Amós 6:1 - Biblia Enxet

¹ ¡Énxet'ák laye, apheykha nak meyke élyetnakhayo apkelwáxok ma'a Sión! ¡Énxet'ák laye, apheykha nak chá'a meyke apkelakakxa m'a Samaria, apkelámha apmonye'e nak chá'a apkelókxa ekyawe kéláyo, apkelye'eykekxoho nak chá'a m'a israelitas!

Amós 6:1 Referans Kwoze

Amós 4:1

Kóleyxho sa' se'e kelán'ák nak Samaria, kélhémo nak weyke eknaqmele Basán, kélyentaxnéssesso nak chá'a apheykha m'a meyke nak aqsok apagkok, kélnaqtawáseykegkoho nak chá'a m'a apkelmopyóseka nak, kéltémo nak chá'a elsantagkasek anmen yámet égmenek ma'a kélnaqteyegka'a, yaqwayam kólyenagkok.

Sofonías 1:12

“Amok sa' ko'o xama cháléwasso xa ekhem nak keñe sa' atátchesek alanok ma'a Jerusalén. Allegássesagkohok sa' ma'a énxet'ák apkeltaqmelchessamo nak aqsa apheykha ektémól'a vino ektaqmelchessamól'a aqsa ekyetno, apteme nak chá'a elpaqmeyesmakha s'e: ‘¡Melanyek xama aqsok Wesse' egegkok, cham'a ektaqmela nak tén han ma'a ekmaso nak!’

Jueces 18:7

Axta apkelchampa'awok han apkelmahágko Lais ma'a cinco apkelányo yókxexma nak. Méko axta éltamheykha apkelwáxok énxet'ák apheykha axta xa tegma apwányam nak, aptamheykegkaxa axta chá'a m'a sidonios; tásek axta apheykha, yetlo meyke ektáhakxa apkelwáxok, meyke élya'assóxma xama enxoho, méko axta han eyeyméxchexa. Tayépek axta han apheykegkaxa m'a sidonios, axta han epáxaqweykmok pók énxet'ák.

Jeremías 49:31

Ektáhak ko'o seyáneya s'e, sektáha nak Wesse': ¡Kólxeg, kólchetamák xa énxet'ák megkalyetnakhassamo nak apkelwáxok xama aqsok tén han ektaqmalma nak apheykha, apheykha nak chá'a meyke atña'ák apagkok, tén han meyke apkelápeykekxa, apyetno nak apxakko'!

Isaías 33:14

Apkelpexyennegkek éltamheykha apkelwáxok énxet melya'assáxma m'a Sión, apkelyegwakkók apagkók ma'a énxet'ák élmasagcha'a nak apkeltémakxa, aptáhak apkelpaqmeta s'e: “¿Yaqsa enxama negko'o apwanchek exek neyseksa m'a táxa ekmassesseykmoho nak aqsok, cham'a eyáléwe ekyawe meyke néxa nak?”

Amós 8:14

Elyaqnenagkok sa' meyke apkelchampeykekxa néten ma'a apteméssesso nak chá'a naqsók apkelmésso apkelpeywa m'a aqsok kéláyókxa nak Samaria, apteme nak chá'a apkelpeywa s'e: ‘Negásenneykekxeyk chá'a negko'o m'a aqsok apcháyókxa nak ma'a Dan’, Negásenneykekxeyk chá'a negko'o m'a aqsok kéláyókxa nak ma'a Beerseba.”

Jeremías 7:4

Nágkóleyxho m'a apkelyexancháseykencha'a nak chá'a, aptéma nak chá'a apkelanagkama s'e: ¡Keso apyetna Wesse' egegkok tegma appagkanamap apagkok se'e, keso apyetna Wesse' egegkok tegma appagkanamap apagkok se'e!

1 Reyes 16:24

Apmeykekxeyk axta han ma'a egkexe nak Samaria apagkok axta m'a Sémer, sesenta y seis kilos axta han ekyánmaga m'a sawo ekmope ekmomnáwa, apkeláneyak axta han tegma apwányam ekyennaqte kélhaxtegkesso nepyáwa', apteméssessama axta apwesey Samaria, hakte Sémer axta apwesey apagkok apmonye' m'a egkexe nak.

Lamentaciones 1:1

¡Apxakkók apagko' aptamhákxak ma'a tegma apyawe apláneyo axta chá'a énxet'ák! ¡Aphágwakxók kelán'a tampe' m'a tegma apyawe apagkok nak énxet'ák! ¡Kélméssegkek ekyentaxno ektamheykha m'a apchókxa ektaqmalma nak!

Jeremías 48:11

Apkelweteyak chá'a meyke ektáhakxa apheykha m'a énxet'ák Moab, megkólnaqleykekxak makham megkatnahakxa apkelókxa xama enxoho. Aphémók ma'a vino kélpekkenmal'a aqsa meyke kéltaqheyáseykha, megkólyetmeykekxal'a m'a mók kélyeta nak, cháxa keñamak megkamassama nak chá'a ekmátsa, tén han ekpaqneyam.

Salmos 123:4

¡Ẽlleklámeykegkek sẽlya'ásseyam ma'a kelwesse'e nak, tén han sẽlwanyeykha m'a apkeleymákpoho nak!

Amós 3:2

“Kéxegke axta kélwánxa kélagkok sélyéseykencha'a ko'o nepyeseksa m'a apyókxoho énxet'ák nak keso náxop. Cháxa keñamak peya nak ko'o ayaqmagkásekxak ma'a ekyókxoho aqsok élmasagcha'a nak kélláneyák.”

Amós 3:9

Kóllegés sa' kéxegke apheykha nak tegma apkelyawe kelwesse'e apxanák Asdod, tén han tegma apkelyawe kelwesse'e apxanák nak Egipto s'e amya'a nak. Sa' kóltéhek se'e: “Kólmeyenta sa' egkex'a nak Samaria; kóllano sa' magya'áseyak nak nentáhakxa ekyetno m'a kañe' nak, tén han nennaqtawáseykegkoho egnámakkok ekyetnama nak ma'a.”

Amós 5:27

Aláphaksek sa' ko'o kéxegke mók apkelókxa, teyp nak ma'a Damasco.” Cháxa aptáhakxa nak appeywa Wesse' Dios ekha apyennaqte xa. Cháxa apwesey xa.

Proverbios 1:32

Meyke apkelya'áseyak aqsok chá'a kalnápok ma'a melya'áseyak nak aqsok, keñe m'a élyeyháxma nak kalnápok chá'a m'a meyke nak élyetnakhayo apkelwáxok;

Jeremías 2:3

Élpagkanchessegkek axta ko'o m'a énxet'ák Israel, axta aptamhéyak aqsok séneykekxa éltaqmalma m'a. Asagkek axta agkok chá'a apteméssesakxa xama énxet, añássesagkohok axta chá'a ko'o wahak apkellegeykegkoho ekmaso. Ko'o sekxeyenma xa, sektáha nak Wesse' kélagkok.”

Jeremías 5:5

Ay'ókxak sa' ko'o m'a énxet'ák ekha nak kéláyo, alpaqhetchesek sa' nahan. Megkatnehek sa' nahan melya'áseykegkoho m'a apmopmenyého nak Wesse' egegkok, cham'a apkeltémókxa nak chá'a etnahagkok ma'a Dios apagkok. Apkelenmexeykekxeyk eyke Dios xa apyókxoho nak, megkalyaqwámeykegkok elyahakxoho'.

Amós 9:10

Esawhakpohok sa' etekyók apyókxoho m'a énxet'ák ahagkok melya'assáxma nak; cham'a apyókxoho apteme nak chá'a apkelpeywa s'e: ‘Méko sa' hentéhek, mehegáhapwek sa' ma'a aqsok ekmaso nak.’

Miqueas 3:1

Kóleyxho sa' kaxwo', kelwesse'e, tén han apkelámha apmonye'e nak Israel, ¿yagkapayhawok kéxegke kólya'asagkohok ma'a aqsok ekpéwomo nak?