Isaías 26:13 - Biblia Enxet

¹³ Wesse', Dios egagkok, nentemegkek negko'o kelwesse'e egagkok ma'a pók kelwesse'e nak, negya'ásegko' eyke exchep apteme wánxa Wesse' egegkok.

Isaías 26:13 Referans Kwoze

Isaías 63:7

Peyk ko'o axének Wesse' egegkok segásekhayo, peyk alpeykeshok eñama m'a ekyókxoho sekteméssessamakxa axta negko'o, eñama apkelásekhayo ekwányam agko' ma'a énxet'ák Israel, eñama m'a apteméssessamakxa axta chá'a ektaqmeleykencha'a apwáxok apkelányo tén han apkelásekhayo ekwányam agko'.

Isaías 2:8

¡Sawheykekxók eyke nahan aqsok kéleykmássesso m'a apchókxa! Apkelpeykessamók énxet'ák ma'a aqsok apcháyókxa apkelánéyák apagko' nak, eñama nak apmék apkelánéyák.

Amós 6:10

Awanhek sa' katnehek élmeneymáxche'. Apmeyk sa' agkok chá'a pók aphápak xama énxet yaqwayam etekkesek ma'a kañe' apxagkok. Sa' etnehek chá'a yának pók apha enxoho makham ma'a kañe' nak: “¿Yetnéya makham pók apxegexma exchep?” “Méko sa' etnehek yátegmowágkok ma'a pók nak.” Tén sa' etnehek yának se'e: “¡Ewanma', exénhok katnehek Wesse' egegkok apwesey!”

Isaías 51:22

Aptáhak Dios Wesse' kélagkok se'e ektáha axta apkelmasma m'a énxet'ák apagkok: “Eymentemekxak sa' ko'o kéxegke s'e egheykok élnápeykencha'a nak chá'a kélyeta m'a kañe'; megkólyenekxók sa' chá'a kaxwók ma'a egheykok kélyeta nak seklo.

Isaías 12:4

keñe sa' kóltéhek se'e: “Kólmés ekxeyenma kélwáxok Wesse' egegkok, kóltennasha apyókxoho énxet'ák apheykha nak keso náxop aqsok apkelane nak, kólya'assásegwakxoho apteme néten ma'a ekyókxoho aqsok.

Isaías 10:11

¿Mowancheya ko'o atnéssesek énxet'ák Jerusalén yetlo aqsok apcháyókxa m'a sekteméssesakxa axta m'a énxet'ák Samaria yetlo m'a aqsok apcháyókxa nak?’”

2 Crónicas 12:8

apkeláneykha sa' etnehek kéxegke m'a, keñe sa' kólya'ásegwók ektémakxa hélyetlawha ko'o, tén han ektémakxa kólyetlawha m'a pók apkelwesse'e apkelwányam nak keso náxop.”

Josué 23:7

Nágkólpáxaqwom pók énxet'ák apheykha nak makham se'e kélnepyeseksa nak kéxegke. Nágkólpeykesho m'a aqsok apkeláyókxa nak, nágkólyahakxoho han; nágkólxénmakha han chá'a xa aqsok kéláyókxa nak, nágkólmaha han chá'a élwesey kélteméssesa enxoho chá'a naqsók kélpeywa.

Isaías 26:8

Wesse', negyekpelchémók negko'óxa ektaqmalma nélxega m'a ámay senxekmóssamakxa nak ma'a segánamakxa apagkok. Egmenyeyk chá'a negko'o exchep kaxének egwáxok.

Isaías 64:5

Emhohok xép takha' m'a énxet apkelane nak chá'a aqsok ektaqmela yetlo ekpayheykekxa apwáxok, megkalwagqayam nak chá'a elának ma'a apmopmenyého nak chá'a exchep. Aplamchek axta exchep, hakte nenláneykegkek axta negko'o mólya'assáxma; nanók agko' axta nenlókáséyak.

Miqueas 4:5

Elyahakxohok chá'a aqsok apcháyókxa m'a pók énxet'ák nak, keñe sa' negko'o ólyahakxohok chá'a Dios Wesse' egegkok meyke néxa.