4 Aptaqnókek agkok xép ma'a aptaqmelchesso nak apchókxa, nágkapekhe apwáxok; mampekhésamaxche' awanchek kamasseksek ma'a aqsok ekyawe nak magaqhémo.
Ná etyep ekmanyehe agko' ma'a aphakxa nak. Ná ewhánekxoho aqsa m'a aqsok ekmaso ekmáheyo nak kalanaxche', hakte elának chá'a aqsok wesse' apwányam ma'a apmakókxa enxoho chá'a elána'.
Kamasseksohok aplo wesse' m'a mampekhésamaxche nak chá'a ampaqhetchesek; kalekwomhok apwáxok ma'a ektaqmeleykha nak nempeywa anlána'.
Etekkesek chá'a éllámaxche m'a énxet ekmanyehe nak chá'a elwok; emasseksek eyke chá'a m'a énxet mepekhésamap nak chá'a elwok.
Ekyekpelchágweykmek ko'o ektémakxa nak megkapéwomo nak élánamáxche aqsok keso náxop, keñamak ma'a kelwesse'e apkeltaqmelchesso nak apchókxa: