Isaías 33:2 - Biblia Enxet

² Wesse', hẽlayósho henlanok negko'o, ektáha nak nélhaxanma exchep. Etne chá'a sempasmo negko'o yókxoho ekhem, tén han sẽlwagkasso teyp ma'a ekwa'a enxoho ekmaso negheykha.

Isaías 33:2 Referans Kwoze

Isaías 59:16

Teyekmek axta apwáxok Wesse' egegkok apwet'a méko ekyetnakhásawo awáxok xa; tén axta apmeyncha'a aqsa apmopwána apagkok apagko' apkelana aqsok, apkelwagkasso apagko' axta nahan aptáhak teyp ma'a.

Isaías 25:9

Sa' katnehek kalpaqmetaxchek, cháxa ekhem nak: “Cháxa Dios egagkok xa, negáyo nak chá'a, nélhaxanma nak hẽlwagkasek teyp. Kalpayhekxa egwáxok, ólátsaha, ẽlwagkassek teyp ma'a.”

Salmos 60:11

Hempásem negko'o ólenmexek ma'a nélenmexma nak, hakte mékoho agko' ma'a sempasmo nak énxet.

Salmos 62:8

¡Énxet'ák ahagkok, nágkólya'ássem chá'a Dios! ¡Kóltennés chá'a ekyókxoho ektáhakxa kélwáxok! ¡Dios apteme negko'o segmasma!

Salmos 62:1

Dios apteme wánxa segkésso meyke ektáhakxa sekha; cha'a keñamak sekwayam teyp ma'a.

Salmos 46:1

Dios apteme negko'o segmasma, tén han segyennaqtésso, apteme han sempasmo ekwa'a enxoho ekmaso negha.

Éxodo 14:27

Apya'ássek axta apmek Moisés ekpayhókxa m'a wátsam ekwányam, keñe axta élsaka, ekyetnákxo makham yegmen ma'a ekyetnamakxa axta chá'a. Xama axta apmako yenyahagkok ma'a egipcios, chápeykxeyk axta m'a wátsam ekwányam. Apkelweykásegkek axta Wesse' egegkok xa énxet'ák nak.

Oseas 14:2

Kólyo'ókxa makham Wesse' egegkok, sa' kóltéhek kólmaxnak se'e ektáha nak: “Ná eyaqmagkásekxa aqsa ekyókxoho nentémakxa mólya'assáxma, ema sa' aqsa yetlo ektaqmeleykha apwáxok se'e nélpeykessamo negmésa nak.

Lamentaciones 3:23

Yókxoho axto'ók chá'a katnekxak axnagkok; ¡awanhók agko' ektémakxa nak mehenyenyaweykha!

Jeremías 14:8

Xép, apkelhaxanma nak chá'a énxet'ák Israel, sẽlwagkasso nak chá'a teyp ekwa'a enxoho ekhem ekmaso negheykha, ¿yaqsa ektéma aptéma máxa apkeñama mók nekha s'e negyeseksa nak negko'o, aptémól'a m'a énxet apxegál'a, aphayam la'a sekxók yaqwayam etyenek axta'a?

Isaías 40:10

Apwa'akteyk kaxwók Wesse' egegkok yetlo apmopwána, kóneg aptemessásekxak ekyókxoho aqsok eñama apyennaqte. Apnaqlánteyk énxet'ák apagkok apkelwagkasso teyp.

Isaías 26:16

Wesse', agketmok chá'a exchep nenlegágkoho enxoho ekyentaxnamo egwáxok, cham'a senlegassásegkoho enxoho, yetlo magyennaqtésso nempaqhetchesso.

Isaías 26:8

Wesse', negyekpelchémók negko'óxa ektaqmalma nélxega m'a ámay senxekmóssamakxa nak ma'a segánamakxa apagkok. Egmenyeyk chá'a negko'o exchep kaxének egwáxok.

Isaías 25:4

Hakte xép apteme apyexanmomakxa m'a énxet apmopyósa nak, apmasma m'a aplegeykegkoho nak aphakxa meyke aqsok, apyexanmomakxa m'a ekwa'a enxoho éxchahayam ekyennaqte, pessesse apagkok ma'a ekmexna enxoho mayáhat. Máxa éxchahayam ekyennaqte éxcheheykmohol'a ekhem apmopsamágexa apkelennama m'a énxet'ák megkalmayósa nak elanok aqsok,

Salmos 123:2

Nélenmexawók negko'o aphakxa exchep negwóneyncha'a Wesse', Dios egagkok, aptémól'a elanha apmék wesse' apagkok ma'a apkeláneykha, ektémól'a kalanha ámek wesse' agkok ma'a éláneykha, nélhaxanma negko'o kapyóshok henlano'.

Salmos 91:15

Ewóneyha sa' agkok chá'a, wátegmowagkok sa'; ¡ko'o ahagko' sa' han axek xamók ma'a! Amallahanchesek sa' ekyentaxno apha, ayánchesseshok sa' sekmésso apteme ekha kéláyo;

Salmos 90:15

Hegmés negko'o apxámokma apyeyam élpayheykekxa egwáxok, ekhawo apwánxa axta apyeyam néllegeykegkoho ekyentaxnamo egwáxok.

Salmos 62:5

Dios apteme wánxa segkésso meyke ektáhakxa sekha; hakte cha'a keñamak sélhaxneykha chá'a ko'o m'a.

Salmos 50:15

Hélwónmakha chá'a ko'o ekwa'a enxoho ekyentaxno kélheykha; ko'o sa' almallahanchesek, tén sa' kéxegke hélpeykeshok chá'a.”

Salmos 46:5

Aphegkek Dios xa kañe' nak, megyohók sa' katnégwomhok exma; Dios sa' nahan chá'a epasmok ma'a élsaka enxoho.

Salmos 37:39

Wesse' egegkok keñamak apkelwayam teyp ma'a énxet'ák éltaqmalma nak apkeltémakxa, chá'a apkelyexánegweykekxexa chá'a ekwa'a enxoho ekmaso apheykha.

Salmos 25:3

¡Nágyoho elmegqeyk xama enxoho m'a ektáha nak xép apcháyo! ¡Eyke yána elmegqeyk ektáha nak xép apkenmexeykekxa meykexho apteméssessamakxa!

Salmos 143:8

Hey'assásegwakxoho chá'a ko'o ektémakxa seyásekhayo ekyókxoho axto'o, hakte may'ásseykmok ko'o exchep. Hey'ássesagkoho chá'a yaqwánxa atnehek sekweynchámeykha, hakte éltennássek ko'o exchep ma'a aqsok sekmámenyého.

Salmos 27:1

Wesse' egegkok apteme ko'o sélsássessóxma, tén han sewagkasso teyp, ¿yaqsa aqsok ko'o wé'? Wesse' egegkok apteme semasma, ¿yaqsa awanchek ko'o hégwakkasek?

Isaías 17:10

hakte kelwagqámeykegkek ma'a Dios ektáha axta apkelwagkasso teyp, megkaxeyenmak kélwáxok apteme axta apkelmasma apyennaqte m'a. Kélchekhamchek kéxegke s'e namyep étkók éltaqmalma nak, kélchencháseykekxeyk pánaqte exnók ma'a aqsok kéláyókxa éleñama nak mók nekha,

Isaías 37:3

apkeltamho eltennaksek aptáhakxa appeywa m'a wesse' apwányam, aptáhak axta s'e: “Sakhem néllegeykegkaxa ekyentaxno egwáxok, sẽllegassáseykegkoho tén han sẽltemessáseykekxa mékoho; máxa m'a kelán'a, ketók ektegkessamakxal'a étche kasawhaxchek ma'a ekwasqapma.

Isaías 51:5

Chágketwa'ak kaxwók ma'a ekpéwomo nentémakxa ahagkok, ketók kaxwók ekweykxa m'a nélwagkásamáxche teyp ahagkok; yetlo sekmowána sa' ko'o atnehek alanha m'a énxet'ák. Héleyxek sa' ko'o m'a énxet'ák apheykha nak apkelókxa neyáwa wátsam ekwányam, yásenneykxak sa' ma'a ektémakxa nak ko'o sekmowána.

Salmos 33:22

¡Wesse', segásekhayo sa' chá'a keytek negyeseksa negko'o, ekhawo ektémakxa nak nélhaxanma exchep!

Isaías 8:17

Massegkek eykhe apkelányo Dios ma'a Jacob énxet'ák apagkok, aleyxek sa' eyke aqsa ko'o. Hakte seyásenneykekxa ko'o ektemék ma'a.