Éxodo 34:18 - Biblia Enxet

¹⁸ “Kóllána chá'a kélessawássessamo kelpasmaga meyke kempáseyak, kólteme sa' chá'a m'a séltémókxa axta chá'a kóltéhek, kóltawagkok kelpasmaga meyke kempáseyak ekweykmoho siete ekhem. Pelten Abib nahan pekkenamaxcheyk chá'a yaqwayam kalanaxchek xa, hakte cháxa pelten kélánteyapmakxa axta m'a Egipto.

Éxodo 34:18 Referans Kwoze

Levítico 23:6

“Keñe sa' ekhem quince, ekhawo nak xa pelten nak, kalanaxchek kélessawássessamo kelpasmaga meyke kempáseyak, megkólwagqayam ma'a Wesse' egegkok. Siete ekhem sa' kawomhok aptámap kelpasmaga meyke kempáseyak.

Éxodo 13:4

Cháxa kélántepakxa axta kéxegke xa ekhem nak, pelten Abib,

Éxodo 23:15

Kóllána sa' kélessawássessamo kelpasmaga meyke nak kempáseyak, ekhawo m'a séltamhókxa axta kóltéhek kóltawagkok kelpasmaga meyke kempáseyak ekweykmoho siete ekhem, cham'a ekhem ekpekkenamaxchexa nak chá'a pelten Abib, hakte cháxa pelten nak kélánteyapmakxa axta kéxegke m'a Egipto. Méko sa' nahan xama énxet enxoho apwanchek hey'óták ko'o, mesánto enxoho xama aqsok.

Éxodo 12:2

“Keso pelten nak, katnehek sa' ekhem kélagkok kéxegke, pelten apkemha apmonye' apyeyam nak.

Éxodo 12:42

Apheyk axta nahan apkeláneyncha'a apmako elántekkesek Wesse' egegkok Egipto xa axta'a nak. Cháxa eyéméxko nak han chá'a elanagkok apkelánteyápeykmoho israelitas ekweykekxoho aptawán'ák neptámen meyke néxa xa, hakte cháxa axta'a apagkok Wesse' egegkok xa.

Números 28:16

“Kóllanaksek sa' chá'a megkólwagqayam Wesse' egegkok ekhem Pascua m'a ekhem catorce, apkemha apmonyel'a pelten ma'a apyeyam,

Números 28:17

keñe sa' ekhem quince katnehek sa' ekhem kélessawássessamókxa. Kóltawagkok sa' kelpasmaga meyke kempáseyak ekweykmoho siete ekhem.

Éxodo 13:3

Keñe axta Moisés aptáha apkeláneya énxet'ák se'e: “Kaxén sa' kélwáxok se'e ekhem nak, apkelántekkesakxa axta Wesse' egegkok ekyetlómo ekwányam agko' apmopwána m'a Egipto, cham'a kélheykegkaxa axta kéltéma kélásenneykha naqsa. Nágkóltawák aqsa kelpasmaga ekyetlómo nak kempáseyak.

Éxodo 23:14

“Kóllána sa' chá'a ántánxo kélessawássessamo xama apyeyam ekxénweykekxoho kélwáxok ko'o.