Éxodo 16:15 - Biblia Enxet

¹⁵ Aptáhak axta nahan chá'a apcháneya pók israelitas apkelwet'a s'e: “¿Yaqsa aqsok se'e ektéma nak?” hakte maxta elya'ásegkok ma'a ektéma nak aqsok apkelwet'a. Tén axta m'a Moisés aptáha apkeláneya s'e: —Ékeso kelpasmaga apmésso kéxegke Wesse' egegkok yaqwayam kóltawagkok.

Éxodo 16:15 Referans Kwoze

Éxodo 16:4

Tén axta Wesse' egegkok aptáha apcháneya Moisés se'e: —Wának sa' ko'o kapallenták nento éleñama néten. Elántépok sa' nahan chá'a yókxoho ekhem énxet'ák, yánchásekxak sa' chá'a m'a ekwánxa enxoho yaqwayam kaxhok apmeykha m'a ekhem nak. Émenyeyk ko'o ótak yaqsa élyeheykekxoho m'a sekpeywa tén han yaqsa megkalyeheykekxa'.

Éxodo 16:31

Apteméssessegkek axta nahan ekwesey israelitas maná m'a aqsok apkelmágko axta. Élmope axta nahan ma'a, máxa axta m'a aqsok ekwesey nak cilantro aktek, atsek axta nahan, máxa axta m'a ektémól'a kelpasmaga apkelexyawáyol'a kéltexnéyak la'a m'a yányawhéna' apyegmenek.

Deuteronomio 8:3

Apxámássessegkek axta eykhe eyeyméxchexa aqsok, apkelhayak axta meyk, apkeleykegkek axta eyke natámen ma'a aqsok ekwesey axta maná, nento éleñama axta néten, cham'a nento megkólweteya nak kéxegke tén han melweteya axta m'a kélyapmeyk nanók axta, yaqwayam enxoho elya'ássesagkohok megkatnaha wánxa nento ekyennaqtésso apnények ma'a énxet, akke nahan ekyennaqtésso apnények énxet ma'a ekyókxoho Wesse' egegkok appeywa nak.

Nehemías 9:20

Apkelméssegkek axta han ma'a espíritu aptaqmalma apagkok yaqwayam enxoho elxekmósagkok; apkeleykegkek axta aqsa m'a maná apcháphássesso axta, apméssegkek axta han yegmen yaqwayam kamasseksek hem élnapma.

Nehemías 9:15

Apkelméssegkek axta han aptéyak éleñama néten, yaqwayam enxoho emasséssesek élnapma meyk, tén han aptekkessessama yegmen ma'a meteymog, yaqwayam kamasseksek hem élnapma. Tén axta apkeltémo elántexek elhók ma'a apchókxa apkeltennassamakxa axta.

Josué 5:12

Keñe axta ekmassa apkelwet'a m'a aptéyak eñama nak néten. Axta keñamak énxet'ák Israel apteykegko m'a aqsok ekteyapma eñama nak ektekkesso m'a xapop, cham'a apyeyam nak, ekpayho nak ma'a yókxexma Canaán.

Deuteronomio 8:16

apkeleykegkek axta nahan aqsok ekwesey axta maná m'a yókxexma meykexa nak énxet, nento melwetaya axta m'a kélyapmeyk nano' nak kéxegke, yaqwayam enxoho eweykessásenták ma'a ektémakxa nak kélásennamaxkoho kélagko' tén han elyepkeynek chá'a yaqwayam enxoho natámen kéxegke kólwetak ektaqmalma kélheykha.

Números 21:5

yetlókok axta nahan apkelpaqméteykha apkenmexeyncha'a m'a Dios, tén han ma'a Moisés. Aptáhak axta apkeláneya s'e: —¿Yaqsa ektéma sẽlántekkessama nak negko'o kéxegke m'a Egipto? ¿Yaqwayam hẽlnáhapwak yókxexma meykexa énxet enxeykel'a? Méko yegmen negyenéyak enxoho, tén han nento. ¡Ẽlleklámegkek negko'o s'e nentéyak élmasagcha'a nak!

Éxodo 16:33

Keñe axta Moisés aptáha apcháneya Aarón se'e: —Ema sa' xama hówenaq apxagkok, tén sa' exatmok ekweykmoho ánet kilos maná. Tén sa' natámen epekkenwakxak ma'a aphakxa nak Wesse' egegkok, yaqwayam sa' kóltaqmelchessesek ma'a kéltawán'ák nak kéxegke.

Proverbios 9:5

“Kólmeyógma s'e kóltáswa sekto, kólyahagwa vino sélane ahagko' xeyk ko'o.

Salmos 78:24

¡appalchessásenteyk axta énxet'ák apagkok ma'a maná, hótáhap apkeñama nak néten, yaqwayam etawagkok!

Salmos 105:40

Apkelmaxnagkamchek axta aptéyak, keñe apcháphássessama sénhek, apkelyaqkánegkessegkek axta apkeleykegko m'a nento éleñama nak néten.