Amós 5:2 - Biblia Enxet

² Apteyekmek Israel aphémo nak kelán'a étkok ektaqmalma; apteyekmek meyke apheykekxa néten. Apyetneyk náxop, cham'a xapop apagkok nak, méko han xama enxoho yaqwayam kaxneyásekxak néten.

Amós 5:2 Referans Kwoze

Jeremías 14:17

Etne sa' nahan elának énxet'ák se'e: “Kalpexyewenták sa' ahaqta'ák égmen'ák yókxoho ekhem tén han yókxoho axta'a, meyke néxa, eñama ekmaso agko' ektamhágkaxa m'a énxet'ák ahagkok, eñama élyawe agko' ma'a apkelyense.

Amós 9:11

“Axátekhásekxak sa' ko'o makham David axta apxagkok aptéyam xa ekhem nak. Alápekxak sa' ma'a apkelyagqaxe nak, almekxak sa' makham ma'a nápakha'a apketkók nak, keñe sa' axátekhásekxak makham axnéshok ma'a aptémakxa axta m'a nano' axta,

Amós 8:14

Elyaqnenagkok sa' meyke apkelchampeykekxa néten ma'a apteméssesso nak chá'a naqsók apkelmésso apkelpeywa m'a aqsok kéláyókxa nak Samaria, apteme nak chá'a apkelpeywa s'e: ‘Negásenneykekxeyk chá'a negko'o m'a aqsok apcháyókxa nak ma'a Dan’, Negásenneykekxeyk chá'a negko'o m'a aqsok kéláyókxa nak ma'a Beerseba.”

Oseas 14:1

¡Israel, ey'ókxa makham Dios Wesse' apagkok, mey'assáxma axta exchep keñamak aptéyékmo!

Oseas 6:2

Ekmanyehe agko' sa' hẽlmeyásekxak nélyennaqte, hẽlchampásekxak sa' néten, yaqwayam sa' aghakha nápaqto'.

Lamentaciones 2:13

¿Yaqsa ko'o ewanchek axnésho essenhan eytchásekxohok xeye' Jerusalén ektaqmalma? ¿Yaqsa ewanchek eytchásekxohok yaqwayam ataqmelchessásekxak awáxok xeye' Sión ektaqmalma meyke nak kélteméssesseykmoho exma'? Awanhók agko' ektémakxa kélmassésseyam, máxa m'a wátsam ekwányam; ¿yaqsa awanchek kataqmelchessók?

Jeremías 51:64

tén sa' etnehek se'e: ‘Sa' etnehek ewéwagkok Babilonia xa, mopwanchek sa' exnekxak néten neyseksa m'a aqsok ekmaso peya nak yahak Wesse' egegkok.’” Cháxa néxa appeywa Jeremías xa.

Jeremías 50:32

Apchókxa eyeymáxkoho nak, etlapmok sa' xép, eyaqnenek sa' nahan, méko sa' han kaxneyásekxak néten. Alwatnések sa' apyókxoho tegma apkelyawe apagkok, kamasséssók sa' ekyókxoho aqsok ekhéyak nak nepyáwa xa táxa nak.”

Jeremías 31:4

Israel, axátekhásekxak sa' ko'o makham xép. Éxyamok sa' makham yetlo appáwasso kélaqtáwasso enéwha ekmátsa agko'.

Jeremías 18:13

Cháxa keñamak aptáha nak Wesse' egegkok se'e: “Kólmaxneyha hana m'a pók aptémakxa nak énxet'ák, aplegayak kexa xama xa ektéma nak aqsok. ¡Asagkók agko' apkeláneyak aqsok ma'a énxet'ák Israel!

Jeremías 4:20

Wa'akteyk aqsa chá'a amya'a ekmaso; ekmaso tamhákxak ma'a ekyókxoho apkelókxa. Kélmasséssekmek ekmanyehe agko' ma'a sélpakxenéyak nak, éltawassáseyha agko' ma'a sekpakxanma nak.

Jeremías 2:27

hakte axta aptemék chá'a apkenagkama yámet se'e: ‘Xeye' ekteme táta ahagkok’, tén axta meteymog aptéma chá'a apkelanagkama s'e: ‘Xeye' ekteme méme ahagkok.’ Keñe axta ko'o seyheykekxo apkap'ák, axta hélányo'. Tén axta apkelwet'a enxoho chá'a ekmaso apheykha, etnehek chá'a heyának se'e: ‘¡Hẽlwagkasseta negko'o teyp!’

Isaías 43:17

apkeláphássek axta apxámokma apagko' sẽlpextétamo apkeltamho elántaxnegwók ma'a, yetlo yátnáxeg apkelyenyawasso apagkok tén han yátnáxeg, yaqwayam emasséssók. Apkelyaqnenágkek axta, mopwanchek axta apmako elchempekxak néten; máxa pápa' táxa eksapane axta aptamhágkok apsawheykpoho.

Isaías 37:22

Keso aptáhakxa exchek appeywa Wesse' egegkok apxéna m'a wesse' apwányam Asiria: “Senaquerib, máxa kelán'a étkok entáhak ésmésa exchep ma'a Sión. Yeykáseyha akqátek neptámen ekwanyawo aptaqháwo m'a Jerusalén.

Isaías 24:20

Máxa anmen áto' sa' katnehek kayawheykha, máxa tegma aphápak sa' katnehek kayawheykha meykel'a apyennaqte apkelánamap. Yentexók agkók ma'a megkay'assáxma, teyekmek sa' agkok, megkólxátekhásekxeyk sa' chá'a.

Isaías 14:21

Kóllánekxa sa' kéltáhakxa yaqwayam kólnápekxak kélketchek apkelennay'a eñama ekmaso apkeltémakxa m'a apyapmeyk nak, yaqwayam sa' megkalxének kaxwók apkelwáxok etnahagkok apagkok keso náxop, tén han exámaksek tegma apkelyawe keso nélwanmégkaxa.”

Isaías 3:8

Naqsók kéltegkesa m'a Jerusalén, keñe Judá kéltawáseyncha'a, hakte cham'a ekxénamaxchexa chá'a aqsok énmexma nak Wesse' egegkok ma'a tén han élánamáxchexa chá'a m'a aqsok eklókassamo nak wesse'.

2 Reyes 17:16

Apyamasmeyk axta ekyókxoho m'a apkeltémókxa axta etnahagkok ma'a Dios Wesse' apagkok, apkeláneykegkek axta han ánet weyke étkók kelennay'awo sawo ekyexwase égmenek kélpeykáseykekxa, apkeleykmassáseykha axta han Aserá. Apkelpeykessamók axta han chá'a m'a yaw'a aphéyak nak néten keñe han ma'a Baal.

2 Reyes 15:29

Apwokmek axta Tiglat-piléser, wesse' apwányam nak Asiria, aptémakxa axta wesse' apwányam Israel ma'a Pécah, apkelmeyk axta m'a tegma apkelyawe nak Iión, Abel-bet-maacá, Janóah, Quedes, Hasor, Galaad, Galilea keñe han ma'a ekyókxoho yókxexma nak Neftalí. Keñe axta m'a apheykha nak kañe' apkelmoma apnaqleykekxo m'a Asiria.

Jeremías 8:4

“Jeremías, eltennés sa' énxet'ák se'e amya'a sektáhakxa nak ko'o sekpeywa: “Apyaqnenchek agkok chá'a xama énxet yempekxak chá'a néten; apxegánegwokmek agkok chá'a m'a ámay, etaqhegwók chá'a.

Jeremías 9:9

¿Mallegássesagkóya sa' ko'o eñama apkeláneyak xa aqsok nak? ¿Matnésseseya sa' ko'o ekpayhawo nak atnéssesek séllegassáseykegkoho énxet'ák aptamhéyak nak xa ektéma nak? Ko'o sekxeyenma xa, sektáha nak Wesse'.

Jeremías 9:21

“Taxneyk enxanák nétsapma, wokmek ma'a tegma apkelyawe egagkok apkeltaqmalma nak; kelnapchek sakcha'a apkelennay'a m'a ámay nak, tén han wokma'ák ma'a apheykegkaxa nak chá'a énxet'ák elweynchamha.