Jeremías 11:7 - Biblia Enxet

⁷ Xama axta ko'o sélántekkessama kélyapmeyk nano' axta kéxegke m'a Egipto, ektaqmelchessamók axta sélpaqhetchesso séltémo hélyahakxohok ko'o, makhemek eyke makham sélpaqhetchesso s'e negwánxa nak eyeynamo m'a sekxók axta sélántekkessama.

Jeremías 11:7 Referans Kwoze

2 Crónicas 36:15

Axta eyke eyétekkesseykmok chá'a apcháphássesso appeywa apchéssama Dios Wesse' apagkok axta m'a apyapmeyk nano', eñama axta apkellegasso chá'a apkelxeyenma axta chá'a appeywa, hakte apyósekak axta apkelányo m'a énxet'ák apagkok, tén han ma'a aphamakxa axta chá'a.

1 Samuel 8:9

Elyahakxoho aqsa m'a aptáhakxa enxoho apkelmaxneyeykha; eltennés sa' eyke sekxo', háxko sa' aptémakxa m'a wesse' apwányam peya nak etnehek apkemha apmonye' apkeltaqmelchesso.”

Éxodo 15:26

Aptáhak axta apkeláneya s'e: “Kélhaxnawók agkok chá'a kéxegke meyke kéltawásseyo kóleyxhok ma'a sektáhakxa enxoho chá'a séláneya, ko'o sektáha nak Wesse' Dios kélagkok, tén han kéllana enxoho chá'a m'a ekpeykeseykekxoho nak chá'a ko'o ewáxok, kélyahákxoho enxoho nahan chá'a m'a séltémókxa nak chá'a kóltéhek, tén han kéllana enxoho chá'a m'a segánamakxa ahagkok nak, magwáphaksek sa' ko'o xama enxoho m'a aqsok ekmaso nenlegeykegkoho, seyáphasa axta ko'o nepyeseksa m'a egipcios, hakte ko'o sekteme Wesse', ektáha nak chá'a apkelmeyáseykekxa kélyennaqte kéxegke.”

Jeremías 35:15

Ketók pók axta eykhe ektemék séláphássesso chá'a apyókxoho m'a séláneykha apkellegasso nak chá'a sekpeywa, yaqwayam etnehek elának se'e: Kólwátésák kéltémakxa ekmaso, tén han ekmaso kéllánéyak aqsok. Nágkólyetlakxa m'a mók aqsok kéláyókxa nak, nágkólpeykesho han, keñe sa' kóllenxanmagkohok kélheykha s'e xapop sekmésso axta ko'o kéxegke, tén han ma'a kélyapmeyk nano' axta. Makke kéxegke hélháxenmo', mehelyeheykekxohok nahan.

Jeremías 25:4

Apkeláphássáseykekxeyk axta eykhe chá'a kéxegke Wesse' egegkok ma'a apkeláneykha apkellegasso nak appeywa, axta eyke kéxegke kólháxenmo', axta kólmáheyok kóleyxhok chá'a apkelpeywa tén han kólyahakxohok chá'a.

Jeremías 11:4

Hakte cháxa ekhémo mók nélpaqhetchásamáxkoho sélánéssama axta ko'o m'a apyapmeyk nano', sélántekkessama axta m'a Egipto, apchókxa ekhémókxa axta táxa axagkok kélpeykeseykekxexal'a sawo. Axta ektemék ko'o sélanagkama s'e: Hélyahakxoho sa', kóllána sa' chá'a ekyókxoho m'a séltamhókxa enxoho chá'a kóllána', keñe sa' ko'o atnehek kéxegke énxet'ák ahagkok, keñe sa' kéxegke héltéhek ko'o Dios kélagkok.

Jeremías 7:13

Hágkaxwe axta eykhe ko'o altennásekxohok kéltémakxa, axta eyke kólmáheyók kéxegke hélyahakxoho, axta nahan hélátegmoweykegkokxa'. Ko'o sekxeyenma xa, sektáha nak Wesse'.

Deuteronomio 30:20

kólásekhoho chá'a m'a Dios Wesse' kélagkok, kólyahakxoho chá'a, kólteme chá'a meyke kélyenseyam kélyetleykha, hakte sa' kañék ekyennaqte kélnénya'ák kéxegke m'a tén han apxámokma apagko' apyeyam kélheykha m'a apchókxa apteméssessama axta ekmámnaqsoho agko' egkések Wesse' egegkok ma'a Abraham, Isaac tén han ma'a Jacob, cham'a kélyapmeyk nanók axta kéxegke.”

Deuteronomio 12:32

“Kóllána sa' chá'a ekyókxoho m'a séltamho nak kóllána', meyke kélyepetcháseykekxa mók amya'a tén han meyke kélmassésso xama enxoho.

Deuteronomio 8:6

Kóllána chá'a m'a apkeltémókxa nak chá'a kóltéhek ma'a Dios Wesse' kélagkok, kólteme chá'a kéláyo, kólyetlow chá'a m'a nélxekmowásamáxche apmésso axta kéxegke.

Deuteronomio 6:2

Sa' kañék kéláyo chá'a kéxegke Dios Wesse' kélagkok xa, tén han kóllának chá'a segánamakxa, tén han apkeltémókxa nak chá'a antéhek neyseksók kélheykha makham, sekmésso axta ko'o kéxegke tén han ma'a kélketchek nak tén han ma'a kéltawán'ák nak; keñe sa' ahóxek agko' katnehek kélheykha.

Deuteronomio 5:29

¡Katnoho annal'a chá'a élchetamso apkelwáxok xa ektáha nak, heyáwhok chá'a ko'o, elanagkok nahan chá'a yókxoho ekhem ma'a segánamakxa ahagkok nak, yaqwayam enxoho kataqmelek chá'a apheykha, ekweykekxoho m'a apketchek!

Deuteronomio 4:6

Kólyahakxoho sa' chá'a, kóllána sa' nahan, hakte sa' kañék apkelya'áseykegkoho kéxegke énxet'ák apheykha nak mók nekha, ekha kélya'áseykegkoho xa tén han kélyekpelchémo, hakte kélya'ásegwokmek sa' agkok kéxegke xa segánamakxa nak, megkatnehek sa' metne elxének se'e: ‘¡Apkelya'áseyak nak la'a eghak se'e énxet'ák apxámokma nak, apkelyekpelchémo nahan eghak!’

Jeremías 25:3

“Veintitrés apyeyam ko'o wokmok sepaqhetchesso m'a Wesse' egegkok, eyeynamo m'a ekweykmo axta trece apyeyam apteme wesse' apwányam Josías ma'a Judá, Amón axta apketche, ekwokmoho makham se'e kaxwo nak, alpaqhetchásekxohok axta eykhe chá'a ko'o kéxegke; axta eyke hélyaheykekxa'.

Jeremías 31:32

Cháxa ekhémo mók nélpaqhetchesamaxche nak, megkaxók sa' ma'a sélánéssama axta m'a apyapmeyk nano', sélmoma axta apmék sélántekkessama m'a Egipto; hakte axta eláneykegkok ma'a ekhémo mók nélpaqhetchásamáxkoho ahagkok, sektáhakxoho eykhe ko'o apagkok. Ko'o sekxeyenma xa, sektáha nak Wesse'.

Jeremías 35:14

Apkelyeheykekxók apkeltémókxa axta chá'a etnahagkok aptawán'ák neptámen ma'a Jonadab, Recab axta apketche, apkeltémo axta ménagkehek chá'a m'a vino, makhemek eyke makham ménéyak se'e negwánxa nak, hakte apkelyaheykekxók ma'a apkeltémókxa axta chá'a etnahagkok ma'a apyáp nano'. Hágkaxwe eykhe chá'a ko'óxa kéxegke agkések séltémókxa kóltéhek, makke hélyeheykekxoho'.

Zacarías 1:4

Nágkólteme aptamheykegkaxa axta m'a kélyapmeyk nano', apkeltennassama axta eykhe ko'o sektémakxa sekpeywa m'a nano' apkellegasso axta sekpeywa, aptéma axta apkelanagkama s'e: kólyenyow kéltémakxa élmasagcha'a tén han kélláneyak aqsok ekmaso, axta eyke heháxenmók ko'o m'a, axta nahan hélyeheykekxa'. Ko'o sekxeyenma xa, sektáha nak Wesse'.

2 Reyes 17:13

Apkeltennassegkek axta eykhe Wesse' egegkok ma'a israelitas, apkelásenneykekxo axta m'a apyókxoho apkellegasso nak appeywa, tén han apkelwetayo nak chá'a aqsok, apkeltémo elwátesagkok apkeltémakxa ekmaso, tén han elanagkok ma'a apkeltémókxa nak antéhek tén han segánamakxa apagkok, ekyókxoho nélxekmowásamáxche', apmésso axta m'a apyapmeyk nano', apkelásenneykekxo axta m'a apkeláneykha apkellegasso nak appeywa.

Jeremías 32:23

Xama axta apkelántaxnama m'a apchókxa nak, apmoma aptéma apagkok, axta elyeheykekxohok xép, axta nahan elyetlókassók ma'a nélxekmowásamáxche apmésso axta exchep, axta han eláneykegkok ma'a apkeltémókxa axta chá'a elanagkok xép. Axta keñamak apcháphássessama exchep ekyókxoho s'e nenlegeykegkoho nak.

Jeremías 34:14

ekwokmo enxoho chá'a siete apyeyam, ekxeykxak ma'a hebreo kélyamasma axta chá'a kélmésso ekha ekyánmaga m'a, tén han ekwokmo enxoho chá'a seis apyeyam apkeltemessáseykha. Axta eyke ko'o heháxenmók ma'a kélyapmeyk nano' axta, axta nahan hélyeheykekxoho'.

Oseas 4:1

Israelitas, kóleyxho aptáhakxa nak appeywa Wesse' egegkok. Appekkenchek yaqwayam elxénchásekxohok apkeltémakxa énxet'ák apheykha nak se'e apchókxa nak, hakte méko kaxwók mekxeymákpoho nepyeseksa énxet'ák se'e, tén han melyepetcheykha apnámakkok; massegkek apkelya'áseyak ma'a Dios.

Oseas 5:1

“Apkelmaxnéssesso énxet'ák ahagkok, kóleyxho sa' se'e; Énxet'ák Israel, kóltaqmelchesho sa' kélháxenmo; kéxegke wesse' apwányam nak apnámakkok, kóleyxho sa' se'e: Kéxegke sa' kólyekpelchexkoho', hakte máxa kelhanma kélpekkenmal'a kéltemék kéxegke m'a Mispá, tén han xama yám'én kéltegyessól'a m'a egkexe nak Tabor,