Cantares 5:1 - Biblia Enxet

¹ Eyáxeg, sekpagkanma, ektaxnegwa'akteyk kañe' séneykekxexa pánaqte exnók ahagkok. Élmákxeyk kaxwók ma'a yámet ánek ahagkok ekmátsa nak ekpaqneyam tén han ma'a élmátsessamo nak élpaqneyam aqsok. Ektókek kaxwók yányawhéna' apyegmenek ahagkok, ekyenchek nahan ma'a vino ahagkok tén han ma'a weyke nagkeygmenek ahagkok. Énámakkok sélásekhayo, kóltawák, kólyenák nahan, ¡kólyenák ekwánxa enxoho kélmaka!

Cantares 5:1 Referans Kwoze

Cantares 6:2

Exchek apmeyákxak ko'o sekpagkanma m'a apkeneykekxexa nak pánaqte exnók apagkok, émpeykxa nak ekpaqneyam ekmátsa, apmako elagkok pa'at ma'a nepkések apnaqtósso tén han peya elyaqténwakxak ma'a pánaqte exnók élyexwase nak.

Cantares 4:16

Excheyha, ¡Kaxatakha'! Yeyam, ¡Emyenta s'e! ¡Kólwátekhapwata séneykekxexa pánaqte exnók, kólampés ekpaqneyam ekmátsa! Sekpagkanma, emyenta' apkeneykekxexa pánaqte exnók apagkok, etáswata ekyexna ekmátsa agko' nak.

Proverbios 9:5

“Kólmeyógma s'e kóltáswa sekto, kólyahagwa vino sélane ahagko' xeyk ko'o.

Isaías 66:14

Kélwet'ak sa' agkok kéxegke xa, kalpayhekxak sa' kélwáxok; kayaqmagkasek sa' mók ektémakxa kélyempe'ék ektémól'a m'a pa'at. Exekmósek sa' apmopwána Wesse' egegkok nepyeseksa m'a apkeláneykha, keñe sa' aplo m'a nepyeseksa nak apkelenmexma.

Isaías 65:13

Cháxa keñamak aptáha nak appeywa Wesse' egegkok se'e: “Yetneyk sa' chá'a katnehek aptéyak ma'a séláneykha; keñe sa' kéxegke kóllegagkohok meyk élnapma; yetneyk sa' katnehek ma'a apyenéyak, keñe sa' kéxegke kóllegagkohok hem élnapma; kalpayhekxak sa' apkelwáxok ma'a, keñe sa' kéxegke kólmegqe';

Isaías 61:11

Hakte sa' etnéssesek Wesse' egegkok etekkesek ekpéwomo nentémakxa apagkok ma'a ektémól'a kalántekkesek aqsok kélcheneykekxa m'a xapop, tén han ma'a ektémól'a kaltektepagkok aqsok kélcheneykekxa m'a namyep étkok, apyókxoho énxet sa' elmeneykmaksek negmeneykmasso nak nélpeykessamo.

Isaías 58:11

Anaqlawha sa' chá'a ko'o yókxoho ekhem, almések sa' ekxámokma kéltéyak ma'a yókxexma meykexa nak énxet, almések sa' élyennaqte kélyempe'ék, máxa sa' kóltéhek ma'a namyep étkok ektaqmalmal'a kélexpaqhe yegmen, ektémól'a m'a ekteyapmakxal'a yegmen megkeymayél'a.

Isaías 51:3

Kapyóshok sa' ko'o alanok ma'a Sión, tegma apwányam apmopsagko nak apyókxoho. Namyep éltaqmalma sa' atnessásekxak ma'a ekyamáyekxa nak exma xapop yókxexma meykexa nak énxet, ektéma axta m'a Edén apkeneykekxexa axta aqsok ma'a Wesse' egegkok. Keytek sa' ekpayheykekxa egwáxok ma'a tén han negátseykha, tén han negmeneykmasso tén han negháxenmo m'a kélpáwasso ekmátsa.

Cantares 8:13

¡Xeye', ekweynchámeykha nak chá'a neyseksa pánaqte exnók, koho sekxók weyxhok ekpeywa! ¡Apkelhaxneyk xeye' eñak ekpeywa ennámakkok!

Isaías 53:11

Étak sa' ekyaqmageykekxa ektémakxa apha natámen apwete ekxámokma aplegeykegkoho, kapayhekxak sa' apwáxok ma'a apya'ásegwokmo enxoho; elmallahanchesek sa' aqsok ekmaso apxámokma énxet ma'a Wesse' egegkok apkeláneykha appéwomo nak, hakte emekxak sa' ma'a apkeltémakxa élmasagcha'a nak.

Isaías 23:18

Keñe sa' ma'a ekwete nak ekyánmaga élyánmagkásamáxche kólpagkanchesek ma'a Wesse' egegkok; megkólaqxegkesek sa' kañe', megkóltaqmelchesek sa' nahan. Sa' kólmésagkok chá'a m'a apkeltemessáseykha nak chá'a Wesse' egegkok, yaqwayam sa' etegyagkok chá'a ekxámokma m'a aptéyak tén han ma'a apkelántaxno apkeltaqmalma nak.

Isaías 5:1

Anneykmássesek sa' ko'o émók seyásekhayo, negmeneykmasso, apkelánesso axta m'a anmen yámet apkeneykekxa. Yetneyk ko'o xama émók apkeneykekxa anmen yámet ma'a xapop megkeyssamakxa nak katyapok aqsok kélcheneykekxa.

Cantares 8:1

¡Etnoho anna axtal'a exchep eyáxeg ahagko', ekwánegkessól'a apto m'a méme nam'agkok! Tén axta sekwet'a enxoho chá'a m'a ámay nak, apetsesek chá'a, méko axta nahan chá'a ko'o hésmaksek;

Cantares 6:11

Ekmeyákxeyk axta ko'o m'a apkemhakxa nak yányetsene apto sekmako alanok ma'a yenta'a kaxwe nak ekyápaqmáteykegkokxa áwa' aqsok ma'a yókxexma ekyapwátegweykenxa nak xapop; tén han sekmako alanok kaxwe éltektépeykekxa m'a anmen yámet tén han yántakyexna exnamok.

Salmos 16:3

Kalyeyha'ak ma'a aqsok kéláyókxa nak apchókxa, etnehek chá'a elxének ma'a ekleklamo nak chá'a apkelwáxok elyetlakxa',

Salmos 147:11

eyke kalkohok chá'a apwáxok ma'a ektáha nak chá'a apcháyo, melya'ásseyam nak chá'a ektémakxa segásekhayo.

Jueces 14:11

Apnaqlókek axta treinta apkelxegexma'a filisteo yaqwayam etnehek apkelxegexma, hakte apcháyak axta m'a Sansón.

Jueces 14:20

keñe axta aptáwa' ekxawákxo apxegexma axta chá'a m'a Sansón.

Proverbios 24:13

Hatte, etaw yányawhéna' apyegmenek; ekmátsa nak antók.

Eclesiastés 2:5

Yetneyk axta han namyep ahagkok ahagko', tén han séneykekxexa yenta'a ekha nak ekyexna, éneykekxeyk axta m'a mók ektémakxa nak yenta'a ekha nak ekyexna.

Cantares 1:13

Ekhéssamók ko'o sekpagkanma m'a ektémól'a nahápa apketkok kélxatal'a aqsok ánek ekmátsa ekpaqneyam, sekmakheyáseykencha'a nak chá'a nepyeseksa neme ahagkok.

Cantares 4:8

Sekpagkanma, hétlanta', ólántépok se'e Líbano nak. Kanmexentámho m'a xóp ekyapwate neyseksa énmeykha m'a étseksek egkexe nak Amaná, tén han ma'a étseksek nak ma'a Senir tén han ma'a Hermón, tén han ma'a yámakméwa axanák nak, tén han ma'a egkexe apkelyáqtamakxa nak neptána.

Génesis 37:25

keñe axta apheyncha'a aptókagko aptéyak. Pelakkassek axta han apkelwet'a apkelxegakmo apkeleyweykekxa m'a ismaelitas, apkeleñama m'a Galaad, yetlo apkelpátegkesso axta han yányátnáxeg ma'a sokmátsa, tén han ma'a ekyókxoho élátsessamo nak élpaqneyam aqsok, yaqwayam elsakxak ma'a Egipto.