Isaías 5:16 - Biblia Enxet

¹⁶ Exekmósek sa' apteme apwányam apagko' Dios ekha nak apyennaqte m'a apkelana sa' apkelyekpelchémo; exekmósek sa' apteme aptaqmalma apkelyekpelchássásawo sa' ma'a Dios apteme nak Appagkanamap.

Isaías 5:16 Referans Kwoze

Salmos 46:10

“¡Kólwatés kélnápomáxche'! Kólya'asagkoho sektáha ko'o Dios! ¡Ko'o sekteme néten agko' nepyeseksa m'a pók aptémakxa énxet'ák! ¡Ko'o sekteme néten agko' ekyókxoho keso náxop!”

Isaías 12:4

keñe sa' kóltéhek se'e: “Kólmés ekxeyenma kélwáxok Wesse' egegkok, kóltennasha apyókxoho énxet'ák apheykha nak keso náxop aqsok apkelane nak, kólya'assásegwakxoho apteme néten ma'a ekyókxoho aqsok.

1 Crónicas 29:11

¡Wesse', xép apagkok ma'a aptémakxa nak apteme apwányam apagko', apmopwána, apcheymákpoho, apteme apkeláneykha ekyókxoho aqsok, tén han apteme wesse'! Hakte xép apagkok ma'a ekyókxoho aqsok ekhéyak nak néten, tén han ekhéyak nak náxop. Xeyep han apagkok ma'a aptémakxa nak wesse' apwányam, hakte xeyep Wesse' egegkok, apteme néten agko' ekyókxoho aqsok.

Ezequiel 36:23

Axekmósek sa' ko'o sekwesey ektaqmalma eyeymáxkoho nápaqta'awók ma'a pók aptémakxa nak chá'a énxet'ák, cham'a kéltawáseykencha'a nak chá'a kéxegke nepyeseksa; élanak sa' agkok ko'o xa, elya'ásegwók sa' ko'o sektáha Wesse'. Ko'o sekxeyenma xa, sektáha nak Wesse'.

Isaías 29:23

hakte apkelwet'ak sa' agkok aptawán'ák neptámen sekteméssesakxa m'a énxet'ák apagkok, elya'ásegwók sa' ektémakxa sektaqmalma, heyáwhok sa' chá'a ko'o, sektáha nak Dios Sektaqmalma apagkok ma'a Israel.

Isaías 33:5

Méko kayeykhágwomhok ma'a Wesse' egegkok, hakte aphegkek ma'a néten; cha'a apsawheyáseykekxoho ekpéwomo nentémakxa Sión ma'a tén han ektaqmalma nentémakxa,

Isaías 8:13

Eyke tásek chá'a kólteméssesek aptaqmalma m'a Wesse' ekha nak apyennaqte; eyke payhawok chá'a kóláwhok ma'a; kóláwhok chá'a nápaqto'.

Ezequiel 38:23

Keñe sa' axekmósek ko'o apxámokma apagko' énxet sekteme sekwányam tén han sektaqmalma. Altennasaxchek sa' nahan ko'o m'a, tén sa' elya'ásegwók sektáha ko'o Wesse'.

Isaías 57:15

Hakte aptáhak appeywa Meyke nak Ekhémo s'e, memassegwayam nak apwesey nak aptaqmalma: “Ekhegkek ko'o m'a netno' nak, ekpagkanamaxchexa nak, ekhegkek eyke nahan nepyeseksa m'a énxet'ák apkelyelqamákpoho nak tén han ma'a apkellegeykegkoho nak ekyentaxno apkelwáxok, yaqwayam enxoho alwasqakkásekxohok chá'a tén han agkeyásekxak chá'a apkelyennaqte.

Isaías 2:17

Kónegók sa' kóltemessásekxak ma'a apyókxoho apkeleymákpoho nak tén han ma'a apkene nak chá'a etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak.

Isaías 61:8

Hakte yásekhohok Wesse' egegkok ma'a ekpéwomo nak nentémakxa, etaqnawho eyke m'a negmenyexma nak tén han ma'a nenlane nak aqsok ekmaso agko'. Sa' elmések nahan ekyaqmageykekxa m'a ekhawo aptáhakxa axta apkeltennasso, elának sa' nahan ekhémo mók apkelpaqhetchásamákpoho meyke néxa.

Isaías 28:17

Amha sa' ko'o ekpéwomo nentémakxa sélana sa' xa tegma nak, ektémól'a m'a táma' kélmeykhal'a chá'a kélpékessamo apxega yátapheymekcha'ák, keñe sa' ektaqmalma nentémakxa m'a nenlányo nak chá'a ekwánxa ekhémo mók ma'a néten.” Yegmen élyennaqte sa' katwasha m'a kélmeyeykekxexa nak chá'a kóltegyaha kélmowána amya'a, keñe sa' yegmen kaswok ma'a ekyetnamakxa nak chá'a ekmasma.

Isaías 6:3

Axta aptáhak nahan chá'a apcháneya pók se'e: “Aptaqmalma, aptaqmalma, aptaqmalma Wesse' egegkok ekha nak apyennaqte; sawheykekxók apcheymákpoho ekyókxoho keso náxop.”

Salmos 21:13

Wesse', ¡exnekxa néten yetlo apmopwána! ¡Ólátsaha sa' yetlo nélmeneykmasso eñama apmallanma!

Isaías 30:18

Apkelhaxneyk kéxegke m'a Wesse' egegkok, yaqwayam sa' elásekhekxohok makham; apmakawók apagkók exekmósek kéxegke m'a ektémakxa nak apkelásekhayo, hakte Wesse' egegkok apteme Dios ekpéwomo aptémakxa. ¡Apkeleñémo apyókxoho ektáha nak apkelhaxanma m'a!

Isaías 2:11

Elháxahagkok sa' yetlo apkelmegqakto m'a énxet'ák apkeleymákpoho nak; kólmasséssesek sa' nahan apkeleymákpoho m'a apkene nak etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak,

Salmos 9:16

Apkeltennásamákpek aptémakxa m'a Wesse' egegkok: ¡apkelánekxésso chá'a apheykha énxet'ák ekpéwomo aptémakxa! Kalmekxohok chá'a agkok kelhanma apnegkenéyak ma'a élmasagcha'a nak apkeltémakxa.

Levítico 10:3

Keñe axta Moisés aptáha apcháneya Aarón se'e: —Cháxa apmáheyo axta exének Wesse' egegkok aptéma axta appeywa s'e: ‘Énxet sépetchegwayo enxoho ko'o, axekmósek sa' sekteme sekpagkanamaxche ahagko', hélteméssesek sa' ko'o seyeymáxkoho nápaqta'awók apyókxoho israelitas.’ Apwanmakkek axta eyke aqsa Aarón.

Ezequiel 28:22

Etne sa' yának se'e: “Keso aptáhakxa exchek appeywa Wesse' egegkok se'e: Sidón, ekxénchek ko'o exche' sektáha sénmexma; wának sa' ko'o kólteméssesek eyeymáxkoho sekwesey neyseksa exche'. Ekteméssessek sa' agkok ma'a sekmakókxa nak atnéssesek, sekxekmósa sa' sekteme sekpagkanamaxche', kólya'ásegwók sa' ko'o sektáha Wesse'.

Isaías 33:10

Aptáhak Wesse' egegkok se'e: “Alának sa' ko'o kaxwók aqsok; axekmósek sa' kaxwók ekyókxoho sekteme sekwányam ahagko' tén han sekteme seyeymáxkoho.

Ezequiel 20:41

Eyanchesákxeyk sa' agkok ko'o kéxegke kélheykegkaxa nak chá'a apkelókxa tén han nepyeseksa m'a pók aptémakxa chá'a énxet'ák, cham'a kélmeheykegkaxa nak kélexpánma s'e kaxwo nak, tén han sekxekmósa sa' ektémakxa sekpagkanamaxche ahagko' ko'o kélnepyeseksa kéxegke nápaqta'awók ma'a apyókxoho énxet'ák, amok sa' takha' m'a aqsok sélmésso naqsa ekmátsa nak ekpaqneyam.

Ezequiel 38:16

ektamagkok sa' ma'a énxet'ák ahagkok Israel. Gog, esawhekxohok sa' xép ma'a xapop, máxa sa' etnehek ma'a ektémól'a yaphope néten ekyentaxnól'a. Wának sa' ko'o ektámegmak xép xapop ahagkok se'e amonye' nak ektemegwánxa néxa ekhem, yaqwayam sa' hey'ásegwók ko'o m'a pók aptémakxa nak chá'a énxet'ák, eñama exchep, sekxekmósa sa' ektémakxa sektaqmalma nápaqta'awók ma'a.

Daniel 4:37

“Élpeykessamók ko'o kaxwók ma'a Wesse' Apwányam apha nak néten, ko'o Nabucodonosor, eyáyók han, ekteméssessegkek han apcheymákpoho, hakte naqsók agko' ma'a ekyókxoho aqsok apkelane nak, péwók nahan, apwanchek etnessásekxak mékoho m'a apkenè nak chá'a etnahak ekha kéláyo.”

Números 20:13

Cháxa ekteyapmakxa yegmen ekwesey nak Meribá xa, élyenneykegkaxa axta apkelpeywa israelitas apxéneykencha'a m'a Wesse' egegkok, apxekmóssamakxa axta apteme aptaqmalma.

Isaías 2:9

Apkelmegqásamákpekxoho apagko' aptamheykegkok, apnaqtawásamakpekxoho apagko' aptamheykegkok. ¡Ná elásekhekxoho!

Ezequiel 28:25

“Ektáhak ko'o sekpeywa s'e, sektáha nak Wesse': Wánchásekxak sa' ko'o énxet'ák Israel, anaqlósawakxak ma'a apheykegkaxa nak chá'a apkexpaqneykha nepyeseksa m'a pók aptémakxa énxet'ák, axekmósek sa' nahan sekteme sekpagkanamaxche nápaqta'awók ma'a pók aptémakxa nak chá'a énxet'ák. Elának sa' apchókxa apagkok apagko' ma'a énxet'ák Israel, cham'a apchókxa sekmésso axta m'a Jacob, apteme axta séláneykha.