Jeremías 16:5 - Biblia Enxet

⁵ Aptáhak axta han ko'o seyáneya Wesse' egegkok se'e: “Ná etaxnegwom aqsa xama tegma ekyetnakxa enxoho éllapwámeyak énxet'ák eñama apketsapma xama énxet; ná elekxagwaha elano', ná exekmósho han élapwokmo, hakte ekyementamákxeyk ko'o meyke ektáhakxa egwáxok ahagkok se'e énxet'ák nak, tén han seyásekhayo, tén han apmopyósa sélányo. Ko'o sekxeyenma xa, sektáha nak Wesse'.

Jeremías 16:5 Referans Kwoze

Isaías 27:11

Kalekkexaxchek chá'a aktegák xama yámet ekyawe élyamaka enxoho; keñe chá'a kelán'a kalmok katnehek táxa agkok. Énxet meyke apkelya'áséyak aqsok xa. Ékeso éñamakxa peya sa' megkalepyósek elanok ma'a ektáha axta Apkelane.

Deuteronomio 31:17

Altaqnaweygkok sa' eyke ko'o xa énxet'ák nak, akxák sa'; megkeytnakhaksók sa' ewáxok xama enxoho, káhapwak sa' ekxámokma agko' ma'a aqsok ekmaso tén han ma'a nenlegeykegkoho nak, keñe sa' etnehek chá'a elpaqmésmakha s'e: ‘Hákho óllegagkohok se'e aqsok ekmaso nak, ñókxa ekmassa apha negyeseksa m'a Dios Wesse' egegkok.’

Zacarías 8:10

Hakte cháxa ekhem nak, méko axta kélyánmagkasso ekyánmaga apkeltamheykha m'a énxet'ák tén han ma'a aqsok kélnaqtósso kélméssamo nak chá'a éltamheykha. Méko axta nahan ektaqmalma apheykha énxet'ák ektáha axta apheykha m'a, eñama m'a katnaha nak apnámakkok; ekméssegkek axta nahan ko'o yaqwayam elenmexakpekxak chá'a m'a énxet'ák.

Salmos 25:6

Wesse', kaxén apwáxok segásekhayo nak, tén han apmopyósa henlano', senxekmóssama nak chá'a eyeynamo m'a nanók agko' axta,

Jeremías 12:12

Apkelxegakmek énxet'ák apkello m'a ekyókxoho egkexe nak yókxexma meykexa énxet, hakte yetneyk ko'o xama sókwenaqte, ko'o sektáha nak Wesse', yaqwayam sa' kamasséssók ekyókxoho s'e apchókxa nak, méko sa' xama enxoho katnehek meyke ektáhakxa apha.

Jeremías 13:14

Keñe sa' ayenhekxak chá'a pók atnéssesek nápakha'a apketkók ektémól'a yátegwáxwa kólpaxqátek, apyapmeyk tén han kélketchek. Megkalepyóshek sa' alano'; amasséssók sa' meyke seyésseykekxa, tén han meyke apkelmopyóseka sélányo. Ko'o sekxeyenma xa, sektáha nak Wesse'.”

Jeremías 16:13

Cháxa keñamak peya nak ko'o alántekkesek kéxegke s'e xapop nak, alya'aksek sa' xama apchókxa megkólya'ásegkaxa nak kéxegke, tén han melya'áseykegkaxa axta m'a kélyapmeyk nano' axta kéxegke, sa' kólpeykeshok chá'a mók aqsok kéláyókxa yókxoho ekhem ma'a tén han yókxoho axta'a, megkalepyóshek sa' ko'o alanok kéxegke.

Lamentaciones 3:17

Massegkek ko'o ekyetno meyke ektáhakxa sekha, élwagqeykmek ma'a ektémakxa ektaqmeleykha egwáxok.