétekkessesek sa' han ma'a cadenas kélpextete nak.”

Oseas 2:5

Keláneyak axta ekmaso ektémakxa megkamasexta m'a egken nak, massegkek axta ekteme meyke ektémakxa', ektéma axta ekpeywa s'e: ‘Ategyaha sa' ko'o sélpathetéyak, segkésso nak chá'a sekto, tén han ma'a yegmen, tén han nepkések apwa', tén han apáwa apkeláxñeyo nak, tén han pexmok égmenek, tén han ma'a sekya.’

Ezequiel 23:5

Patheteykegkek axta eyke chá'a pók énxet ma'a Oholá neyseksa sekteme etáwa', keláneyók agko' axta m'a élmámenyého axta chá'a, cham'a kempakhakma yapmeyk asirios,

Ezequiel 20:28

Xama axta séltémo ko'o kólántexek ma'a xapop séltennassamakxa axta ekmámnaqsoho agko' agkések, yohók axta kéltáha kélseykekxexa chá'a aqsok kélnapma kélwet'a m'a egkexe netno nak tén han ma'a yámet ekxámokma nak áwa', kéllánegweykekxeyk axta nahan chá'a aqsok kélmésso naqsa kélagkok sektaqnagkamo ahagko' nak ko'o m'a; kélnegkenweykekxeyk axta chá'a m'a aqsok ekmátsa nak ekpaqneyam, kélyegkenweykekxeyk axta nahan chá'a m'a anmen yámet égmenek kélmésso naqsa kélagkok nak.

Ezequiel 16:41

Elwatnések sa' ma'a axagkok nak, exének sa' yaqwánxa kólteméssesek xeye' naqta'awók ekxámokma agko' ma'a kelán'ák. Amasséssessók sa' ma'a ektémakxa nak élane ektémakxa ekmaso megkamasexta, kamaskok sa' kaxwók kayánmagkasek ma'a ektáha nak chá'a élpathetéyak.

Ezequiel 16:31

Keláneykegkek élpeykessamókxa chá'a aqsok eyáyókxa tén han éláneykxa chá'a ektémakxa ekmaso megkamasexta m'a ekyókxoho ekmassegweykemxa nak chá'a ámay tén han ma'a ekyókxoho éláxñéyak nak chá'a. Makke exche' katneyk ma'a éltémakxal'a chá'a m'a kelán'ák, ekma nak chá'a ekyánmaga ekpathetéyak énxet: ¡Megkamek chá'a exche' ekyánmaga!

Ezequiel 16:28

Yespeyeykegkók axta aqsa élane xa ektémakxa nak, meyásekxeyk axta makham ekyókxa m'a Asirios; hawók axta aqsa makham ma'a ektémakxa nak, yespeyagkók axta aqsa makham élane.

Isaías 14:25

Amasséssók sa' énxet'ák Asiria m'a seyókxa, alteyammaha sa' ma'a néten meteymog élekhahéyak ahagkok nak. Kamaskok sa' elhakpok énxet'ák ahagkok ma'a apkeltamheykha ekyentaxno apkelmésso nak chá'a m'a, kamaskok sa' apkelpata m'a aqsok ekyentaxno apkelpatmeykencha'a nak chá'a.

Isaías 10:27

Kólhaxyawássesek sa' kélpata ekyentaxno kélpatmeykencha'a nak chá'a xa ekhem nak, kólekkexekxak sa' ma'a aqsok ekyentaxno élyaqhapma nak chá'a.” Apkelpéwók apkelxegakmo énxet'ák Asiria m'a ekpayho nak Rimón,

Isaías 9:4

Hakte apmasséssekmek xép ma'a ektémakxa nak sẽlásenneykha naqsa apkelhamakpo nak ma'a énxet'ák, tén han ma'a kélnaqtawáseykegkoho élyaqhakkáseykencha'a nak apkelwáxok, tén han ma'a apkemha apmonye' apkelhaya nak chá'a. Máxa entáhak ma'a ektáhakxa axta apmasséssekmo m'a Madián.

Salmos 78:58

Aplókassegkek axta apkeláneykegko apkelwatnamakxa aqsok, apkelwatnéssamakxa chá'a aqsok ma'a mók aqsok kéláyókxa, tén han apkelpeykessamo m'a kéleykmássesso, aplókassegkek axta apkelmeyeykha.

1 Reyes 12:32

Appekkenchessegkek axta han kélessawássessamókxa chá'a kélpeykessamókxa', ekhem quince, pelten ocho, ektéma nak chá'a élánamáxche kélessawássessamo m'a Judá, apnegkenma apagko' axta han chá'a aptemék aqsok apkelnapma m'a néten nak ekwatnamáxchexa aqsok. Cháxa apkeláneya axta chá'a m'a Betel nak, apkelméssama chá'a aqsok apkelnapma m'a weyke étkók kéleykmássesso apkelane axta, keñe han aptemessásegko apkelmaxnéssesso énxet'ák agkok, kélpeykessamókxa nak chá'a aqsok kéleykmássesso apkelane axta.

1 Samuel 12:10

Tén axta apkelya'ásegweykmo apkeláneykegko melya'assáxma nápaqtók Wesse' egegkok, apkelyamasma apkelpeykessamo m'a mók ektémakxa nak chá'a kéleykmássesso Baal, tén han Astarté, keñe axta apkelwóneykencha'a apkeltémo elwagkasek teyp neyseksa apkelma apkelenmexma, apkelxeyenma elpeykeshok wánxa m'a Wesse' egegkok.

Josué 24:26

aptáxéssek axta m'a weykcha'áhak segánamakxa apagkok nak Dios. Keñe axta apma xama meteymog ekyawe, appekkenwokmek axta m'a kóneg yámet encina émha axta m'a nekha nak Wesse' egegkok tegma appagkanamap apagkok,

Josué 24:24

Aptáhak axta apkelátegmowágko énxet'ák: —Ólyahakxohok sa' chá'a negko'o m'a Dios Wesse' egegkok, anlanagkok sa' chá'a m'a aptáhakxa enxoho chá'a sẽláneya.

Josué 1:16

Keñe axta apkelátegmowágko m'a énxet'ák: —Anlának sa' ekyókxoho xa apkeltamhókxa nak anlána', ólmahagkok sa' han ma'a sẽláphasakxa enxoho.

Deuteronomio 26:17

Kélxénchek kéxegke sakhem aptáha Wesse' kélagkok ma'a Dios, kéltennássek nahan kélmako kólyetlók ma'a ámay apagkok nak tén han kóllának ma'a segánamakxa apagkok, tén han ma'a apkeltémókxa nak chá'a antéhek tén han kólyahakxohok chá'a.

Deuteronomio 15:15

Kaxén xépxa apwáxok apteme axta kélásenneykha naqsa aphakxa axta m'a Egipto, tén han aptekkessama Dios Wesse' apagkok ma'a. Cháxa keñamak sekmésa nak ko'o kaxwók xa séltamhókxa nak chá'a etnehek.

Deuteronomio 5:27

Xeyep akke payhawok épetchegwakxohok makham ma'a, yaqwayam yeyxhok ekyókxoho m'a aptáhakxa enxoho chá'a apcháneya m'a Dios Wesse' egegkok, keñe sa' hẽltennásseták chá'a negko'o m'a aptáhakxa enxoho chá'a apcháneya, anlanagkok sa' nahan chá'a negko'o m'a aptáhakxa enxoho chá'a sẽláneya.’

Deuteronomio 4:34

¿Yetnéya xama aqsok kéláyókxa élyéseykha énxet'ák nepyeseksa m'a pók aptémakxa nak énxet, ekyetlómo élane m'a ekxámokma aqsok, tén han ma'a magkenatchesso nak agweta', tén han ma'a sempelakkasso nak agweta' tén han ma'a kempakhakma, yetlo ekmeykha ekyawe ekmowána tén han ma'a ekmowána nak hegyegwakkasek, ekhawo apkeláneya axta kélnápaqta'awók kéxegke Dios Wesse' kélagkok ma'a yókxexma Egipto, eñama apkelmasma kéxegke?

Deuteronomio 4:20

Keñe kéxegke apkelmoma m'a Wesse' egegkok, apkelhaxyawásseykekxeyk axta m'a kañe' táxa axagkok kélpeykáseykekxa axta chá'a m'a sawo, Egipto xa, keñe apteméssessama ekhawo nak kéltémakxa s'e kaxwo' nak: énxet'ák apagkok apagko'.

Éxodo 24:3

Apxegkek axta Moisés, apkeltennáseyha axta énxet'ák ekyókxoho m'a aptáhakxa axta apcháneya Wesse' egegkok tén han apkeltamhókxa chá'a etnehek. Apyókxoho axta nahan aptáhak apkelátegmowágko s'e: —¡Anlának sa' ekyókxoho m'a apkeltamho nak anlának ma'a Wesse' egegkok!

Éxodo 19:8

Keñe axta israelitas apheyásawo mók apkelpeywa apkelátegmowágkokxo. Aptáhak axta s'e: —Anlának sa' ekyókxoho m'a apkeltamhókxa enxoho chá'a anlának ma'a Wesse' egegkok. Keñe axta Moisés apsákxésa Wesse' egegkok ma'a ektáhakxa axta apkelpaqmeyesma m'a énxet'ák.

Éxodo 3:8

Cháxa keñamak sekweywento nak ko'o, yaqwayam alwagkasek teyp neyseksa apkelma m'a egipcios; alántekkesek sa' ko'o s'e apkelókxa nak, alya'aksek sa' ma'a xama xapop ekyawe agko' nak tén han ektaqmalma, cham'a ényahamakxa nak weyke nagkeygmenek, tén han yányawhéna' apyegmenek ektémól'a kanyehek ma'a yegmen, cham'a apchókxa apheykegkaxa nak ma'a cananeos, hititas, amorreos, ferezeos, heveos tén han ma'a jebuseos.

1 Reyes 14:23

hakte apkeláneykegkek axta han kélpeykessamókxa chá'a kéleykmássesso m'a egkexe nak chá'a, apkeláncháseykegkek axta han meteymog, tén han yámet awhak apkeláyókxa m'a ekyókxoho egkexe néten nak, keñe han ma'a kóneg nak yenta'a élyentaxno nak pessesse agkok.

Salmos 107:14

apkelántekkessegkek axta m'a neyseksa ekyaqtéssamakxa agko' nak exma, apkelyétekkessessegkek axta han cadenas.

Jeremías 2:31

(Kéxegke nahan, kaxwe nak kélektegeykekxa makham, kóltaqmelchesho kélháxenmo Wesse' egegkok appeywa.) Israel, ¿yókxexma meykexa énxet kélagkok ya axta ko'o kéxegke?, ¿xapop ekyaqtéssamakxa exma ya axta ko'o? Énxet'ák ahagkok, ¿yaqsa ektéma kéltéma nak chá'a kélpeywa s'e? ‘Nenteme egagko' negko'o kaxwók nentamheykegkok; wánxa kaxwók negye'eykekxa exchep’.

Jeremías 3:13

Eyke kay'ásegwakxoho aqsa m'a ektémakxa ekmaso, tén han énmexeykekxo m'a Dios Wesse' agkok; ekweynchámeykencha'a chá'a ektegyeykencha'a énxet apkeleñama mók nekha yaqwayam kagkések ekyókxa, m'a kóneg nak yenta'a élyentaxno pessesse agkok, tén han megkalyeheykekxo m'a séltémókxa nak katnehek. Ko'o sekxeyenma xa, sektáha nak Wesse'.”

Jeremías 5:5

Ay'ókxak sa' ko'o m'a énxet'ák ekha nak kéláyo, alpaqhetchesek sa' nahan. Megkatnehek sa' nahan melya'áseykegkoho m'a apmopmenyého nak Wesse' egegkok, cham'a apkeltémókxa nak chá'a etnahagkok ma'a Dios apagkok. Apkelenmexeykekxeyk eyke Dios xa apyókxoho nak, megkalyaqwámeykegkok elyahakxoho'.

Jeremías 13:27

Ekweteyak ko'o m'a aqsok kélyespagko nak, kélnaqtawáseykegkoho kélnaqteyegka'a kéllane chá'a mók, tén han kéltémakxa segmegqassamo kélhémo m'a kelán'a ekyaqmagkáséyak pók énxet ekpathetéyak ekma chá'a ekyánmaga; tén han kéltémakxa ekmaso agko' ma'a néten egkexe nak tén han ma'a yókxexma nak. ¡Xél'aye Jerusalén! ¿Háxko sa' ekwánxa katnégwók néxa ekteme ekmanyása émpehek?”

Oseas 4:13

Apkelwatnegkek chá'a aqsok ekmátsa nak ekpaqneyam éten agkok ma'a néten egkexe nak, apkelnapmeyk han chá'a aqsok apnaqtósso, tén han apkeláneykegko chá'a m'a kóneg yenta'a élyentaxno nak pessesse agkok, cham'a yámet robles, álamos, tén han ma'a encinas. Cháxa keñamak éláneykegko nak éltémakxa ekmaso megkalmasexta'a m'a kélketchek kelwán'ák nak kéxegke, tén han eknaqtawáseykegkoho anaqteyegka'a élánegwayam chá'a pók énxet ma'a kéltánegken'ák nak.

Jueces 2:11

Asagkek axta eyke apkeltémakxa nápaqtók Wesse' egegkok ma'a israelitas, hakte apkelpeykessamók axta mók ektémakxa nak chá'a kéleykmássesso Baal.

Jueces 2:13

Apkelyamasmeyk axta Wesse' egegkok eñama apkelpeykessamo m'a Baal, keñe han ma'a mók ektémakxa nak chá'a kéleykmássesso m'a Astarté.

Jueces 10:6

Apkeláneykegkokxeyk axta makham apkeltémakxa ekmaso israelitas nápaqtók Wesse' egegkok, apkelpeykessamók axta m'a mók ektémakxa nak kéleykmássesso Baal tén han Astarté, tén han ma'a aqsok kéláyókxa nak Siria, tén han Sidón, Moab, Amón keñe han ma'a filisteos. Apyamasmeyk axta Wesse' egegkok, massegkek axta apkelpeykessamo.

Salmos 2:3

Aptáhak apkelyennaqtésa apkelpeywa s'e: “¡Ólhaxyawaksek sẽlnaqtete nak ekyennaqte! ¡Ólhaxyawaksek sẽlnaqtete nak táma apagkok!”

Oseas 1:2

Apcheynawók axta Wesse' egegkok apkeltennasa amya'a apmako axta eltennaksek eñama apchásenneykekxa m'a Oseas: “Máxa kelán'a ekyaqmagkáseyak pók énxet ekpathetéyak ektegye selyaqye aptamheykegkok seyamasma ko'o m'a énxet'ák Israel. Exeg, ema sa' yaqwayam etnehek aptáwa' xama kelán'a ekyaqmagkáseyak pók énxet ektegye selyaqye, etés sa' nahan étchek ma'a; etnahagkok sa' kelán'a ekyaqmagkáseyak pók énxet ektegye selyaqye étchek.”

Oseas 9:1

Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.