Amós 1:14 - Biblia Enxet

¹⁴ Cháxa keñamak peya nak ko'o awatnek ma'a kélhaxtegkesso nak tegma apwányam Rabá, kamasséssessók sa' tegma apkelyawe apagkok xa táxa nak, neyseksa élpayheykha apatña'ák énxet'ák kempakhakma, tén han éxtegyawà ektémól'a éxchahayam ekyennaqte.

Amós 1:14 Referans Kwoze

Amós 2:2

Cháxa keñamak peya nak ko'o awatnek ma'a yókxexma Moab, kamasséssók sa' tegma apkelyawe nak Queriot xa táxa nak, eletsapok sa' moabitas neyseksa élpayheykha apatña'ák énxet'ák kempakhakma, tén han neyseksa kélpáwasso m'a kélaqkahasso.

Jeremías 49:2

“Ektáhak ko'o sekpeywa s'e, sektáha nak Wesse': Kammok sa' ekhem yaqwánxa wának ko'o kañexchek élpayheykha kélatña'ák kempakhakma m'a tegma apwányam Rabá apkelókxa nak ma'a amonitas; meteymog ektaháneykekxa mók sa' etnekxa', kamyetek sa' ma'a apheykegkaxa nak. Keñe sa' énxet'ák Israel elmekxak makham ma'a tegma apkelyawe apagkok axta. Ko'o sekxeyenma xa, sektáha nak Wesse'.

Deuteronomio 3:11

(Wánxa axta nahan xama apkeymomap refaítas ma'a wesse' apwányam Og; sawo axta nahan ma'a apyetnamakxa néten, cuatro metros axta nahan ekwenaqte, tén axta ekpayhakxa ánet metros, makhemek makham ekyetno xa, egwanchek agwetak ma'a tegma apyawe apagkok nak ma'a amonita, cham'a Rabá.)

Isaías 30:30

Eltamhok sa' kañexchek appeywa eyeymáxkoho nak ma'a Wesse' egegkok, exekmósek sa' nahan apmopwána, cham'a peya nak elának yetlo aplómo apagko', yetlo m'a táxa eyáléwe élwatnamo nak aqsok, tén han takha' aplo yetlo ekmámeye tén han yegmen élyennaqte.

2 Samuel 12:26

Apketámegkek axta Joab ma'a tegma apwányam nak Rabá, apagkok axta m'a amonitas, keñe axta ketók apmomakxa m'a tegma apwányam apagkok nak,

Zacarías 7:14

Axta keñamak séxpánchessama ko'o ektémól'a samaxche kaxpánchesek aqsok sélya'assama nepyeseksa m'a apyókxoho énxet'ák melweteya nak, meyke xama aqsok axta nahan tamheykekxak natámen ma'a apkelókxa, meyke xama énxet enxoho apmopwána exek. ¡Ekmaso axta aptemessáseykekxak ma'a xama apchókxa ektaqmalma agko' nak!”

Daniel 11:40

“Wokmek sa' agkok néxa, ektamagkok sa' wesse' apwányam apha nak nepyeyam ma'a wesse' apwányam apha nak nexcheyha; elanyexegmak sa' eyke, máxa éxchahayam ekyennaqte sa' etnehek ektamagkok ma'a apheykha nak nepyeyam, esawheyásekxohok sa' yátnáxeg apkelyenyawasso apkenchesso nak kempakhakma ekyókxoho apchókxa', tén han apxámokma apkelchánte yátnáxeg, keñe han ekxámokma agko' ma'a yántakpayhe.

Ezequiel 25:5

Yányátnáxeg apteykegkaxa pa'at sa' atnessásekxak ma'a Rabá, keñe sa' ma'a Amón atnessásekxak nepkések apxagkok. Keñe sa' kólya'ásegwók kéxegke sektáha ko'o Wesse'.

Isaías 9:5

Kólwatnekxak sa' ma'a kélatchesso kélmagkok nenlegayo axta chá'a elpáwaksek yenyahagkok ma'a sẽlpextétamo tén han ma'a apáwa apkeltexnémap nak éma. Táxa sa' kasawhoho'.

Salmos 83:15

¡etne emenxenchesek éxchahayam ekyennaqte apagkok xa ektáha nak, elyegwakkas yahak ma'a segyettekhane apagkok!

Job 39:25

Epáwak chá'a yátegmowágkok ma'a kélaqkahasso; makhawók chá'a etekhánek kempakhakma, eñohok han ma'a kélpeywa kéltémo nak kólchetamagkok kempakhakma, tén han kélpáxameykha.

2 Samuel 11:1

Apcháphássek axta David ma'a Joab yetlo sẽlpextétamo apkelwesse'e tén han apyókxoho sẽlpextétamo israelitas, cham'a ekhem élyapweykxal'a yenta'a, apkelxegamakxa axta chá'a apkelwesse'e apkelwányam ey'ammok kempakhakma, apmasséssekmek axta m'a amonitas, apwakhegwokmek axta han ma'a tegma apwányam Rabá, keñe axta David apha aqsa m'a Jerusalén.

1 Crónicas 20:1

Wenaqtémók axta makham, cham'a ekhem élyapweykxal'a yenta'a, apkelxegamakxa axta chá'a apkelwesse'e apkelwányam ey'ammok kempakhakma, apchánchesákxeyk axta Joab sẽlpextétamo keñe apkelántaxnegwokmo aptawássáseyncha'a m'a amonitas apkelókxa. Apkelyeyk'ak axta, keñe apwakhegwokmo m'a Rabá, apketámegkek axta ekwokmoho apmasséssekmo apyókxoho. Keñe David aphákxo m'a Jerusalén.

Jeremías 23:19

Máxa éxchahayam ekyennaqte m'a Wesse' egegkok aplo, máxa m'a segyettekhane ekyennaqte ekyeyhegwayam nak chá'a takhapxet ma'a élmasagcha'a nak apkeltémakxa.

Ezequiel 21:20

Elqahássesek sa' xama ámay yaqwánxa emyógmak yetlo sókwenaqte apagkok ma'a wesse' apwányam. Sa' ma'a tegma apkelyawe nak Rabá, Amonitas apchókxa nak, tén han ma'a Jerusalén, tegma apwányam ekyennaqte nak kélhaxta nepyáwa meteymog ma'a Judá.

Ezequiel 21:22

Tekkek axta nahan apkelya'assamakxa kélqahasso éltennasa m'a Jerusalén, cháxa éltennasa axta eyeyméxko kaxwók ektamagkok ma'a, yetlo apkelmeykha m'a apkenchesso nak chá'a apkelnápomap tén han yának kalanaxchek kaxwók nentekyawa, tén han elpáxamha ekyennaqte yempakha', ektamagkok nahan ma'a atña'ák apagkok nak, tén han elanagkok xama nélyetlamakxa néten tén han ewakhekxak ma'a ekyókxoho nepyáwa' nak.

Ezequiel 25:7

Cháxa keñamak sekmako nak ko'o allegássesagkoho' tén han agkések yaqwayam elmok ma'a pók aptémakxa nak chá'a énxet'ák, yaqwayam sa' elyementók ma'a ekyókxoho aqsok kélagkok ekyetnakxa nak. Amasséssók sa' ko'o kéxegke nepyeseksa m'a énxet'ák, amasséssók sa' nepyeseksa m'a pók aptémakxa nak chá'a énxet'ák, amasséssók sa' kélyókxoho. Keñe sa' kólya'ásegwók sektáha ko'o Wesse'.’

2 Samuel 12:31

keñe m'a énxet'ák apkeleymomap axta makham ma'a tegma apwányam apkelántekkesa, apkeltamhók axta eltemeykha elmaha m'a kélyaqténmól'a yámet, yámpóte, keñe han póte élánamáxche nak sawo, tén han elanagkok yátaphémekcha'ák. Hawók axta han apteméssesakxa David ma'a apyókxoho tegma apkelyawe apagkok nak amonitas, keñe axta aptaqháwo makham apmeyákxo Jerusalén yetlo apyókxoho sẽlpextétamo apagkok.

Ezequiel 21:25

Wokmek kaxwók ekhem yaqwánxa kóllegássesagkohok xép, wesse' apwányam Israel, tekyawa yáp ekmaso nak aptémakxa.